1 Timothy 2

Sidamo

← Chapter 1 Jump to: Chapter 3 →

1Magano magansi'ratenninna kawajjaame heeshshonni mannu baalu daafira huuccatto, eeggonna galata shiqinshanni gede amaaleemmo.

2Magano waajjatenninna danchu amanyootinni, keerunnitanna ga'labbitte heeshsho hee'neemmo gede, mootoollatenna gashshaano baalate Magano huuccensa.

3Kuni coyi, Gatisaanchinke Maganu albaanni danchahonna hagiirsiisannoho.

4Maganu halcho, mannu baalunku gatannonna halaale afanno gedeeti.

5Maganu mittoho; mereeroho hee're Maganonna manna araarsannohuno mittoho. Isino, manna ikkinohu Yesuusa Kiristoosaati.

6Manna baala cubbuwiinni gatisate, umosi wodote sayise uyinohu isooti. Kuni coyi ikkinohu, agarroonni yanna iillitanno woyite, Maganunniha gatisate looso leellishate naqaashshete.

7Anino ammananna halaale lallawate soqqamaasinchonna rosiisaancho ikke daganniwa soqqame dayommohu kunniraati. Halaale coyi'reemmo ikkinnina dikapheemmo.

8Kunnira, addi addi darga noo labballi hanqonna gibbo agurte, qullaawa angansa iima qolte kayisse huuccitanno gede hasi'reemmo.

9Meentuno umo biifisi're, culka woy irra woy lowo woxinni hirranni imaana uddi'ratenni seesa agure, arshimmatenninna kawajjotenni seesona.

10Magano magansi'neemmo yaanno meenti dancha looso loosatenni seesona.

11Meyati ga'labbi yite hajajantanni rossona.

12Meyati ga'labbi yito; rosiissara woy labbaahu aana mookkara difajjeemmo.

13Balaxe Addaami kalaqamino; Heewani gedensaanni kalaqantino.

14Dogantinotinna Maganu hajajo diigginotino meyate; dogaminohu Addaami di"ikkino.

15Ikkollana meyati ammanatenni, baxillunninna qullaawa ikkatenni kaajjite heedhuro ooso ilatenni gattanno.

← Chapter 1 Jump to: Chapter 3 →