Hosea 12

Sidamo

← Chapter 11 Jump to: Chapter 13 →

1«Israeelete manni barra wo'ma loosanno loosi, bubbete gede amadamannokki gumiweelooti; qoleno soojjaatinni dagganno hombobolatte gede hunannoho. Xagarronna haxawarrimma mereeronsa batidhino; hakkunni ka'aannino Asoori ledo gondooro e'ino; zayitensano Gibitse soqqitanno» yii.

2Kaaliiqira Yihudu manna abbooshshi'ranno coyi noosi. Yaiqoobi mannano qaafonsa garinni qorichishanno. Assitinohu bushu loosinsa deerrinni waagansa aanno.

3Albihu anninsa Yaiqoobi amasi godowi giddo hee're lakkichu rodiisi ginde amadino. Lophihu gedensaannino Maganu ledo sharramino.

4Sokkaasinchu ledono sharrame qeelino; baxannosi gedeno wi'le huucci'rino. Wole yannarano Maganu ledo Beeteli xaaddeenna isi widoonni qole ninke ledo hasaawino.

5Ledonke hasaawihu Olantote Magani Kaaliiqi, su'misi Kaaliiqaati.

6Kunnira ki'ne Yaiqoobi sirchi Magani'ne kaa'lo hexxe; isiwano higge. Baxillenna halaalaancho yoo duudhine amadde. Agurtinikkinni Magano cincatenni agadhe.

7Kaaliiqi, «Israeelete manni Kana"aanootu gede hexxinannikkiha ikkino; kaphu keenaasinchinni manna doganno.

8Insa, ‹Ninke dureeyye ikkinoommo; lowo jirono gamba assi'noommo. Duroo'mitinohu doogimaletenniiti yee sao aananke afannohu dino› yitanno.

9Gibitsete gobbanni massage fushshummo'nehu kayinni ani Magani'ne Kaaliiqaati. Daasu Ayyaana ayirrinsanni yannara dukkanaho heedhininte gede, galagaltine higgine dukkanaho heedhinanni gede asseemmo'ne.

10«Balaxe himanaanote afiinni coyi'roommo; lowo ajuujano leellishoommo. Himanaanote widoonni qole masalsanni lowo qorophishiishsha oommo.

11Kuni baalu ikke hee'reennanni Geleaadi gobbara kaphu magannara kumbuultanno. Kaphu magannara kumbuultannori kayinni ba'anno. Galgalaho woraamma kakkalote shiqishshanno. Kakka'litanno darguwa kayinni hiiqqaqqante loosu mereero kinnate duuno ikkite gattanno» yii.

12Albi anninke Yaiqoobi Mesiphexoomiya yinanni gobba xooqe ha'rino. Hakkiicho galte afi'rara yee ge'reewu allaalaancho ikke soqqamino.

13Kaaliiqi soyino himanaanchi widoonni qole Israeelete manna Gibitsetenni massage fushshino. Hakkunni himanaanchi widoonni qoleno towatinonsa.

14Ikkollana Israeelete manni Kaaliiqa lowo geeshsha hanqisino. Assitino saorano reyotenni qorichishannonsa; su'masi xonsiissinorirano yoo yaanno.

← Chapter 11 Jump to: Chapter 13 →