1 Timothy 6

Sidamo

← Chapter 5 Jump to:

1Maganu su'minna rosiisino rosi xonamannokki gede, soqqamaano baala biillansara malino ayirrinye aa hasiissannonsata habboonke.

2Ammantino biilla, soqqamaanonsa Mootichu Yesuusinni roduuwansa ikkitino daafira mishshoonkensa. Hatteentenni, soqqanshonsanni qiniite afidhannori biillansa ammantino roduuwansa ikkitinohura, albinni roore soqqantonsana. Ati rosiisanna seejja hasiissannohehu konneeti.

3Halaalaancho Magano magansi'rate rosi ledo xaadannoha, Mootichinke Yesuusi Kiristoosiha xalala qaale agure baxxino roso rosiisannohu hee'riro,

4boo'natenni ufuufaminohonna mittoreno diafinoho. Moronshotenna nyerrimmate yorto giddo galtinoho. Kuni coyi hinaaso, gibbo, xonanshonna busha huluullo abbanno.

5Wodanu soorraminohunna halaalu baino manni wo'manka woyite yekkeeramanno. Hattoo mannira, Magano magansi'ra woxe afi'nanni doogo labbannonsa.

6«Nooehu ikkinoe» yaannohura, Magano magansi'ra lowo qiniiteeti.

7Tenne gobba mittoreno adhine didangoommo; tenne gobbannino adhine ha'neemmori mitturino dino.

8Inteemmorinna uddi'neemmori hee'rinkero ikkannonke.

9Dureeyye ikka hasidhannori kayinni jifante ubbanno. Manna doonsitannotenninna huntannotenni haafunna hamaamukkitte yortonni woshshaadantanno.

10Kuni ikkannohu woxe baxa bunshe baalate buicho ikkitinohuraati.

11Maganu mancho! Ati kayinni kunni baalu coyiwiinni xooqi; keeraanchimma, ayyaanaame heeshsho, ammana, baxille, cinca, arshimma ha'runsi.

12Dancha ammanate ola olami; isiwa woshshamitto yannara, lowo naqaashshe albaanni halaale farci'roottota hegere heeshsho cu'mi'ri.

13Baalunku coyira heeshsho aannohu Maganunna Phenxenichu Philaaxoosi albaanni dancha ammanamanni farci'rinohu Yesuusi Kiristoosi albaanni hajajeemmohe.

14Mootichinke Yesuusi Kiristoosi daa geeshsha tenne hajajo, so'ronna minshanniri nookkiha agadhi.

15Kiristoositi layinkimeeshshi daa, maassaminohunna callichisi gashshaanna ikkinohu mootoollate Moote, mootoollete Mootichi yiino barra ikkitanno.

16Reyannokkihu iso callaati; ayino gamba yaa dandaannokki xawaabbi giddo hee'ranno. Iso ayino illetenni dilaino; la"ano didandaanno; ayirrinyunna hegere wolqa isira ikkito. Hamii'ni.

17Tenne gobba dureeyye naaxxa woy hawaqi'nannikki coye hexxa agurte, ninke hagiirsiisate yee baalanka coye halashshe aannonke Magano hexxitanno gede hajajinsa.

18Qolteno dancha looso loossanni dureeyye ikkitara, aatenna afidhinore woleho iillishi'rate qixxaabbanno gede hajajinsa.

19Kunni garinni, halaalaancho heeshsho afi'rate dagganno yannara safo sigiiggino jiro duu'nitanno.

20Ximootewoosi! Eeggo uyinoonnihere seekkite agadhi; egenno ikkitukkinni egenno labbanno lallachawiinni xooqi.

21Mitu mitu togoo egenno noonke yitanni ammanate doogowiinni fultino. Maganu elto ate ledo heedho.

← Chapter 5 Jump to: