Hosea 11

Sidamo

← Chapter 10 Jump to: Chapter 12 →

1Kaaliiqi, «Israeele qaaqqimma noo yannara baxoommose. Baxeemmoha beetto'ya, Gibitsetenni fulanno gede woshshoommosi.

2Kayinnilla manna'ya Israeele, anewa gamba yaanno gede woshshummo deerrinni, roorenka anewiinni fafino. Ba"aalira kakkalo shiqishatenninna, misillasirano hixaana giira diagurtino.

3Angansa amade, lekkatenni qaaffanno gede rosiisoommonsahu aneeti. Insa kayinni ani towateemmonsata diaffino.

4Shaqqillunninna lowo baxillinni, anewa gamba assoommonsa. Qambara haxonsa aaninni hoole, ani umi'ya heeshshi yee itisoommonsa.

5«Insa kayinni anewa gamba yaa gibbinohura galagalte Gibitse higganno. Asoori moote anga galtannoreno ikkitanno.

6Katammansa diinu bagadunni gawajjanno; katammansa cufannano hiiqqaqqanno; busha amalensano doonsanno.

7Manni'ya anewiinni fafate murici'rino daafira, kadamate qambara hogombeenna iima hige raaranno. Ikkeennano hakkonne qambara haxonsa aaninni kayise hoolansara ayino didandaanno.

8«Israeele! Ate hiitto asse agureemmohe? Hiitto asseno sayise eemmohe? Adaamanna Tseboyimi assummo gede, hiitto huneemmohe? Ate lowo geeshsha baxeemmohe daafira, konne baala assammora wodani'ya diaannoe.

9Kunnira, hanqi'ya qoomama diabbeemmo; layinkimeeshsho Israeele dihuneemmo. Hatto asseemmokkihu, ani Maganoho ikkinnina manna ikkoommokki daafiraati. Qullaawu ani ki'ne giddo hee'reemmo; tenne ki'newa hanqi'yanni didayemmo.

10«Ani doobbiichimma ittaneemmo yannara, manni'ya Israeele hoode'ya hadhanno; galchiminni huxidhanni anewa dagganno.

11Ceate gede Gibitsetenni, lembooli gede Asoorinni buubbanni dagganno. Galagalche mininsara qoleemmonsa. Konne coye coyi'reemmohu ani Maganinsa Kaaliiqaati» yii.

12Kaaliiqi, «Israeelete manni kaphunninna dogatenni gaangeessinoe. Yihudu ammanamoommohuranna qullaawa ikkoommohura anera maahoyye giwinoe.

← Chapter 10 Jump to: Chapter 12 →