bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sidamo
/
Sidamo
/
2 Samuel 24
2 Samuel 24
Sidamo
← Chapter 23
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
1
Kaaliiqi galagale Israeelete mannira hanqino daafira, Daawiti kakkayise qarru iillannonsa gede, «Marte Israeelenna Yihudu manna kiiri» yii.
2
Kunnira Daawiti olu roorrichira Iyoaabira, «Ledokki noore olu hajajaano haadhe marte gobbate qaccenni qaccete geeshsha baalanta ga're iillite, Israeelete manni mageeshsha ikkinoro afate hasi'roommo daafira kiiri» yiisi.
3
Iyoaabi kayinni, «Moote'ya, Maganikki Kaaliiqi Israeelete olanto kunninni xibbe ero assanna la"atto gede dirokki seedisohe. Ikkollana moote'ya ballo, konne coye mayira heditto?» yii.
4
Moote kayinni Iyoaabiranna olantote hajajaanora yiinore wonshitanno gede qarrisinonsa daafira, Israeelete manna kiirtara albisinni fulte hadhu.
5
Yordaanoosi Waa fulte Gaadi gobbara noo lagichi mereero Aroeeri Katamira wodiidoonni shiima yanna keeshshitu. Hakkiinni ka'e, aliyye widoonni higge Yaizeeri Katama martu.
6
Qolteno Geleaadinna Hitootu heedhannowa Qaadesi marte iillitu. Hakkiinnino Daani gaangaabbe Sidoona iillitu.
7
Hakkiichinnino ka'e wodiidi ragaanni qiinshoonniha Xiroosi Katamanna qolteno Hiwootunna Kana"aanootu katamma baala iillitu. Goofimarchohono Yihudaho wodiidoonni Bersaabehi martu.
8
Kunni garinni gobba baala doyituhu gedensaanni, honsu aganinna lemuu barrinni Yerusaalame higgu.
9
Iyoaabi Israeelete 800,000, Yihudaho 500,000 ola dandaanno manni noota mootete kuli.
10
Daawiti kayinni mannu kiiro afihu gedensaanni wodanunni yaade Magano, «Ani konne coye assa'yanni lowo cubbo loosoommo. Magano'ya ballo, ani borojjichikki assoommoha konne gowwimmate coye agurattoe gede huucci'reemmohe» yii.
11
Kaaliiqi Daawiti himanaancho Gaadi soye, «Marte Daawiti, ‹Kuneeti doodhattora 3 coye eemmohena mitto doodhi; anino ati doodhootto coye calla wonsheemmohe› yiino» yite kulisi yii. Daawiti goxinowiinni soodo gute kae hee'reenna,
13
Gaadi daye Kaaliiqi yiinosire kulanni, «Gobbakkira 3 diri hude ubbannotanso, woy 3 agana diinu shorrannohetanso, woy 3 barri qoomami dirrannota doodhatto? Hanni wodanikkinni malte ka'e, Kaaliiqira kuleemmo gede doodhoottoha kulie» yiisi.
14
Daawitino Gaadira, «Kuneeti ani addinta shetoommo. Ikkollana mannu angara eammontenni Kaaliiqi maarannoha ikkino daafira isi qorichishiero woyyate» yee dawari.
15
Kunnira Kaaliiqi hakko barrinni kayise hedino yanna wo'mita geeshsha Israeelete baattora lowo dhibba dirrisi. Gobbate qaccenni qaccete geeshsha hee'rannohu 70,000 Israeelete manni reyi.
16
Kaaliiqi Sokkaasinchi Yerusaalame hunara angasi diriirsi yannara, Kaaliiqi mannaho abbino qoricha uurrisara hede, manna gudanni noo sokkaasincho, «Xaate ikkinona aguri» yii. Hatte yannara sokkaasinchu Yabuusichu Oorina ayiddummera uurre no.
17
Daawitino manna qoomanni noo sokkaasincho afe Kaaliiqa, «Sao anete; so'roommohuno aneeti. Kuni manni beebbaataamoho. Hanqikki kunni manni aana dirrantenni anenna mini'ya manni aana dirrona» yii.
18
Hakko barra himanaanchu Gaadi Daawitiwa mare, «Marte Yabuusichu Oorina ayiddummera Kaaliiqira kakkalote darga seekki» yiisi.
19
Daawitino Kaaliiqi yiinota macciishshe himanaanchu Gaadi kulinosi gede assi.
20
Oorina eela qole la"anni hee'reenna moote Daawitinna ledosi gashshaano isiwa higge dagganna afi. Isino heeshshi yee albunni baatto kise Daawiti keere haa'ri.
21
Oorina qole, «Mooticha'ya, kawiira mayira dayitto?» yee xa'misi. Daawitino, «Kaaliiqi konne qoomama mannu aaninni hoolanno gede ayiddummekki hidhe Kaaliiqira kakkalote darga seekkammoraati» yiisi.
22
Oorinano Daawitira, «Mooticha'ya, ayiddumme adhite hedootto garinni Kaaliiqira kakkalo shiqishi. Shilqinshanni kakkalora kune boottano no; giirateno qambarunna gide gannanni kuttano no.
23
Maganikki Kaaliiqi kakkalokki adhannohe gede halchanni konne baala ate mootichi'yara oommo» yii.
24
Moote Daawiti Oorinara, «Dee'ni, hatto di"ikkanno! Baatummohero ikkinnina calla diadheemmo. Calla adhoommore Kaaliiqira kakkalo asse dishiqisheemmo» yii. Hakkunni gedensaanni, Daawiti Oorina ayiddummenna boottasi 50 kinchu birrinni hidhi.
25
Hakkiicho Kaaliiqira kakkalote darga seekke shilqonnitanna mittimmate kakkalo shiqishi. Kaaliiqino Daawiti huuccatto macciishshe, Israeelete manni aana dirrisino qoomama uurrisi.
← Chapter 23
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24