Amos 5

Sotho 1951 (BIBELE)

← Chapter 4 Jump to: Chapter 6 →

1Kwang Lentšu le la sello se ke se llelago lena ba moloko wa Isiraele.

2Kgarebe ya Isiraele e wile wa go se tlo tsoga; o digetšwe fase mo nageng ya gabo, mme go hlokwa wa go ka mo tsoša.

3Morena Mong a bohle ka gobane o boletše a re: Motse wo o tšwago dira ka sekete, o tlo šalelwa ke lekgolo; wo o tšwago ka lekgolo o tlo šalelwa ke lesome la ba moloko wa Isiraele.

4Gobane Morena o itše: Nnyakeng le phele, a era moloko wa Isiraele.

5Le se ke la nyaka tša Bethele, le se ke la ya Giligala, le se ke la fetela Bereseba; gobane Giligala go tlo thopša, mme Bethele go tlo šala go se selo.

6Nyakang Morena le phele, a se tlo palegela ba moloko wa Josefa boka mollo o tšhumago Bethele gwa hlokwa motimi.

7Hee lena baphekgolatoko ya tšwa kgalako, badigelabolofase!

8Mohlola-Selemela le Dithutlwa, Mophekgolaswiswi ya ba masa, Mofifatšamosegare ya ba bošego, Mmitšameetsealewatle a mošetša naga ka ona, ina la yena eo ke Jehofa.

9Ba maatla o ba tšhoša ka tshenyego le dibo tša tlelwa ke mašegerepe.

10Mme bona ba hloya e a ba solago mo kgorong, ba hlaswa mmolatherešo.

11Molato ke ge le katelela babotlana fase, ge le ba amoga sešubana sa mabele. Ke gona, ge le sa agile nywako ka maswika a betlilwego, le ka se ke la dula mo go yona; le ge le šemile merara e monate, le ka se nwe sedila sa yona.

12Gobane boati bja bobe bja lena nna ke bo tsebile, le bogolo bja dibe tša lena, ge le hlakiša ba lokago, le le ba tsogolekobong, mme modiidi la mo lahla mo kgorong.

13Ke ka baka leo ge wa tlhaloganyo mehleng yeno a ikhomolela, ka gobane e le lebaka le lebe.

14Latelang tše botse, le ile tše mpe, le tle le phele; gona Morena Modimo wa mašaba o tlo ba le lena ka mo le boletšego.

15Hloyang tše mpe, le rate tše botse, le eme le toko kgorong; mohlomongwe Morena Modimo wa mašaba a ka gaugela mašalela a Josefa.

16Molato ke wona woo ge Morena Modimo wa mašaba Mong a bohle a re: Mapatlelong ka moka go tlo llwa, mekgobeng ka moka ba tlo re: Joo rena joo! Molemi o biletšwa go lla, bomakgone ba go bokolotša sello ba biletšwa moo.

17Mašemong ka moka a merara go tlo llwa mohla ke feta gara gago. -- O realo Morena.

18Kotsi e tlo wela ba ba rego: A letšatši la Morena le tle! -- Gomme tšatši leo la Morena le tlo le tlela le eng? E tlo ba la leswiswi, e sego la seetša.

19E tlo ba la motšhabatau ge a gahlana le diphiri; a fihla ngwakong, a swara leboto, a longwa ke noga.

20Ka kgonthe, letšatši la Morena e tlo ba la leswiswi, e sego la seetša, la thiti e sa edišwego.

21Menyanya ya lena ke e hloile, ke e hlaswitše; diorelo tša diphuthegong tša lena ga di nnatefele.

22Ge le ntlišetša dihlabelo le dibego, ga di nkgahle; le dileboga tša lena tše nonnego ke gana go di bona.

23Lesang go ntlhodia ka mašata a dikoša tša lena; medumo ya diletšo tša lena ga ke e kwe.

24A go tšwelele toko e ele boka meetse, le bokwala a bo etše noka e sa pšhego.

25Mola le le lešokeng, ka nywaga yela e masomamane a le be le mpha didimo le dibego? Lena ba moloko wa Isiraele?

26Le be le šikere Sekuti kgoši ya lena, le Kijune pheko ya lena, naledi ya modimo wa lena wo le itiretšego wona.

27Nna bjale ke tlo le iša bothopša kua kgole, la tlo ba la feta motse wa Damaseko. -- O realo Morena yo leina la gagwe e lego Modimo wa mašaba.

← Chapter 4 Jump to: Chapter 6 →