2 Samuel 2

Sotho 1951 (BIBELE)

← Chapter 1 Jump to: Chapter 3 →

1Ge go fetile lebaka Dafida a botšiša Morena a re: A nka se yo dula motseng o mongwe wa Juda? Morena a re: Eya! Dafida a re: Ke tlo ya kae? Morena a re: Eya Heburone.

2Ke moka Dafida a ya a na le basadi ba babedi ba gagwe, Ahinoama wa Jeseriele, le Abigaile mosadi wa Nabala wa Karamele.

3Le banna ba a bego a na nabo a ba iša ntshe ka moka ka malapa a bona, ba aga dinakaneng tša Heburone.

4Ke mo go tlilego banna ba Juda ba bea Dafida kgoši ya ba leloko la Juda, a le gona moo. Ya re Dafida a botšwa tša banna ba Jabese motse wa la Gileada, bala ba go boloka Saulo,

5a roma batseta ba ya go bona, a re: Lena le bašegofatšwa ba Morena, ka gobane Saulo mong wa lena le mo dirile ka botho ge le mmolokile.

6Bjale Morena a a le dire ka botho le ka potego; gomme le nna ke tlo le direla tše botse, ka ge le dirile modiro wola.

7Bjale tiišang maatla le eme senna, ka gobane mong wa lena Saulo o hwile; gomme ba leloko la Juda ba mpeile kgoši.

8Abenere morwa wa Nere, e bego e le molaodi wa dira tša Saulo, yena o tlogile le Isibosethe morwa wa Saulo, a mo iša Mahanaime,

9a mo dira kgoši ya Gileada le ya Asere, le ya Jeseriele, le ya Efuraimi, le ya Benyamini, le ya Isiraele ka moka.

10Isibosethe ge a dirwa kgoši o be a na le nywaga e masome a mane; gomme o bušitše a fetša nywaga e mebedi.

11Lebaka le Dafida a le feditšego a le kgoši ya ba Juda motseng wa Heburone, ke nywaga e šupago le kgwedi tše di selelago.

12Abenere morwa wa Nere o kile a tšwa dira a na le bahlanka ba Isobosethe morwa wa Saulo, a tšwa Mahanaime a tla Gibeoni.

13Le Joaba morwa wa Tseruya a tšwa a na le bahlanka ba Dafida; ba gahlana letšheng la Gibeoni; bano ba dula mošono wa letšha; bala ba dula mošola.

14Abenere a rera Joaba a re: A go tsoge masogana a katane re lebeletše. Joaba a re: A a tsoge.

15Gomme ba tsoga, ba feta ba balwa, ba Benyamini e le ba lesome le metšo e mebedi, banna ba Isibosethe morwa wa Saulo. Le bahlanka ba Dafida ba tsoga e le ba lesome le metšo e mebedi; ba lebana ka babedibabedi.

16Ba ubarelana ka dihlogo ba hlabana ka ditšhoša mahlakoreng ba bolayana bohle. Ke ka baka leo felo fao ba go reilego leina ba re ke Molala wa Boelo, o lego kgauswi le Gibeoni.

17Ka tšatši leo tlhabano ya ba e thatathata. Abenere le banna ba Isiraele ba fenywa ke bahlanka ba Dafida.

18Barwa ba Tseruya ba ba bego ba le gona moo e be e le ba bararo, e le Joaba, le Abisai, le Asahele. Asahele yena o be a na le lebelo boka tshepe ya naga.

19Yena Asahele a kwatiša Abenere, a se fapogele thoko a hlomaretše Abenere.

20Abenere a ba a retologa a re: A ke wene Asahele? A re: Ke nna.

21Abenere a re: Fapoga o fete ka thoko, o sware e mongwe wa masogana, o ithopele ditlhamo. Asahele a gana go mo gomela.

22Abenere a buša a re: Ntlogele! E tla bang ge nka go hlaba wa kanama? A ke sa tlo kgona go lebanya difahlogo le Joaba mogoloago?

23Asahele a gano goma; Abenere a mo hlaba mpa ka lerumo, la tsena la hlaga ka mokokotlong; a kanama a hwela gona moo. Gomme bohle ba ba fetago ka moo Asahele a hwetšego ntshe, ba ema.

24Joaba le Abisai ba gwarihla Abenere; ge letšatši le dikela ba fihla mmotong wa Ama o lebanago le Gia, tseleng ya go ya lešokeng la Gibeoni.

25Ba ga Benyamini ba kgobokana ba na le Abenere, ya ba sehlopha setee; ba tla ba ema godimo ga mmoto o mongwe.

26Abenere a hlaboša lentšu a bolela le Joaba a re: A lerumo le tlo fela le eja le sa fetše? A ga o bone gore di yo fela ka tša sehutla? O tlo laya neng wa re batho ba gomele ba gabo bona?

27Joaba a re: Ka bophelo bja Modimo, ge o ka be o sa ka wa bolela leo, batho ba ka be ba gometše bana ba bobona ge go hlaba la bosasa.

28Joaba a letša phalafala, batho ka moka ba ema, ba lesa go rakediša Isiraele, ba se ke ba hlwa ba hlabana.

29Abenere le banna ba gagwe ba sepela bošego ka moka, ba kgaola molala, ba sela Jorodane, ba phatša molala wa Bithirone, ba boela Mahanaime.

30Joaba a gomela Abenere, a kgobela batho ka moka. Mo go bahlanka ba Dafida gwa hlokwa banna ba lesome le metšo e senyane, le Asahele.

31Bahlanka ba Dafida ba be ba bolaile ba makgolo a mararo le masome a selelago ba ba Benyamini le ba banna ba Abenere.

32Ba rwala setopo sa Asahele, ba mmoloka lebitleng la tatagwe motseng wa Betlehema. Joaba le banna ba gagwe ba lala ba sepela bošego ka moka; ge go esa ba tsena Heburone.

← Chapter 1 Jump to: Chapter 3 →