2 Samuel 14

Sotho 1951 (BIBELE)

← Chapter 13 Jump to: Chapter 15 →

1Joaba morwa wa Tseruya a lemoga gobane pelo ya kgoši e hlologetšwe Abesalomo.

2A roma motho a ya kua Thekoa a bitša mosadi wa gona e bego e le yo bohlale, a mo laela a re: Itire motho e a nyamilego pelo, o apare diaparo tša sello; o se ke wa tlola makhura; o itire mosadi yo e lego kgale a llela mohu.

3O tsene go kgoši o bolele le yona ka go re le ka go re. Gomme Joaba a mo ruta se a tlogo se bolela.

4Mosadi wa Thekoa a tla a phuhlama a lotšha a inametše fase, a bolela le kgoši a re: Hle Kgoši, namolela!

5Kgoši ya re: O ne taba mang? Mosadi a re: Ruri, nna ke mosadi wa mohlologadi; go nna wa ka o hwile.

6Bjale nna molata wa gago ke be ke na le barwa ba babedi. Bona bao ba lwa ba le kua nageng; gomme ka ge go se monamoledi, e mongwe a itia e mongwe a mmolaya.

7Bjale šedi, moloko ka moka o ntsogetše, nna molata wa gago; ba re: Re ntšhetše mmolai eo wa ngwanabo, re lefeletše polao ya ngwanabo, re fediše moji wa bohwa. Ke gore ba rata go tima legala la ka le le šetšego, gore monna wa ka a se ke a šalelwa ke leina le ge e le lešalela mo lefaseng.

8Kgoši ya fetola ya re: Boela lapeng la gago; ke tlo ba botša se ba tlogo go dira sona.

9Bjale mosadi eo wa Thekoa a bolela le kgoši a re: Kgoši Mongaka! Molato woo o ka ba mo go nna le go moloko wešo. A o se be go kgoši le go sedulo sa gagwe.

10Kgoši ya re: Ge motho a ka go senya ka polelo, mo tliše fa go nna; mme a ka se ke a hlwa a go dira selo.

11Mosadi a re: A kgoši a ke a gopole Morena Modimo wa gagwe, gore tshenyego e se ke ya gola e eya ka molefetšamadi ge a ka bolaya morwa wa ka. Kgoši ya re: Ka bophelo bja Morena, le ntsha e tee ya moriri wa morwa wa gago e ka se wele fase.

12Mosadi a re: Ako lese nna molata wa gago ke botše wene Kgoši Mongaka taba. Kgoši ya re: Bolela!

13Mosadi a re: O reng o eleletša go dira setšhaba sa Modimo ka mokgwa woo? Ka gobane ge wena Kgoši o boletše taba tše, go bjalo ka e ke o re: O ne molato ge o sa gomiše molelekwa wa gago.

14Gobane re batho ba go hwa; re etša meetse ge a tšhologetše fase, a se ke a hlwa a gobela. Modimo ga a senye bophelo bja motho; se Modimo a se eleletšago ke gore, molelekwa a se dule a lelekilwe, a le kgole le Modimo.

15Bjale ge ke tlile ka bolela taba ye le wena Kgoši Mongaka, ke ka gobane ke tšhogile batho. Ke mo nna molata wa gago ke itšego: Ke tlo ya ke bolele le kgoši; mohlomong kgoši o tlo dira se nna molata wa gagwe ke se bolelago.

16Ka re: Kgoši e tlo kwa, mme e tlo namolela nna molata wa yona seatleng sa monna e a ratago go fediša nna le ngwana wa ka, gore bohle re tšwe mo nageng yeno ya Modimo.

17Gomme nna molata wa gago ka re: Lentšu la kgoši mongaka le tlo nkuša pelo; ka gobane wena Kgoši Mongaka o boka morongwa wa Modimo, o kwa tše di botse le tše mpe; gomme Morena Modimo wa gago o tlo ba le wena.

18Bjale kgoši ya fetola ya re: O se ke wa nkutela se ke tlogo go botšiša bjale. Mosadi a re: Kgoši Mongaka a a botšiše.

19Kgoši ya re: A ga o a lakana le Joaba mo tabeng ye ka moka? Mosadi a fetola a re: Ka bophelo bja gago, Kgoši Mongaka, ga go e a kago efogela thoko ya le letona goba ya la ntsogošo ge go bolela wene Kgoši Mongaka. Ke Joaba mohlanka wa gago e a nthomilego, ke yena a nthutilego ditaba tše ka moka.

20Joaba mohlanka wa gago o dirile ka mokgwa wo, gore taba ye e fetolwe e tle e fele. Gomme bohlale bja gago Mongaka bo etša bja morongwa wa Modimo ka go tseba tšohle tša lefaseng.

21Gomme kgoši ya bolela le Joaba ya re: Šedi ge, tše ke di dirilego; bjale yaa o goroše lesogana leo, Abesalomo.

22Joaba a napa a lotšha a inametše fase, a reta kgoši a re: Lehono nna mohlanka wa gago ke mo ke lemogilego gobane o ntebelela ka botho, Kgoši Mongaka; kgoši o dirile se nna mohlanka wa gago ke bego ke era sona.

23Joaba a tsoga a ya Gesuri; a boela Jerusalema a na le Abesalomo.

24Kgoši ya re: A a boele ngwakong wa gagwe, a se ke a tla a lebana le nna. Abesalomo a ya ngwakong wa gagwe, a se ke a bonana le kgoši.

25Gomme mo setšhabeng ka moka sa Isiraele go be go se na monna wa go ka swana le Abesalomo ka botse bja sebopego. O be a retwa gagolo. Go tloga lwaong go fihla phogong go be go se bosodi mo go yena.

26E be e re mohla a kutwa hlogo, boima bja meriri ya gagwe ya ba sekele tša makgolo a mabedi ka kelo ya mošate. O be a segwa meriri gatee ka ngwaga; a kutwa ka gobane e be e mo imela.

27Gomme Abesalomo a belegelwa barwa ba bararo le morwedi o tee, Thamara, mosetsana wa sebopego se sebotse.

28Gomme Abesalomo a dula motseng wa Jerusalema, gwa fela nywaga e mebedi a sešo a bonana le kgoši.

29Abesalomo a roma motho a bitša Joaba gore a tle a mo iše go kgoši. Joaba a gana go tla. A buša a roma la bobedi; Joaba a fela a gana go tla.

30Abesalomo a roma bahlanka ba gagwe a re: Le a bona, tšhemo yela ya Joaba e bapetšego le ya ka, e na le mabele. Yang le e tšhume ka mollo.

31Ke mo Joaba a tsogilego a tla lapeng la Abesalomo a re: Bahlanka ba gago ba reng ba fišitše mabele a ka?

32Abesalomo a fetola a re: O ko bone; ke romile motho ka go botša ka re: Tlaa o nkele go kgoši, o mpotšišetše o re: Ke tlogetšeng Gesuri ka tla mono? Go ka be go le kaone ge nka be ke sa dutše ntshe. Bjale ke rata go bona sefahlogo sa kgoši. Fela, ge go nna go sa na le molato, napa o mpolaye.

33Joaba a ya go kgoši a e anegela taba ye; a bitša Abesalomo, a tsena go kgoši, a lotšha a inametše fase pele ga kgoši. Gomme kgoši ya atla Abesalomo.

← Chapter 13 Jump to: Chapter 15 →

Recommended Reading

Commentary 2 Samuel Commentaries → Devotional 2 Samuel Devotional Guide → Get This Bible BIBELE Study Bible →