Isaiah 57

Shan

← Chapter 56 Jump to: Chapter 58 →

1ၵေႃႉဢၼ် သိုဝ်ႈတေႃႇၼၼ်ႉသုမ်းလႄႈ ၽူႈလႂ်ဢမ်ႇၶႆႈၸႂ်ဝူၼ်ႉၸႂ်။ ၶဝ်ၸိူဝ်းဢၼ်ၸၢင်ႈႁဵတ်းၵျေးၸူးၼၼ်ႉ ၶၢမ်ႇတၢင်းဢၼ် ပႄႇၽဵဝ်ႈပႅတ်ႈလႄႈ ၽူႈလႂ်ဢမ်ႇၶုၵ်းၸႂ်လႆႈၶႆႈၸႂ်ထူပ်း လူၺ်ႈလွင်ႈဢၼ်ၵေႃႉဢၼ်သိုဝ်ႈတေႃႇၼၼ်ႉ လႆႈၶၢမ်ႇတၢင်းဢၼ်သိမ်းဢဝ် လွတ်ႈသေ ၵႃႈၼႂ်းလွင်ႈတၢင်းဢၼ်ဢမ်ႇလီဢမ်ႇငၢမ်းၼၼ်ႉ။-

2ၵူၼ်းၸိူဝ်ႉၼင်ႇၼၼ်ၼၼ်ႉ တၵ်းလႆႈၶဝ်ႈၵႃႈၼႂ်းၵတ်းယဵၼ်ၶျၢမ်းသႃႇလႄႈ ၶဝ်ၸိူဝ်းဢၼ်ၵႂႃႇမႃးယူႇၼႂ်းတၢင်းဢၼ်သိုဝ်ႈဢၼ်ယူဝ်းၶဝ်ၼၼ်ႉ တၵ်းလႆႈၼိမ်ယူႇၵႃႈၼိူဝ်တီႈၼွၼ်းၶဝ်ဢေႃႈ။-

3လုၵ်ႈလၢင်းမႄႈၽိူဝ်ႉ၊ ၸိူဝ်ႉၶိူဝ်း မႄႈယိင်းဢၼ်လဵၼ်ႈၽူဝ်ၼွႆႉ တင်းမႄႈမွၵ်ႇယႃႈၶဝ်ဢိူၺ်း၊ ဢွၼ်ၵၼ် သုတ်ႉၸပ်းသုတ်ႉၸူးတႃႉ။-

4သူဢွၼ်ၵၼ်ယဝ်ႉယွၵ်ႇၽူႈလႂ်။ သူဢွၼ်ၵၼ်ဢႃႈပၢၵ်ႇလႄႈ မႅပ်ႈလိၼ်ႉဢွၵ်ႇၸူးတီႈၽူႈလႂ်။ သူပဵၼ်ၵူၼ်းမဵဝ်းဢၼ်ၽွၵ်ႈပျၢၼ်ႇၶိုၼ်း၊ မဵဝ်းဢၼ်သဵတ်ႈၸႃႇလူႉဢမ်ႇၸႂ်ႈႁိုဝ်။-

5ပဵၼ်ၵေႃႉဢၼ်ၸႂ်ၸပ်းၸႂ်ၸွႆး ရုၵ်ႈထူႉသၢင်းထူႉ ၵႃႈတႂ်ႈတူၼ်ႈမႆႉဢၼ်ၶဵဝ်ၵႃႈမီး၊ ၵေႃႉဢၼ်ဢဝ်လုၵ်ႈဢွၼ်ႇတၢႆ ၵႃႈၼႂ်းၶူင်ႈႁူၺ်ႈ တင်းလၢႆ ၵႃႈတႂ်ႈတီႈငၢပ်ႇမၢၵ်ႇႁိၼ်မၢၵ်ႇၽႃ ၸိူဝ်းၼၼ်ႉ ဢမ်ႇၸႂ်ႈႁိုဝ်။-

6ပုၼ်ႈမႂ်းတႃႇမႂ်း မီးၵႃႈၼႂ်းမၢၵ်ႇႁိၼ် ဢၼ်မိုၼ်ႈဢၼ်ၶျေႃးၵႃႈတီႈၶူင်ႈႁူၺ်ႈၼၼ်ႉလႄႈ လွင်ႈတၢင်းၸိူဝ်ႉၼင်ႇၼၼ် ၸိူဝ်းၼၼ်ႉ ပဵၼ်ဢမူၺ်ႇမႂ်းဢေႃႈ။ တေႃႈၵႃႈ ၵႃႈတီႈၽၢႆႇၼႃႈလွင်ႈတၢင်းၸိူဝ်ႉၼင်ႇၼၼ်ၸိူဝ်းၼၼ်ႉ မႂ်းယင်းသွၼ်းလေႃႇၶိူင်ႈပုၵ်ႈၸေႃႇ ဢၼ်သွၼ်းလေႃႇလႄႈ ဢဝ်ၶိူင်ႈပုၵ်ႈၸေႃႇၽေႃးၸဵၼ်ႇၸူးလူင်ပႄႇ။ ၵဝ်တၵ်းမီးတၢင်းဢၼ်ပေႇၸႂ် ၵွပ်ႈပိူဝ်ႈ လွင်ႈတၢင်း ၸိူဝ်ႉၼင်ႇၼၼ် ၸိူဝ်းၼၼ်ႉႁိုဝ်။-

