1 Timothy 4

Sidamo

← Chapter 3 Jump to: Chapter 5 →

1Qullaawu Ayyaani xawise, «Gedensiidi yannara mitu mitu manni so'risiissanno ayyaannanna durriisu rosi hoode ha'ranni ammana aguranno» yaanno.

2Hattoo rosi, siwiilunni giirroonni bisi gede dillaabbino awaawuraasinewiinni fulanno.

3Hattoori manna adhanna adhama hooltanno. Ammaninohunna halaale afino manni iso galaxxanni itanno gede Maganu kalaqino sagale, «ittinoonte» yite hooltanno.

4Maganu kalaqinohu baalu danchaho; galatunni adhiniro, hunnannihu mittuno dino.

5Maganu qaalinninna huuccattotenni faansinoonniho.

6Konne roso ammanino mannira seekkite kulittoro, ammanate qaalenna ha'runsattohu danchu rosinni lophattoha Yesuusi Kiristoosiha dancha soqqamaancho ikkatto.

7Maganittennire afi'rinokki hasaawinna haafu maattowiinni xooqqe Magano magansi'ra rosi.

8Manninate kaajjishi'rate rosi shiimarella kaa'lanno. Magano magansi'ra rosa kayinni xaarano dagganno heeshshorano hexxo noota ikkitino daafira, baalunkurira kaa'litanno.

9Kuni coyi mannu baalu adha hasiissanno halaaleeti.

10Ninke manna baala, roorenka ammantinore baala gatisannoha heeshshote Magano hexxineemmore ikkinoommo daafira, daafurre loonseemmo; sharrammeemmo.

11Konne coye hajaji; rosiisi.

12Anjekki ayino mishoonkehe; coyi'ratto coyinni, hee'ratto heeshshonni, baxillunni, ammanatenninna fayyaaleessimmatenni ammanaasinete dancha lawishsha ikki.

13Ani daammo geeshsha qullaawa maxaaffa mannaho nabbawate, kulatenna rosiisate jawaati.

14Himana kullihe woyitenna cimeeyye anga aanaho wortuhe yannara uyinoonniheta atewa noota Maganu elto lashshi assitooti.

15Lophakki mannu baalu afanno gede kunni coyira diinaggaawi; jaatte assi.

16Ateneenna rosiisatto roso seekkite agadhi; konne coye jaatte assi. Hatto assittoro, ateneenna macciishshitannohere gatisatto.

← Chapter 3 Jump to: Chapter 5 →