2 Samuel 3

Sotho 1951 (BIBELE)

← Chapter 2 Jump to: Chapter 4 →

1Ntwa yona ye ya ge ba leloko la Saulo ba elwa le ba leloko la Dafida e feditše lebaka e le gona; Dafida a fela a tia a eya; leloko la Saulo la notlega.

2Dafida, a le motseng wa Heburone o belegetšwe bana. Morwa wa gagwe wa pele e be e le Aminone ngwana wa Ahinoama wa Jeseriele.

3Wa bobedi e be e le Kileaba ngwana wa Abigaile mosadi wa Nabala wa Karamele. Wa boraro e be e le Abesalomo ngwana wa Maaka morwedi wa Thalamai kgoši ya Gesuri.

4Wa bone e be e le Adonia ngwana wa Hagithi. Wa bohlano e be e le Sefatya ngwana wa Abitala.

5Wa go selela e be e le Jithireama ngwana wa Egela mosadi wa Dafida. Ke bona ba Dafida a ba belegetšwego a le Heburone.

6Mehleng yeo ge go lwa ntwa ya ba leloko la Saulo le ba leloko la Dafida, Abenere o be a ema setia le ba leloko la Saulo.

7Bjale go be go na le mosadi wa Saulo wa serethe, yo leina la gagwe e bego e le Ritsipa morwedi wa Aya. Gomme Isibosethe o be a boletše le Abenere a re: O reng o tsenela mosadi wa tate?

8Abenere a tuka bogale gagolo ka baka la mantšu ao a Isibosethe, a re: A lehono o ntshema hlogo ya dimpša tša Juda, mola ke gaugetše ba leloko la Saulo tatago, le ba gabobona, le bagwera ba gago, ke sa ka ka go gafela diatleng tša Dafida? A lehono o mpea molato ka baka la mosadi?

9A Modimo a dire Abenere ka gore le ka gore, ge bjale ke sa dire seo Morena a se enetšego Dafida,

10gore bogoši bo tlošwe go leloko la Saulo, gwa hlongwa sedulo sa bogoši sa Dafida mo go Isiraele le go Juda, go goma ka Dani le ka Bereseba.

11Gomme Isibosethe a šitwa go fetola Abenere le ka lentšu letee, ka gobane a mmoifa.

12Abenere a napa a roma batseta ba ya go Dafida, a ba roma ka la gagwe, a re: Naga ye ke ya mang? A re: Dira kgwerano le nna. Seatla sa ka sese, se eme nago, gore Baisiraele ka moka ke ba bušetše go wene.

13Dafida a re: Ke gabotse. Dira kgwerano le nna. Fela, ke na le selo setee se ke se tsomago go wene. Ke re: Sefahlogo sa ka o ka se ke wa se bona, ge e se ge o ka thoma wa tliša Mikala morwedi wa Saulo go nna. Ke mo o tlogo kgona wa bona sefahlogo sa ka.

14Le go Isibosethe morwa wa Saulo gwa ya batseta ba Dafida, ba re: Nnee Mikala mosadi wa ka yo ke mo nyetšego ka ditsiba tše lekgolo tša Bafilisita.

15Isibosethe a roma batseta ba ya ba mo tšea go Phalitiele morwa wa Laise.

16Gomme monna wa gagwe a sepela nae, a tšama a lla a mo šetše nthago, a ba a fihla Bahurimi. Abenere a ba a mo rera a re: Goma, o boele gae! Ya ba gona a boelago gae.

17Gomme Abenere a bolela le bagolo ba Isiraele a re: Ke kgale le rata ge Dafida a eba kgoši ya lena.

18Bjale dirang ge, ka gobane Morena o boditše Dafida a re: Setšhaba sa ka sa Isiraele ke tlo se namolela ka Dafida diatleng tša Bafilisita, le mo diatleng tša manaba a sona ka moka.

19Le ba ga Benyamini Abenere o boletše le bona ka mokgwa woo, a ba a wela tsela a ya go Dafida kua Heburone, a mo anegela ditaba tše di dumeletšwego ke setšhaba ka moka sa Isiraele le leloko la Benyamini.

