2 Samuel 23

Sidamo

← Chapter 22 Jump to: Chapter 24 →

1Kaaliiqi rooriidiha assinohu, Yaiqoobi Magani moote ikkanno gede buurinohu, Israeelete manni mereero dancha faarso faarsannohu Isseyi beetti Daawiti coyi'rinohu goofimarchu coyi konneeti:

2Kaaliiqi Ayyaani ane widoonni hige coyi'rino; qaalisino afii'yara no.

3Israeelete Magani coyi'rinoe; Israeelete goli anera, «Ane Magano waajjatenni taashshe gashshanno moote,

4gomichu nookki arrishsho soodote gedeeho; baatto hayisso fushshitanno gede assitara, xeenu gedensaanni fultanno arrishsho gedeeho» yiie.

5«Ane ledo hegere gondooro eino daafira, ba"annokki namoomanna, soorrantannokki hexxo aannoe. Halaalinta Kaaliiqi sircho'ya kunni garinni maassi'ranno; tini anera halcho'yaati; qeelle'yano iseeti; Maganuno addinta konne coye wonshannoe.

6Bushuullu kayinni, tunge agurroonni uti gedeereeti; ayino mulla anganni diamadannoreeti.

7Konne uta amadannohu, siwiilu uduunninna amaxxote daabbinni gamba asse, hakko hee'reennanni co'o asse giiranno» yii.

8Maccare ikkitinorihu Daawiti olanto su'mi kunninni aane no: Umihu, Tahikimi ilama ikkinohu Yosheebi-Bashebeeti. Isi, sasunku qara macca gaaddora albisaho. Kuni manchi olunniwa amaxxotenni 800 manna mitte hige shiino.

9Kuri sasunku wolqaataammi giddonni layinkihu Ahoohi ga'rehu Doodo beetti Aliaazaariiti. Mitto barra isinna Daawiti olaho qixxaabbe noo Filisxeemoota qarrissino. Israeelete manni badhe hige xooqita,

10Aliaazaari kayinni uurre angasi bisete ledo qa'mita geeshsha Filisxeeme shee gudi. Hakko barra Kaaliiqi lowo qeelle abbino. Olu uurrihu gedensaanni Israeelete manni xooqinowiinni galagale hige reeshshu aaninni olu uduunne mulqi'ri.

11Sasunku wolqaataammi giddonni sayikkihu kayinni Harari ga'rehu maccahu Aage beetti Saamiiti. Mitto barra Filisxeemootu missira winxanni baattora Leehi yinanniwa gamba yite no; Israeelete mannino Filisxeemete albinni xooqi.

12Saami kayinni hakko uurre, Filisxeemete ledo olami; hakko barrano Kaaliiqi lowo qeelle abbino.

13Gide gamba assinanni yanna rakke heedheenna 30 wolqaataammi giddonni 3 Daawiti noowa Adulaami Goda dirritu. Hatte yannara, Filisxeemete olanto giddonni shiimu manni Refayimi Lagichira ofolle no.

14Daawiti qiinshoonni gaari aana hee'reenna, Filisxeemete olanto giddonni mitte gaamo Beeteliheme amaddu.

15Daawiti gobbasi sinsinnaawe, «Beetelihemete huxxi waalchi mule noo buichonni waa abbe hayikkisannoeha maminni afi'ro ikka?» yii.

16Kunnira sasunku maccari wolqaataammu olanto Filisxeemete ollaa tayisse sa'e buichote giddonni waa hinkiilte Daawitira abbitusi; isi kayinni agara dihasi'rino. Ikkollana Kaaliiqira kakkalo ikkanno gede dunihu gedensaanni,

17«Kaaliiqa'ya, konne waa agammora didandoommo; anera konne waa aga, lubbonsa hunte hadhino wolqaataammi mundee agate yaate» yee waa aga giwi. Kunni aleenni ikkino coyi kuri sasunku bareedda assitinoho.

18Tseruya iltino ooso Iyoaabiitinna Abisaati. Abisa kuri sajjuunku olantora roorrichaho. Isino urdetenni 300 manni ledo olame baalanka shee gude, hakkuri sasunku wolqaataammi gede maccaha ikki.

19Sajjuunku giddo lowo geeshsha maccaha ikkino daafira insara roorricha ikkino. Ikkollana, hakkuri sasu wolqaataammi geeshsha di"ikkino.

20Wolu bareedi qole, Qabitsieeli gobbahu Yoodahe beetti Beenayaati. Isino egennantinore 2 Moaabi olanto calla ikkikkinni, bullaame kaade dirritanni heedheenna fule balete giddora e"e, doobbiicho shee bareendesi leellishino.

21Qoleno mittu Gibitsete manchi amaxxo anga adhe hee'reennanni, Beenaya kayinni siqqo amaxxe mare angasinni amaxxo qiqqishe haa're mancho hatte amaxxonni qase shiino.

22Wolootu sasunku wolqaataammi assitinonte gede Beenaya leellishino bareende tenneeti.

23Isi sajjuunku wolqaataammi giddo egennaminoha ikkirono, hakkuri sasunku bareedi geeshsha di"ikkino. Daawitino iso agaraanosira roorricha asse wodhi.

← Chapter 22 Jump to: Chapter 24 →