2 Samuel 4

Sotho 1951 (BIBELE)

← Chapter 3 Jump to: Chapter 5 →

1Ya na ya re ge morwa wa Saulo a ekwa gore Abenere o hwile kua Heburone, matsogo a gagwe a repha, le Baisiraele ka moka ba tšhoga.

2Gomme go be go na le banna ba babedi ba balaodi ba dikgao tša dira tša morwa wa Saulo; e mongwe leina la gagwe e be e le Baena, la e mongwe e be e le Rekaba; e be e le barwa ba Rimone wa Beerothe, selete sa ga Benyamini; ka gobane ba Beerothe ba be ba balwa le ba Benyamini.

3Ba Beerothe bona ba be ba khuugetše Githaima, le nankhono ba sa falaletše moo.

4Jonathane morwa wa Saulo o be a na le morwa e a golofetšego maoto. Mohla wola ge go kwala gore Saulo le Jonathane ba bolailwe kua Jeseriele, ke ge a na le nywaga e mehlano; mofepi wa gagwe a mo kuka a tšhaba. Bjale ge a tšea ka lebelo, ngwana yo a wa, mme ya ba go golofala. Leina la gagwe e be e le Mefibosethe.

5Barwa bala ba Rimone wa Beerothe, Rekaba la Baena, ba tla ngwakong wa Isibosethe. Letšatši le be le fiša, gomme Isibosethe o be a robetše malaong, e le mosegare o mogolo.

6Ba tsena ngwakong bjalo ka e ke ba rato tšea mabele; ba mo hlaba mpa. Gomme Rekaba le Baena monnagwe ba tšhaba.

7Ka ngwakong ba be ba tsene, ba mo hwetša a robetše phapošing; ba re go mmolaya ba mo kgaola hlogo; ba tloga le hlogo ya gagwe ba tšea ya tsela ya molala, ba lala ba sepela.

8Hlogo ya Isibosethe ba e tliša go Dafida kua Heburone, ba bolela le kgoši ba re: Še hlogo ya Isibosethe morwa wa Saulo lenaba la gago, le le bego le rato go bolaya. Se Saulo a go dirilego sona, wene mongarena, lehono Morena o go lefeleditše mo go ngwana wa gagwe.

9Dafida a fetola a bolela le Rekaba le Baena ngwanabo barwa ba Rimone wa Beerothe, a re: Ka bophelo bja Morena e a mphološitšego ditlalelong ka moka:

10Motho yola e a kilego a re: Tseba gore Saulo o hwile, a itshema mmegi wa tše botse, ke mo swere ka mmolaya kua Tsikilaga, ya ba go mo nea moputso.

11Bjale banna ba babe ba, ba bolaile monna e a lokilego, a le malaong ka ngwakong. Gomme nka lesa bjang go latiša madi a gagwe mo go lena, ka se le fediše mo lefaseng?

12Ke moka Dafida a laela masogana, a ba bolaya, a ba kgaola diatla le maoto, a ba fega hleng ga letsha la Heburone. Ge e le hlogo ya Isibosethe, yona ba e tšere ba e boloka lebitleng la Abenere gona moo Heburone.

← Chapter 3 Jump to: Chapter 5 →