20Abenere ge a tlile go Dafida kua Heburone a na le banna ba masome a mabedi, Dafida o ba diretše monyanya.

21Abenere a botša Dafida a re: Ke tlo tsoga ka yo phuthela Isiraele ka moka go wena Kgoši Mongaka, gore ba tle ba dire kgwerano le wena, gore o buše gohle mo pelo ya gago e go ratago. Dafida a laelana le Abenere, gomme a tloga a rotše pelo.

22Ya ba gona go boago bahlanka ba Dafida ba na le Joaba, ba tšo hula, ba na le dithebola tše ntši. Ba goroga Abenere a fulere, Dafida a šetše a laelane le yena, a tloga Heburone a rotše pelo.

23Bjale ge Joaba a fihlile le dira ka moka tše di bego di na nae, a botšwa gore Abenere morwa wa Nere o be a tlile go kgoši, gomme kgoši e laelane le Abenere, a tloga a rotše pelo.

24Joaba a tla go kgoši a re: O dirile bjang? Lebelela; Abenere o be a tlile go wene. Bjale ke go reng o mo lesitše a ikela?

25Abenere morwa wa Nere o a mo tseba; o be a tlile go go goga diganong, gore a tsebe mo o ratago go tšwela le mo o lebago, gore a tsebe tšohle tše o di dirago.

26Bjale Joaba ge a tloga mo go Dafida, a roma batseta ba latela Abenere, ba mo gomiša sedibeng sa Sira. Gomme Dafida o be a sa tsebe.

27Abenere ge a boetše Heburone, Joaba a mo iša thoko kgorong bjalo ka ge e ke o rata go bolela le yena thopeng. Gomme ba le fao a mo hlaba mpa a hwa, e le go lefetša madi a Asahele monnagwe.

28Dafida ge a ekwa taba ye, a re: Nna le bogoši bja ka ga ke na molato pele ga Morena ka baka la madi a Abenere morwa wa Nere, neng le neng.

29Madi ao a tlo latišwa go Joaba le go leloko la gabo. Mo lapeng la Joaba go se ke gwa hlokwa wa go tšwa maladu, le wa lephere, le wa segole, le wa go bolawa ka lerumo, le wa go hwa ka tlala.

30Joaba le Abisai ba bolaile Abenere ka mokgwa woo, e le ka ge a bolaile ngwanabo tlhabanong kua Gibeoni.

31Dafida a laela setšhaba ka moka le Joaba a re: Gagolang diaparo tša lena le apareng mekotla, le llele Abenere. Yena Dafida a ya nabo ge ba yo mmoloka.

32Ge ba boloka Abenere lebitleng gona moo Heburone, kgoši ya hlatloša lentšu ya lla e eme lebitleng; le setšhaba ka moka sa lla.

33Kgoši ya hlaba sefela sa go llela Abenere ya re: Abenere, o reng o ehwa la sewatla,

34mabogo a gago a sa ka a tlengwa, o sa bofša nao ka ditshipi? Wa fo hwa la go kgabutlwa ke senokwane. Ya ba gona setšhaba se tsošitšego sello se segolo.

35Batho ka moka ba tla go Dafida ba re a je bogobe e sa le mosegare. Dafida a ena a re: Modimo a ntire sa gore le sa gore, ge nka ja bogobe le selo se sengwe ge le sešo la dikela.

36Batho ka moka ba di bona ba thabela fao, ka mo ba bego ba kgahlwa ke tšohle tše kgoši e di dirago.

37Gomme batho ka moka, le Isiraele ka moka, ka tšatši leo ba lemogile ge taba ye ya ge Abenere morwa wa Nere a bolailwe e sa tšwe go kgoši.

38Kgoši ya bolela le bahlanka ba yona ya re: Ka kgonthe le a tseba ge lehono mo go Isiraele go bolailwe mokgoma, motho e mogolo.

39Ge e le nna bjale ke sa le e monyenyane, ke sa tšo bewa kgoši; ge e le banna ba, barwa ba Tseruya, ke ba bathata, ba a mpalela. Ke Morena e a tlogo lefetša e mobe bobe bja gagwe.

← Chapter 2 Jump to: Chapter 4 →