Hosea 2

Sidamo

← Chapter 1 Jump to: Chapter 3 →

1Kunni daafira labballo roduuwa'ne Israeeloota, Aami yiiyye. Meya roduuwa'ne, Ruhaama yitine woshshensa.

2Ooso'ya ballo, kunni ka'a ama'ne galte'ya ikka hooggurono, anino ayiddaannase ikka hoogummorono, «Eeggatena foorakkinna baashaawakki aguri» yitine seejjese.

3Higa hoogguro kayinni, imaanase mulqe ilantu barri gede mullicho asse agureemmose. Moola baatto gede asseemmose; wayi goo'rono shitannose.

4Saalu nookkiti foora mancho iltinore ikkitino daafira, oososeno dimarareemmo.

5Amansa foora ikkitino daafira, insa shollaataamu garinni godobbino. Konne coye assitinohuno, «Ella'yawa ha'reemma; insano sagalenna waa, ge'reewu ordanninna shaalado shalonni gannoonni imaana, ejersu zayitenna woyinete xajje uyitannoereeti» yitino daafiraati.

6Kunni daafira doogose utunni cufeemmo. Fultanno furcho afidhannokki gede gangaawase kinchunni huxxeemmo.

7Ellase hoode doddanno; kayinnilla di"iillitanno. Jawaatte hasidhannonsa; kayinnilla diafidhanno. Hakkunni gedensaanni, «Xaa heeshshonni albiti woyyitannoe. Kunni daafira albi ayiddaanni'yawa higeemma» yitanno.

8Ise gide, woyinete xajje, ejersu zayite oommosehu ane ikkoommota diwodanchitino. Ani batise oommose birranna culka Ba"aalira uyitino.

9Kunni daafira gide gamba assinanni woyite oommoseha gidenna woyinete xajje qole angasenni adheemmo. Uddidhara oommota ge'reewu ordanninna shaalado shalonni gannoonni uddano mulqe hooleemmose.

10Ellase albaanni mullicho asse agureemmose; anga'yanni gatisannosehu dino.

11Hagiirrise ayyaanna baala, Fooliishshote Barra, Aganu Leellanno Ayyaananna wole ayyaannase uurriseemmo. Amma'note xaadiseno hee'rannokki gede asseemmo.

12Ellasera bisose uyite afidhinota woyinete laalosenna balasete haqqese buqqise huneemmo. Woyinenna balasete haqqe fultannowa hoxxete soorre, moyichu galannota asseemmo.

13Ba"aalira hixaana giirtara yite, irrase wodhite ellase hoode hadhara ane agurtino daafira qorichisheemmose. Kaaliiqi konne coye coyi'rino.

14Kunnira xaano halallitte gobba haa're masseemmose; hakkiichono baxillu qaalinni dogisiiseemmose.

15Albiha woyinete kaashsho qoleemmose. Qarru Lagichino Hexxote Waalcho ikkannose gede asseemmo. Hakkiichono Gibitsete gobbanni fultu waro seennimmate yannara baxxue garinni qolte baxxannoe.

16Qolteno, Ayiddaanna'ya yitannoeta ikkinnina kunni ka'a, Ba"aali yite diwoshshitannoe.

17Kunni ka'a Ba"aali yinanni su'ma gantara wore diagureemmo; higgeno qaaggannokki gede asseemmo.

18Hatte yannara manni'ya ledo gondooro e"eemmo. Moyichunna allaatte manna'ya gawajjitannokki gede asseemmo. Hattonni bagado baala baattote aaninni hooleemmo. Biseno maxxuno horonta dihee'ranno. Manni'ya harshammi yee keerunni hee'ranno gede asseemmo.

19Israeele, ani ayiddaama'ya assi'reemmohe; halaalaanchonna ammanamoommoha ikkeemmohe. Bagamannokki baxillinni baxeemmohe; hegerera galte'ya assi'reemmohe.

20Gondooro'yano agare galte'ya assi'reemmohe; atino ani Kaaliiqa ikkoommota afatta.

21Hatte yannara manni'ya Israeelete huuccatto macciishsheemmo; xeenano baattote dirranno gede asseemmo; baattono gide, woyinennitanna ejersu laalo aatenni, Iyiziraeelira dawaro qoltanno.

23Manna'yano baattote aana wixeemmo; duroo'mitanno gedeno asseemmonsa; «Maaro nookkireeti» yinoonnire maareemmonsa. «Manna'ya di"ikkitinoonni» yinoonnire, manna'yaati yeemmonsa. Insano, «Ati Maganonkeeti» yitannoe.

← Chapter 1 Jump to: Chapter 3 →