Amos 3

Sotho 1951 (BIBELE)

← Chapter 2 Jump to: Chapter 4 →

1Kwang lentšu la Morena le a le boletšego a era bolena, Baisiraele, lena moloko ka moka wo ke o ntšhitšego Egipita, ka re:

2Mo go meloko ya lefase ke tsebile lena fela: ke ka baka leo ge ke le sekiša melato ya lena ka moka.

3A babedi ba ka swara tsela e tee ba sa ka ba kwana?

4A tau e ka bopa mo sekgweng e sa bolaya selo? A tawana e ka rora segoleng e sa ka ya swara selo?

5Afa nonyana e ka tanywa, molaba o sa rewa? Le molaba a o ka refoga wa se tanye selo?

6Afa phalafala e ka letšwa mo motseng, batho ba se tšhoge? A kotsi e ka wela motše, Morena a sa dire selo?

7Gobane Morena Mong a bohle a ka se ke a dira selo, baboni bahlanka ba gagwe a sešo a ba botša thopa yagwe.

8Tau ya bopa, go ka se tšhoge mang? Morena Mong a bohle a bolela, a moporofeta a ka lesa go bolela?

9Goelelang nywakong ya Asidodo ya mošate, le kua Egipita nywakong ya mošate, le re: Bokanang thabeng tša Samaria, le bone mpherefere wo o befilego moo, le masetlapelo a a lego moo.

10Ga ba tsebe go dira tše bolo. -- O realo Morena. -- Nywakong ya bona ya mošate ba kgobetše thoto ya bohodu le tlhakolo.

11Ke wona molato woo ge Morena Mong a bohle a bolela a re: Lenaba šeleo thoko tšohle tša naga; le tlo thuba dibo tšago, la thopa tša nywakong ya gago ya mošate.

12Morena o re: Boka modiša ge a phonyokga a swere matshwatau, dihlako tše pedi, le ge e le ntlha ya tsebe, le Baisiraele ba Samaria ba tlo phonyokga ba swere mosamelwana wa malao le lešelana le boleta fela.

13Theetšang! Mme le di botše ba moloko wa Jakobo! -- O realo Morena Mong a bohle Modimo wa mašaba.

14Ka kgonthe, mohla ke tlogo otla Isiraele ka baka la karogo tša bona, ke tlo otla aletare ya Bethele, gwa tlo kgolwa dinaka tša yona tša wela fase.

15Ke tlo phušolanya nywako ya marega le ya lehlabula, le nywako ya naka la tlou e tlo senyakwa, le nywako e megolo e tlo thunthwa. -- O realo Morena.

← Chapter 2 Jump to: Chapter 4 →