1 Timothy 3

Sidamo

← Chapter 2 Jump to: Chapter 4 →

1Mittu manchi, «Beetekiristaanete albisa ikka hasi'riro ayirrado looso halchanno» yaanno qaali halaaleho.

2Kunnira, beetekiristaanete albisi minshanniri nookkiha, mitte galteha, jilba sa"annokkiha, umosi qee'linoha, amanyoote agadhannoha, wosina adhannoha, rosiisa dandaannoha,

3dimbannokkiha, yekkeeramannokkiha, anja egemminoha, gibbo giwannoha, woxeho hagaagannokkiha,

4minesi seekke gashsha dandiinoha, oososi kawajjeessi'rinoha ikka hasiissannosi.

5Manchu minisi manna gashsha dandaannokkiha ikkiro, Maganu mine gashsha hiitto dandaanno?

6Boo'natenni bedeedameenna Sheexaaneho iillitu yoo yinannisikki gede, haaro ammanaancho ikkoonke.

7Mishamatenna Sheexaanu woshshaado giddo uwannokki gede, ammaninokki manni mereero dancha su'ma afi'rinoha ikka hasiissannosi.

8Kaa'laasine ayirraddanna yitinowa hossannore ikkitona; woyinete xajjera saankaabbannokkire, woxeho hagaaggannokkire ikkitona;

9keeraanchu tii"inni ammanate halaale agara dandiitannore ikkitona;

10insa balanxe fonqolle la'nona; minshanniri nookkire ikkitinota anfihu gedensaanni soqqantona.

11Mittu mittunku galte kawajjaame, manna he'mitannokkita, jilba sa'annokkita, baalunku coyira ammanantinota ikka hasiissanno.

12Cimeeyyete kaa'laasine mitte galtere, oosonsanna minensa danchu amanyootinni gashshitinore ikka hasiissannonsa.

13Kaa'lote loosinni dancha soqqansho soqqanturo, lowo ayirrinye afidhanno. Yesuusa Kiristoosa ammantino ammana daafira afoo wonshite coyi'ra dandiitanno.

14Tenne sokka borreesse soommohehu, mulenni atewa dayemmota hexxo assi'reeti.

15Keeshshummoha ikkiro kayinni, heeshshote Magani beetekiristaanera halaalu heelliichonna safo ikkinohu Maganu mini manni assa hasiissannore afatto gedeeti.

16Amma'nonke halaali, huluullo nookkiha jawaho. Hakku halaalino, «Manna ikke leellinohu; halaalaanchimmasi Qullaawu Ayyaaninni egennantinohu; sokkaasinete leellinohu; manna baalaho kulloonnihu; alamete aana noo manni ammaninosihu; ayirrinyunni gordo ha'rinohu» yaannoho.

← Chapter 2 Jump to: Chapter 4 →