Deuteronomy 7

Sidamo

← Chapter 6 Jump to: Chapter 8 →

1«Magani'ne Kaaliiqi martine ragidhinanni baatto massanno'nenna haammata ki'ne roortannota jajjabbanna wolqaataamma 7 daga: Hitoota, Gergesoota, Amooraawoota, Kana"aanoota, Ferizoota, Hiwootanna Iyaabuusoota albi'nenni shorranno yannara,

2Magani'ne Kaaliiqi anga'nera sayise aanno'ne yannaranna ki'neno insa qeeltinanni yannara, baalanka co'o assitine hunne. Insa ledo namoontinoonte; marartinoontensa.

3Insa ledo adhantinoonte. Ooso'ne seennensa adhitoonke; seenni'neno oosonsara assi'roonke.

4Kunino, ooso'ne ane hoode hadhannota hoolte wole maganna magansidhanno gede assitannohuranna hakkunninni kainohunni Kaaliiqi hanqi aana'ne buwe, rahe hunanno'nekki gedeeti.

5Kunnira, assa hasiissanno'neri kunninni aane nooho: Kakka'litanno darga diigge; magansidhanno sooddiyye hiiqqaqqe. Asheera yinanni magano mokkollo murmurre; misillaseno cancanne.

6Ki'ne Israeele, Magani'ne Kaaliiqira qullaawa gosa ikkitinoonnihura, umisi woxe ikkitinanni gede baattote aana hee'ranno manni baalu giddonni ki'ne doodhino'ne.

7«Kaaliiqi ki'ne baxino'nehunna doodhino'nehu wole gosanni kiiro roortineenna di"ikkino. Kiiro'ne gosa baalatewiinni lowo geeshsha ajjinote.

8Ikkollana, ki'ne jawaata angasinni fushshino'nehu, borojjimmatenninna Gibitsete moote Feriooni anganni wodino'nehu, Kaaliiqi ki'ne baxino'nehuraatinna annuwa'nera xaarino xaaro agarinohuraati.

9Kunnira, Magani'ne Kaaliiqi baxxannosiriranna hajajosi agadhitannorira gondoorosinna bagamannokki baxillesi kume ilama geeshsha agarannoha ikkinota habbinoonte. Isi ammanamino Maganooti.

10Gibbannosire kayinni qorichishanno; gibbannosire shee gudanno.

11«Kunnira techo barra eemmo'neta hajajosi, wogasinna seerasi seekkitine agadhe.

12«Konne seera macciishshitinironna seekkitine agadhitiniro, Magani'ne Kaaliiqi annuwa'nera xaari xaaro garinni xaano gondoorosinna bagamannokki baxillesi disoorranno.

13Kaaliiqi baxanno'ne; maassi'ranno'ne; batisanno'ne. Annuwa'nera aara xaarino baatto godowi'ne guma, baatto'ne laalcho, gide'ne, haaro woyinete xajje'nenna zayite'ne, lalo'nenna siitta'ne, ge'reewo'ne, me"e'nenna wilii'le'ne maassi'ranno.

14Gosa baalantenni roore ki'ne maassantinanni. Manni'ne giddo ilannokkihu saada'ne giddo qalannokkihu dihee'ranno.

15Kaaliiqi bushu dhibbi baalunkunni agaranno'ne. Gibitsete gobbara heedhine affinoonnihu hakku lowo geeshsha shetisanno dhibbi ki'ne dikisanno'ne. Gibbanno'neri aana kayinni dirranno.

16Magani'ne Kaaliiqi anga'nera sayise aanno'ne gosa baala gatissinikkinni shiiyye; marartinoonte. Woshshaadote gede ikkite amaddanno'nena, magannansa magansidhinoonte.

17«‹Tini daga ninke roortinona hiitto assine hunneemmo?› yitine wodani'nenni yaaddinoonte.

18Insa waajjitinoonte. Magani'ne Kaaliiqi Feriooninna Gibitsootu aana assinore baala qaagge.

19Ille'nenni la'inoonninte gede lowo geeshsha waajjishanno qoomaminninna dhaggete malaatinni Magani'ne Kaaliiqi jawaata anganninna wolqaataame cigilenni fushshino'ne. Magani'ne Kaaliiqi tenne dagano hatto asse hunanno.

20Magani'ne Kaaliiqi ki'newiinni gatte maaxantinorira harridiida soyanno.

21Mereero'ne noohu Magani'ne Kaaliiqi jawanna waajjishanno Magano ikkino daafira insa waajjitinoonte.

22Magani'ne Kaaliiqi tenne gosa shiimu shiimunni albi'nenni hoolanno. Dubbu moyichi bati'ranno daafira, baalanka mitte higgine huntinara difajjinanni'ne.

23Magani'ne Kaaliiqi kayinni diinna'ne anga'nera sayise ee darante ba'anno gede assanno.

24Mootoollansa anga'nera sayise aanno; baattote aaninni su'minsa hawamanno. Insa huntina geeshsha, ittisa'nera dandaannohu mittuno dihee'ranno.

25Magannansa misilla giirre. Misillate aana worroonni birranna culka halchitinoonte; adhitinoonte. Adhitiniro kayinni, Magani'ne Kaaliiqi konne coye lowo geeshsha giwanno daafira, woshshaado ikkanno'ne.

26Giwisanno coye mini'nera woy umi'nera abbidhinoonte. Hatto assitiniro, ki'neno hakkuri gede baote gaamantinannina, horonta makkidhine gibbe. Kuri Maganu giwinnoreeti.

← Chapter 6 Jump to: Chapter 8 →