7မႂ်းဢဝ်ၵူႇၼွၼ်းမႂ်းဝႆႉ ၵႃႈၼိူဝ်လွႆဢၼ်သုင်ၼႃႇၼၼ်ႉ သေယဝ်ႉ ၸၢင်ႈၶိုၼ်ႈၵႂႃႇၵႃႈတီႈၼၼ်ႈ ႁႂ်ႈလႆႈပုၵ်ႈၸေႃႇယိတ်ႈဢေႃႈ။-

8မႂ်းဢဝ်သၢၵ်ႈသေႇပုၼ်ႈဢၼ် မႂ်းတၵ်းၶုၵ်းၸႂ်လႆႈၶႆႈၸႂ်ထူပ်းၼၼ်ႉဝႆႉ ၵႃႈတီႈၽၢႆႇလင်ၽၵ်းတူ ဢိၵ်ႇတင်းသဝ်တင်းလၢႆယဝ်ႉ။ ၼွၵ်ႈသေတီႈၵဝ်ၼႆႉ မႂ်းထွတ်ႇၶူဝ်းၼုင်ႈမႂ်းတီႈပိူၼ်ႈသေလႄႈ ၶိုၼ်ႈၵႃႈၼိူဝ်တီႈၼွၼ်းယဝ်ႉ။ မႂ်းႁႂ်ႈၵူႇၼွၼ်းမႂ်းၵႂၢင်ႈသေလႄႈ ႁပ်ႉတုင်း ဢဝ်လူၺ်ႈၵၼ်တင်းၶဝ်ယဝ်ႉ။ ၵူႇတီႈၼွၼ်းၶဝ်ၵေႃႈ မႂ်းၸႂ်ၸပ်းၸႂ်ၸွႆးလႄႈ ႁႃဢဝ်တီႈယူႇတီႈသဝ်းမၼ်းယဝ်ႉ။-

9မႂ်းပႃးဢဝ်တင်းၼမ်ႉမၼ်းႁွမ်သေလႄႈ ၵႂႃႇၸူးၵႃႈတီႈၶုၼ်ႁေႃၶမ်းလႄႈ မႂ်းသုင်းသွင်ႇမဵဝ်းၼၢမ်ႇသႃႇတင်းလၢႆ ၼမ်ၼႃႇယဝ်ႉ။ မႂ်းပွႆႇၸႂ်ႉ တမၢၼ်ႇမႂ်းတင်းလၢႆ ၵႂႃႇၵႃႈတီႈဢၼ်ၵႆလႄႈ တူဝ်ၸဝ်ႈၵဝ်ႇၶျႃးတူဝ်ၸဝ်ႈၵဝ်ႇတူၵ်း တေႃႇထိုင်ႁွတ်ႈမိူင်းမရၼႃႉယဝ်ႉ။-

10ပိၵ်ႉသမ်ႉမႂ်းႁိူဝ်ႉၸႂ်ဢူၼ်ႈၸႂ် လူၺ်ႈလွင်ႈဢၼ် သဵၼ်ႈတၢင်းမႂ်းပဵၼ်ဢၼ်ၵႆၼႃႇၼၼ်ႉသေၵေႃႈ မႂ်းဢမ်ႇလၢတ်ႈလႄႈဝႃႈ၊ ၸႂ်လူႉယဝ်ႉ၊ ဝႃႈၼင်ႇၼႆၼၼ်ႉ။ ၵွပ်ႈပိူဝ်ႈဢၼ်မႂ်းထူပ်းဢသၢၵ်ႈမိုဝ်းမႂ်းလႄႈမႂ်း ဢမ်ႇမီးတၢင်းဢၼ်ႁႅင်းဢူၼ်ႈႁႅင်းယွမ်း။-

