Hosea 8

Sidamo

← Chapter 7 Jump to: Chapter 9 →

1Kaaliiqi, «Manni'ya gondooro'ya diigino; hajajo'ya hunino. Kunnira, diinu manni'yara allamurchimma qoqqobbisanni noo daafira, qorophishiishshaho buudu xurumba ufuuffe!

2Insano, ‹Maganonke ballo! Ninke Israeele ate egenninoommo› yitanni ane widira higge raartanno.

3Israeelete manni kayinni dancha coye giwanno daafira diinu shorrannonsa.

4«Ani yuummokkinni moote moohisidhino; ane xa'midhukkinni gashshaano doodhitino. Birrinsanninna culkinsanni uminsara ba"ate ikkitannota kaphu maganna seekkidhino.

5Samaariyu manna! Siitu suudinni seekkinoonnita kaphu maganna'ne shagaggi're giwoommo. Hanqi'ya ki'ne aana giirate gede buwanno. Cubbi'nenni keeraabbinannikkihu mamooti geeshshaati?

6Insa Israeele di"ikkitino? Kuni siitu suudinni seekkinoonnihu kaphu magani makaa'lannonsa? Ogeessu angasinni seekkinoha ikkino daafira, magano ikkara didandaanno. Kuni, Samaariyu manni siitu suudinni seekki'rino magani, hiiqqaqqame uwanno.

7Insa bubbe wixidhe hombobolatte mixxitanno; gideho gumu dihee'rannosi. Gumu hee'riro nafa allaggichu itanno.

8Israeelete manni dagate mereero egemmamino daafira, hiiqqamino uduunnichi gede tidhinokkiha ikkino.

9Baandeelannohu gobba harrichi gede mullawa raataabbanni Asoori gobba hadhino. Ha'litannonsa gede dagate woxe baatte eegantanno.

10Dagate woxe baaxxite eeganturono, mitteenni gamba asse qorichisheemmonsa. Asoori mootenna roorrootu kadde gashshitannonsa yannara, shettote batinyinni kainohunni raartanno.

11«Israeelete manni cubbo agursiisi'rate, batinye kakkalote darga seekki'rino. Ikkollana kakkalote darguwa batidhu deerrinni cubbinsa lexxino.

12Ani insara seera'yanna hajajo'ya borreesse oommonsa. Insa kayinni wosinchu coyi gede assite kiirte adha gibbino.

13Insa anera kakkalo shiqishshanno; kakkalote maalano ittanno. Ani kayinni insa kakkalonni dihagiidheemmo. Saonsa kiireemmo; cubbinsa daafira qorichisheemmonsa; galagalte Gibitse hadhanno gede asseemmonsa.

14«Israeelete manni uminsara jajjabba mootete minna mi'nino. Ane Kalaqaanchonsa kayinni hawino. Yihudu mannino haammata qiishote katamma mi'nino. Ikkollana katammansanna qiishonsa ittanno giira soyemmo» yii.

← Chapter 7 Jump to: Chapter 9 →