2 Samuel 15

Sotho 1951 (BIBELE)

← Chapter 14 Jump to: Chapter 16 →

1Tše di tlilego ka morago ga ditaba tšeo šedi: Abesalomo o itiretše koloi, e nago le dipitsi le banna ba masome a mahlano ba go mo eta pele.

2Le gona Abesalomo o be a fela a tsoga e sa le bošego, a ye a eme tseleng ya go ya kgorong. Ge motho a na le taba a eya kgošing go ahlolelwa, Abesalomo a mmitše a re: O wa ga kae? Yena a re: Nna mohlanka wa gago ke wa motse wa gore wa dilete tša Isiraele.

3Abesalomo a mo rere a re: O ko bone, taba ya gago ke e botse, e lokile; fela kua go kgoši o tlo hloka wa go theetša se o se bolelago.

4Abesalomo a ba a re: Ke mang a kago mpea ka ba moahlodi nageng yeno, gore mang le mang e a nago le taba, le e a nago le molato, a tle go nna ke mo ahlolele!

5Gomme ge motho a batamela a lotšha a inamile, a ntšhe seatla a mo sware a mo atle.

6Baisiraele bohle Abesalomo o ba dirile ka mokgwa woo ge ba eya kgošing go ahlolelwa; ya ba gona go utswa dipelo tša banna ba Isiraele.

7Ge go fetile nywaga e mene, Abesalomo a bolela le kgoši a re: Anke ke ye Heburone, ke phethe keno ye ke e enetšego Morena;

8gobane mola ke dutše Gesuri kua Siria, nna mohlanka wa gago ke enne keno ka re: Ge Morena a ka mpušetša Jerusalema, ke tlo mo direla.

9Kgoši ya re: Yaa o rotše pelo! Ke moka Abesalomo a tsoga a ya Heburone.

10Gomme Abesalomo o be a romile dihlodi, tša ya dileteng ka moka tša Isiraele tša re: Ge le ekwa moletšo wa diphalafala le re: Kgoši ke Abesalomo kua motseng wa Heburone!

11Yena Abesalomo a tloga a na le banna ba makgolo a mabedi; ba be ba biditšwe ba etšwa Jerusalema; ba sepela ba se ne taba, ba sa tsebe selo.

12Le gona Abesalomo o be a romile motho a bitša Ahitofele wa Gilo, letona la Dafida la motseng wa Gilo. Bjale ge Abesalomo a sa fihliša didimo, moferefere wa gola, batho ba tla ba fela ba bothelela go Abesalomo.

13Gwa tla motho a tsebiša Dafida a re: Dipelo tša Baisiraele ka moka di gomaretše Abesalomo.

14Dafida a laela bahlanka ba gagwe ba ba bego ba na nae motseng wa Jerusalema, a re: Tsogang re tšhabeng! Abesalomo re ka se mo phonyokge. Akgofang re sepeleng, a se tlo re tšhoganetša a re swara, a re wetša dikotsing ge a hula motse ka bogale bja marumo.

15Bahlanka ba kgoši ba re: Ke rena ba bahlanka ba gago; a go dirwe ka mo mong wa rena a bonago.

16Gomme kgoši ya tšwa e sepela ka dinao le bohle ba ngwakong wa kgoši; ya tlogela basadi ba lesome ba direthe gore ba šale ba leta ngwako.

17Kgoši ya tšwa e na le batho ka moka, ba sepele ka dinao, ya ema ngwakong wa mafelelo.

18Gomme bahlanka ka moka ba feta moo kgoši e emego, e le madira a mošate ka moka, le Bagathe ka moka, e le banna ba makgolo a selelago, ba ba bego ba tlile ba etšwa Gathe, ba sepela ka dinao ba eta kgoši pele.

19Kgoši ya bolela le Ithai monna wa ga Gathe ya re: Wena o elang le rena? Goma o yo dula le kgoši, ka gobane o moeng; le gona kua ga geno o rakilwe.

20O sa tšo fihla maabane; a nka fo go putlaputliša le rena? Ge e le nna ke ya mo ke yago; wena goma le batho ba ba geno; mme Morena a go dire ka botho a go botegele.

21Ithai a fetola a re: Ka bophelo bja Morena le ka bophelo bja kgoši mong wa ka, mo wena Kgoši Mongaka o tlogo ba gona, le nna mohlanka wa gago ke tlo ba gona, e ka ba go pheleng le ge e le go hweng.

22Dafida a tsebo re: Gona tlaa o sepele le rena! Ithai monna wa ga Gathe a sepela le Dafida a na le banna ba gagwe ka moka, le bana ka moka ba ba bego ba na nabo.

23Gomme naga ka moka e be e lla ka lentšu le legolo; batho ka moka ba wela tsela. Kgoši ge e sela noka ya Kidirone, ke ge batho ka moka ba etile pele ka tsela e yago lešokeng.

24Gwa napa gwa tla le Tsadoko a na le Balefi ka moka ba rwele polokelo ya kgwerano ya Modimo. Ba e bea fase; Abyathara a dira sehlabelo, setšhaba ka moka se se tšwilego motseng sa ba sa feta.

25Ke mo kgoši e boletšego le Tsadoko ya re: Polokelo ya Modimo e bušetše motseng. Ge nka buša ka hwetša mahlo a Morena a ntebeletše ka botho, gona o tlo ba a nkgomiša ka buša ka e bona, ka bona le bodulo bja yona.

26Fela, ge Morena a ka re: Ga ke go rate, gona ke nna e; a a ntire ka mo a ratago.

27Kgoši, e sa bolela le Tsadoko moperisita, ya re: Wena o Mmoni; boela motseng o rotše pelo. Ahimaatse morwa wa gago, le Jonathane morwa wa Abyathara, barwa ba babedi ba lena ba, a ba šale le lena.

28Le tsebe gore ke tlo fela ke nokologa fa molaleng wa lešoka, ke letela ditaelelo ge le ntsebiša ditaba.

29Ke moka, Tsadoko le Abyathara ba bušetša polokelo ya Modimo motseng wa Jerusalema, ba dula ntshe.

30Dafida a namela thaba ya mehlware, a tšama a lla, a ipipile sefahlogo, a sepela dinao di le fela; le batho ka moka ba ba bego ba na nae ba ipipa difahlogo ba rotoga ba lla.

31Dafida ge a botšwa gore mo moferefereng wo le Ahitofele o gwerane le Abesalomo, a rapela a re: Morena a ko dire gore keletšo ya Ahitofele e be botlatla.

32Ge Dafida a fihla serwaolong, mo go bego go rapelwa, ba napa ba gahlana le Husai wa Araki, a gagotše diaparo a itšhetše mobu hlogong.

33Dafida a mo rera a re: Ge o ka sepela le nna, o tlo nkimela.

34Fela, ge o ka boela motseng, wa bolela le Abesalomo wa re: Ke mohlanka wa gago, kgoši, bjalo ka mola ke le mohlanka wa tatago, ge o ka realo o tlo kgona go logolla maano a Ahitofele.

35O tsebe gore Tsadoko le Abyathara, baperisita bao, ba nago ntshe. Bjale ditaba ka moka tše o di kwago mošate, o di nee Tsadoko le Abyathara baperisita.

36Bona ba na le barwa ba bona ba babedi; ke Ahimaatse morwa wa Tsadoko, le Jonathane morwa wa Abyathara; ka bona o nthomele ditaba ka moka tše o di kwago.

37Ke gona Husai mogwera wa Dafida a ilego motseng; gomme le Abesalomo a tla Jerusalema.

← Chapter 14 Jump to: Chapter 16 →