11မႂ်းတူၵ်းၸႂ်လႄႈ ၵူဝ်ႁႄၽူႈလႂ် တေႃႇထိုင်ႁွတ်ႈ ထၼ်ႈပေႃးသဵတ်ႈၸႃႇလူႉ ဢိၵ်ႇတင်းတေႃႇထိုင်ႁွတ်ႈထၼ်ႈပေႃး လူင်လိုမ်း ၵဝ်ပႅတ်ႈလႄႈ ဢမ်ႇႁဵတ်းသတီႉလႄႈယူႇၼၼ်ႉ ၵူဝ်ႁႄၽူႈလႂ်။ ၵဝ်ယူႇတဵတ်ႇတဵတ်ႇယဵၼ်ယဵၼ် ၸႃႉၸဵမ်မိူဝ်ႈၵွၼ်ႇဢွၼ်ၼႆႉၼၼ်ႉ ယူႇလႄႈ မႂ်းယင်းဢမ်ႇၵူဝ်ႁႄၵဝ်လႄႈယူႇ ဢမ်ႇၸႂ်ႈႁိုဝ်။-

12ၵဝ်တၵ်းၽုၺ်ႇဢွၵ်ႇၼႄပျႃး တၢင်းဢၼ်သိုဝ်ႈတေႃႇမႂ်းလႄႈ လွင်ႈတၢင်းဢၼ်မႂ်းႁဵတ်း ၸိူဝ်းၼၼ်ႉ ဢမ်ႇပၼ်ဢၵျူဝ်းတီႈမႂ်းလႆႈ။-

13မိူဝ်ႈဢၼ် မႂ်းႁွင်ႉသႅၼ်ႇၼၼ်ႉ၊ ႁႂ်ႈမုၵ်ႉၸိူဝ်းဢၼ်မႂ်းႁႂ်ႈၸူႉၵၼ်တုမ်ၵၼ်ၼၼ်ႉ ၵႄႇသႄႇၼုၵ်ႈဢဝ်မႂ်းသေၵမ်း။ လူမ်းတၵ်းထူဝ်း ဢဝ်ၶဝ်ၵႂႃႇလႄႈ လူမ်းဢၼ်ပဝ်ႇပွၵ်ႈလဵဝ်ၵမ်းလဵဝ်ၵူၺ်းၼၼ်ႉ တၵ်းဢဝ်ၶဝ်ပိဝ်ၵႂႃႇပႅတ်ႈဢေႃႈ။ ၵေႃႉဢၼ် ဢိင်ပိုင်ႈၵဝ်ယူႇၸမ်ႉ၊ တၵ်းလႆႈ ပိူင်ႇဢဝ်မိူင်းၸဝ်ႈလႄႈ ၶၢမ်ႇဢမူၺ်ႇလွႆဢၼ်မူတ်းၸၢင်ႇၵဝ်ၼၼ်ႉဢေႃႈ။

14မိူဝ်ႈၼၼ်ႉ မၼ်းတၵ်းလၢတ်ႈလႄႈဝႃႈ၊ ဢွၼ်ၵၼ်ဢဝ်လိၼ်ၵေႃႇလိၼ်တဵင်တႃႉ။ ဢွၼ်ၵၼ်ဢဝ်လိၼ်ၵေႃႇလိၼ်တဵင်တႃႉ။ ဢွၼ်ၵၼ်မႄးႁဵတ်းသဵၼ်ႈတၢင်းလႄႈ ၼုၵ်ႈဢဝ်တီႈဢၼ်ၶီႈလိုတ်းလႄႈလူမ်ႉၼၼ်ႉ ဢွၵ်ႇပႅတ်ႈသေၵႃႈၼႂ်းသဵၼ်ႈတၢင်းၵူၼ်းၵဝ် တင်းလၢႆၼၼ်ႉတႃႉ၊ ဝႃႈၼင်ႇၼႆဢေႃႈ။-

15လွင်ႈမၼ်းၸမ်ႉ ၽြႃးဢၼ်ပဵၼ် ဢၼ်ထွတ်ႈဢၼ်မျၢတ်ႈ၊ ဢၼ်ယူႇၵႃႈတီႈၽုင်ႇပိၵ်ႈမၢၼ်ႇဢၼ်ဝႃႈ ၶိင်ႇၵႃႇလႃႉ ဢၼၼ်ႇတႃႉ၊ ဢၼ်မီးၼႃႇမႃႉၸိုဝ်ႈသဵင်ဢၼ်ဝႃႈ တၢင်းဢၼ်မူတ်းၸၢင်ႇၼၼ်ႉ မီးဢမိင်ႉဝႆႉၸမ်ႉ၊ ၵဝ်ယူႇၵႃႈၼႂ်းတီႈဢၼ်မျၢတ်ႈသုင် မူတ်းၸၢင်ႇ ဢိၵ်ႇတင်းလူၺ်ႈၵၼ်တင်း ၶဝ်ၸိူဝ်းဢၼ်ၸႂ်သၽေႃး တႅၵ်ႇလႅဝ်လႄႈၶျႃးတႅမ်ႇၼၼ်ႉ ႁႂ်ႈၸႂ်ဝီႉၺိၺ်ႇၶဝ်ၸိူဝ်းဢၼ် ႁူဝ်ၸႂ်ၶျႃးတႅမ်ႇ ဢိၵ်ႇတင်းၶဝ်ၸိူဝ်းဢၼ် ႁူဝ်ၸႂ်တႅၵ်ႇလႅဝ်ၼၼ်ႉ ဢသၢၵ်ႈလႆႈလိပ်းဢေႃႈ။-

