1 Timothy 1

Sidamo

Jump to: Chapter 2 →

1Gatisaanchinke Maganunni hexxonke ikkinohu Yesuusi Kiristoosi hajajonni, Yesuusi Kiristoosi soqqamaasinchi Phaawuloosiwiinni:

2Ammanatenni halaalaancho beetto'ya ikkoottohura ate Ximootewoosira, Anninke Maganunna Mootichinke Yesuusi Kiristoosi elto, maaronna keeru ledokki hee'ro.

3Meqedooniya ha'ranni hee're eegamummohe garinni, hakkiicho hee'rannohu mitu mitu kaphu roso rosiissannokki gede assate ati Efesooni gati.

4Maattotenna gawalo nookki ilama kiirate giddora e'annokki gede hajaji. Hattoo coyi moronsho abbannota ikkinnina ammanatenni assinannihura Maganu loosira mittoreno dikaa'lanno.

5Tenne hajajo gawalo keeraanchu wodaninni, danchu tii"inni, halaalaancho ammananni afi'nanni baxilleeti.

6Mitu mitu manni kunni coyiwiinni baxxe, haafu moronsho widira higino.

7Hatto assitannohuno, seeru rosiisaano ikka hasidheeti. Ikkollana coyidhanni noore diaffino; wodanchitukkinni afoo wonshite coyidhanno.

8Garunni amandiro, seeru dancha ikkinota anfoommo.

9Seera uyinoonnihu danchu mannira ikkinokkita anfoommo; seera uyinoonnihu hajajantannokkirira, haxawarrootaho, maganittete heeshsho heedhannokkiriranna cubbaataammaho, qullaawoota ikkitinokkiriranna ayyaanaamo coye mishshannorira, anna woy ama shitannoriranna mannu lubbo huntannoriraati.

10Foortannoriranna labbaahu ledo akkimaltanno labballira, manna hirtannorira, kaphaasinete, kaphunni xaartannoriranna halaalaancho roso gibbannoriraati.

11Halaalaancho roso anfannihu kayinni, galatamino Maganire kulannohu ayirrado Dancha Duduwooti. Kuni Danchu Duduwi anera eeggo uyinoonnieho.

12Ane soqqanshosira doore, ammanamoommoha asse kiire jawaante uyinoeha Mooticha Kiristoosa Yesuusa galaxxeemmo.

13Kunni albaanni Kiristoosa xonoommosiha, xiiwoommosihanna shollishoommosiha ikkiro nafa, isi kayinni sao'ya agurinoe. Sao'ya agurinoehu, ani konne baala assoommohu afa hoogatenninna ammana hoogatenni ikkinota afinohuraati.

14Kiristoosi Yesuusinni afi'noommo ammananna baxilli aana, Mootichinke elto hala'lite aamantinoe.

15«Yesuusi Kiristoosi cubbaataamma gatisara yee tenne gobba dayino» yaanno qaali halaalaanchohonna mannu baalu adha hasiissannoho. Cubbaataammu baalunni rooru cubbaataami aneeti.

16Ikkollana sao'ya agurroonnie; sao'ya agurroonniehuno, Yesuusi Kiristoosi dannu nookki garinni baalunkunni roore cubbaataamo ikkoommohure anere cince, iso ammante hegere heeshsho afidhannorira lawishsha ikkeemmo gedeeti.

17Kunnira hegere Mootera, reyannokkihura, illete leellannokkihura, mittu Maganira ayirrinyunna galatu hegerenni hegere geeshsha iillosi! Hamii'ni.

18Beetto'ya Ximootewoosi! Kunni albaanni atere himanunni kulloonninte gede, kunninni aante noo hajajo eeggo eemmohe. Himanu yaanno garinni dancha ola olami.

19Ammananna danchu tii"i hee'rohe. Mitu mitu manni tiiansa hunte, massagannohu nookki markaawe gede ikkite ammanansa huntino.

20Insa giddo, Hemenewoosinna Isikindiri no. Insa Maganu aana sao coyidhannokki gede assate, Sheexaaneho sayise oommo.

Jump to: Chapter 2 →