1 Timothy 5

Sidamo

← Chapter 4 Jump to: Chapter 6 →

1Geercho annu gede assite amaalisi ikkinnina ruffooti; wedella roduuwu gede,

2meyaa geerra, amuuwu gede assite hedi; aja meento, roduuwu gede assite wo'ma fayyaaleessimmanni hedi.

3Galte shii'rino meento ayirrisinsa.

4Galte shiidhino manchora ooso woy oosote ooso heedhusero, hatti ooso balaxxe mininsa manni daafira diinaggaabbannorenna iltinonsariranna ahaahinonsarira galata qola rossinore ikka hasiissannonsa. Kuni Magano tashshi assanno coyeti.

5Gunnimmatenni callase nooti, Magano hexxitanni hashshanna barra kaa'lannose gede jaatte huuccidhanno.

6Tenne gobba hagiirre calla baxxanno gunnitte kayinni uurronni reyitinote.

7Minshanninsari nookkiha hee'ranno gede konne coye rosiisinsa.

8Umisi fiixa, roorenka minisi manna kaa'lannokkihu, ammana agurinoho; ammaninokki manninni roore bushaho.

9Tajete su'mase borreessinanni gunnitte, 60 diri kawita ikkitoonke. Qolteno, mittu ayiddaannira calla assidhinota ikka hasiissannose.

10Oososeno danchu garinni lossi'rate, wosina adhate, keeraanote lekka hayishshate, qarrantinore kaa'latenna dancha looso baala loosate diinaggaabbannota ikka hasiissanno.

11Galte shii'rinori aju meenti, maalu yorto qeelteennansa Kiristoosira noonsa baxille hooge mine assi'ra hasi'ranno daafira, insa gunnootu ledo kiirtooti.

12Kuni meenti alba Kiristoosira eino qaale diige, uminsa aana hanqo abbi'ranno.

13Qoleno, loosiweelo hee'ra roso assi'ranno; looso cee'ma calla ikkikkinni minunni mine sa"anni manna he'manno. Manni coyi giddora eanni, hasiisannokkire coyi'rannore ikkanno.

14Kunnira, aju meenti mine assi're, ooso ile, minensano amanyootunni amadanno gede amaaleemmo. Hatto ikkiro, baarigaaru haa're su'ma hunannore diafi'ranno.

15Kunni albaannino mitu mitu galte shii'rino meenti Sheexaanu hoode ha're ammanate doogo aaninni wirri yiino.

16Mitte ammanaancho mine galte shii'rino meenti hee'riro, beetekiristaanete duha ikkannokki gede ise kaa'litonsana. Hatto ikkiro, beetekiristaane horonta kaa'lannoha afi'rinokkire galte shii'rino meento kaa'la dandiitanno.

17Beetekiristaane garunni gashshitannorira, roorenka qaale kultanninna rosiissanni daafurtanno cimeeyyera erote ayirrinyi hasiisannonsa.

18Qullaawu Maxaafi, «Gide gananno hando afoo usurtooti» hattonni, «Loosannohu daafurisi guma adha hasiissannosi» yaanno.

19Lamu woy sasu manchi naqqasa hoogguro, beetekiristaanete cimeeyye bushiinshe kulleenna'ne macciishshitinoonte.

20Woloota jiilchate, cubbo loossannore mannu baalu albaanni seejji.

21Assatto coye baala manna mimmituwiinni roorsittokkinni, woy ayerano godowa hosittokkinni, tenne amaale'ya baala guutatto gede, Maganunna Yesuusi Kiristoosi doorino sokkaasine albaanni eegga yeemmohe.

22Aye aanano muddante anga aanaho wortooti. Umokki sarxuwiinni agadhi; wolootu cubbira karsantooti.

23Godowikki gajaajjo daafira, shiima woyinete xajje agi ikkinnina kunni ka'a waa calla aggooti.

24Mitu mitu manni cubbi xawoho leellanni noo daafira, albillitte daggasira noo yoo leellishanno. Wolu manni cubbi kayinni keeshshe leellanno.

25Danchu loosi xawoho no; xawe leellinokkihuno go'le digatanno.

← Chapter 4 Jump to: Chapter 6 →