Hosea 10

Sidamo

← Chapter 9 Jump to: Chapter 11 →

1Israeelete manni lowo hunduruurro amaddino haqqicho woyinennite gedeeho. Qiniitu bati'rinsa deerrinni, batinye kakkalote darga seekkidhino. Baattonsa guma uyite duroonsitunsa deerrinni, kaphu magannara kumbuullannita kinchu misilla seesiisse seekkidhu.

2Wodaninsara xagarro wo'mitino; assitino saono amaddannonsa. Kaaliiqi, kakka'litanno darga baalanka hunanno. Kaphu magannara kumbuultara seekkidhino sooddiyyeno hiiqqaqqanno.

3Mannuno, «Kaaliiqa waajja agurroommo daafira gashshannonke moote hoongoommo; moote hee'roommenkerono ma"assannonkehu baino?» yaanno.

4Gumiweelo ikkino coye coyidhanno; kaphu xaaronni gondooro e'anno. Kunninni kainohunni, halaale dawisa loosu giddo mu'rinohu harfaamu ishini gede ikkitanno.

5Samaariyu katamira hee'ranno manni Beetiaweeni nooha siitu suudinni seekkinoonniha kaphu magano lowo geeshsha waajjanno. Ayirrinyisi mulqaminohura mannisi wi'lanno. Kaphu magani qeesootino, «Woo» yite wi'litanno.

6Kaphu magano Asoori gobba massineenna jawu mootera afansha ikke shiqanno. Busha amaale ha'runsatenni kainohunni Israeele saalunna shollinyu amadannonsa.

7Samaariyu moote wayi aani hambii gede ikke gatanno.

8Israeelete manni Aweeni yinanni katamira kaphu magano magansi'ranni cubbo loosanno gaarra diigantanno; kakkalonsa dargi aanano utunna kokko'lu fulanno. Hattenne yannara mannu ilaalla, «Maaxxenke» gaarrano, «Gollenke» yaanno.

9Kaaliiqi, «Israeelete manni Gibia katamira cubbo loosi yannanni kayise techo geeshsha, ane dadillisa diagurino. Kunnira Gibia olu ka"annonsa.

10Kore haxawarroota qorichishate murci're kaoommo. Daga baalanti gamba yite insa aana diinoomunni ka'anno. Erote cubbinsa daafirano lowo qorichi iillannonsa.

11«Israeeli qajeelino middichi gedeeho; ikkeennano biiffino haxosi aana qambara duhisiiseemmosi. Kunni garinni Yihudu hawuuranno; Israeeli waaxame baatto shaqqishanno.

12Anino, ‹Kunni ka'a galo baatto hawuurre; keeraanchimma umi'nera wixidhe; anera ammanantinoonnire ikka'nenni daanno atoote gamba assidhinannina. Kuneeti ane Kaaliiqi'newa higginanni yanna xaati! Anino daye atoote xeenimma dirriseemmo'ne› yoommo.

13Ki'ne kayinni bunshe wixidhine cubbo mixxitinoonni; kaphi'ne abbino guma ittinoonni. «Umi'ne wolqanna ejjeetto'ne batinye addaxxitinoonni daafira,

14manni'ne aana jawaatu oli daanno; qiisho'ne baalanti diigantanno. Kunino Shalamaani yinanni moote Beeti-Arbeeli yinanni katama olunni diigi gedenna amuuwa oosonsa ledo baattote aana cancane gudi yanna gede ikkanno.

15Beeteli manna! Loossinoonnihu cubbi'ne batinyinni kainohunni ki'nerano hattoo bao iillitanno'ne. Olu ka"anni hee'reennanni hakkawoyintenni Israeelete moote horonta ba"anno» yaanno.

← Chapter 9 Jump to: Chapter 11 →