Amos 6

Sotho 1951 (BIBELE)

← Chapter 5 Jump to: Chapter 7 →

1Kotsi e tlo wela baiketli ba Tsione, le baipoti ba thabeng ya Samaria, mahumagadi a setšhaba sa pele gare ga ditšhaba, bao ba moloko wa Isiraele ba yago go bona.

2Selelang Kaline le yo bona; le fetele Hamathi motseng o mogolo; le fologele Gathi go Bafilisita. A bolo bja bona ga bo phale bja mebušo yeno? A dinaga tša bona ga di phale naga tšeno tša lena?

3Lena ba le rego tšatši la dikotši le se kgole, mme kgauswi la tliša madulo a bošoro.

4Le dula didulo tša naka la tlou, le nama dilaong tša lena, le ja dikwana tša mehlape le mamane a nonnego.

5Le letša makope le opela tša phaku, la itshema la re le swere diletšo bjalo ka Dafida.

6Le nwa sedila ka dikgamelo, le tlola ka makhura a bohlokwa, le sa re selo ka thobego ya Josefa.

7Ke wona molato woo ge bjale le thopiwa, la ba mathopša maetišwapele; ya tlo ba gona go ripša ga masego a ba namilego dilaong.

8Morena Mong a bohle o enne ka yena ka noši; Morena Modimo wa mašaba o re: Nna ke hlaswa boikgogomošo bja Jakobo; ke hloile nywako ya bona ya bogoši; ke ngadile motse le mahumo a wona.

9Bjale tše di tlogo direga šedi: Ge ntlong e tee go šetše banna ba lesome, ba tlo hwa.

10Ge wa gabomotho a etla go kuka mohu, gore a yo fihla setoto, a botšiša wa ngwakong a re: A ga go sa le wa geno? Eo a tlo re: Galo! Mme yena a tlo re: Homola; ga se mo go kago bolwa ina la Morena!

11Tsebang gobane Morena o tlo tloga a laela, mme nywako e megolo e tlo thubja ya thunthanywa, mme nywakwana ya phušolwa.

12Lwaleng pitši a e ka kganyela, a go ka lengwa ka dipholo? Mme lena le fetotše kahlolo ya ba mpholo, kenyo ya toko ya ba go galakelwa.

13Le thabela taba tša mafela, la re: Dinaka re di hweditše ka maatla a rena.

14Bjale Morena Modimo wa mašaba o re: Ke nna e! Lena ba moloko wa Isiraele, ke le tsošetša tšhaba se se tlo go le hlakiša se le tsene ka sefata sa Hamathi sa yo goma ka noka ya lešokeng.

← Chapter 5 Jump to: Chapter 7 →