16ၵဝ်တၵ်း ဢမ်ႇထူပ်းတြႃးယူႇသေႇသေႇ။ တေႃးသႃႉတၢင်းၸႂ်မႆႈၵဝ် တၵ်းဢမ်ႇဢွၵ်ႇယူႇတႃႇသေႇ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ဢသၢၵ်ႈတၵ်းႁၢႆၵႂႃႇ ၵႃႈတီႈၽၢႆႇၼႃႈၵဝ်လႄႈ ဝီႉၺိၺ်ႇဢၼ်ၵဝ်ႁဵတ်းပဵၼ်ၸိူဝ်းၼၼ်ႉ တၵ်းႁွတ်ႈတၢင်းဢၼ်လူႉဢၼ်လႅဝ် ဢေႃႈ။-

17ၵွပ်ႈပိူဝ်ႈ ဢပႅတ်ႈတၢင်းဢၼ်မၼ်းပူၼ်ႉလိူဝ် ၼၼ်ႉလႄႈ၊ တၢင်းၸႂ်မႆႈၶႆႈၸႃႉၵဝ် ဢွၵ်ႇသေလႄႈ ၵဝ်ပၼ်တၢမ်ႇဢေႃႈ။ ၵဝ်တၵ်း ဝၢႆႇၼႃႈပႅတ်ႈသေလႄႈ ၸႂ်မႆႈၶႆႈၸႃႉဢေႃႈ။ မၼ်းၵေႃႈဝႄႈပိူင်ႈသေလႄႈ ၵႂႃႇၸွမ်းသဵၼ်ႈတၢင်းဢၼ် မၼ်းမီးဢလူဝ်ႇၼၼ်ႉဢေႃႈ။-

18ၵဝ်ႁၼ်သဵၼ်ႈတၢင်းဢၼ် မၼ်းၵႂႃႇၸိူဝ်းၼၼ်ႉယဝ်ႉလႄႈ တၵ်းႁႂ်ႈတၢင်းၶႆႈတၢင်းပဵၼ်မၼ်းႁၢႆဢေႃႈ။ ၵဝ်တၵ်းဢဝ်မၼ်း သူင်ႇလႄႈ ပဵၼ်ၵတ်းယဵၼ်ၶျၢမ်းသႃႇတီႈမၼ်း ဢိၵ်ႇတင်း ၶဝ်ၸိူဝ်းဢၼ် ၸႂ်ႁဵဝ်ႇၸႂ်ၸွပ်ႈလူၺ်ႈၵၼ်တင်းမၼ်း ၸိူဝ်းၼၼ်ႉဢေႃႈ။-

19ၵဝ်ၽၢၼ်ႇသၢင်းႁဵတ်းပဵၼ်မၢၵ်ႇသူပ်း တင်းလၢႆဢေႃႈ။-

20ႁႂ်ႈတၢင်းၼိမ်မီးတီႈၵေႃႉဢၼ်ၵႆ ဢိၵ်ႇတင်း ၵေႃႉဢၼ်ၸမ်ၼၼ်ႉသေၵမ်း။ ႁႂ်ႈမီးသေၵမ်း။ ၵဝ်တၵ်းႁႂ်ႈတၢင်းၶႆႈတၢင်းပဵၼ်မၼ်းႁၢႆဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃးမီးဢမိင်ႉဢေႃႈ။-

21ၶဝ်ၸိူဝ်းဢၼ်ဢမ်ႇတြႃးၼၼ်ႉၸမ်ႉ၊ မိူၼ်ၸိူဝ်ႉၼင်ႇၼမ်ႉပၢင်ႇလၢႆႇ ဢၼ်ယင်း ဢမ်ႇယူႇၼိမ်ၼိမ်လီလီလႆႈလႄႈ ဢဝ်ၵူမ်ႇတင်းမုၼ်ႈၽၢဝ်ႇပိုၼ်ယူႇၼၼ်ႉဢေႃႈ။ တီႈၶဝ်ၸိူဝ်းဢၼ်ဢမ်ႇတြႃးၼၼ်ႉ ဢမ်ႇမီးတၢင်းၼိမ်လႃးလႃး၊ ဝႃႈၼင်ႇၼႆလႄႈ ၽြႃးပဵၼ်ၸဝ်ႈၵဝ် မီးဢမိင်ႉဢေႃႈ။

← Chapter 56 Jump to: Chapter 58 →