Amos 9

Sotho 1951 (BIBELE)

← Chapter 8 Jump to:

1Ka bona Morena a eme aletareng a re: Tia hlogo ya kokwane, go šišinyege dijakwana, di robaganele godimo ga dihlogo tša bona ka moka; ba ba tlogo šala ke ba fetše ka lerumo, go se tšhabe le o tee, go se be le a phonyokgago.

2Le ge ba ka theogela kua bodulabahu, le gona kua atla sa ka se tlo ya sa ba ntšha gona. Le ge ba ka rotogela kua legodimong, ke tlo ba fološa.

3Le ge ba ka utama thabeng ya Karamele, ke tlo e fenyeka ka ba swara moo; le ge ba ka re ba efoga mahlo a ka ba sobeletše fase mawatleng, ke tlo roma noga ya ba loma gona.

4Le ge ba ka ya bothopša ba gapiwa ke manaba, le gona kua ke tlo roma rumo la ba fetša. Mahlo a ka a tlo dula a ba etše hloko, gore ke ba šulafatše, e sego go ba setša.

5Gobane Mong a bohle Morena wa mašaba ke yena yo e rego ge a kgwatha naga, e nape e tologe, gwa hlokofala bohle ba ba agilego mo go yona, ge e tlala boka noka thoko tšohle, e boele e kgwehle boka noka ya Egipita.

6Ngwako wa gagwe wa tletlolo o o agile kua legodimong, leratadima lagwe a le thekga ka lefase, yena Mmitšameetsealewatle a nošetša naga ka ona; ina la yena yo ke Jehofa.

7Lena Baisiraele, ge ke le bona, le bjalo ka Bakushe. -- O realo Morena. -- A ga nka ka ntšha Isiraele nageng ya Egipita? Mme Bafilisita ke ba ntšhitše Kafutori; Baarama ke ba ntšhitše Kiri.

8Tsebang gobane mahlo a Morena Mong a bohle a bona mmušo ge o dira dibe, gore ke o fediše lefaseng. Ge e le moloko wa Jakobo nka se o fedišetše ruri.

9Le tsebe gore ke laetše, gore mo go baditšhaba ka moka ba moloko wa Isiraele ba feferwe, bjalo ka mabele ge a feferwa ka leselo, thoro go se wele fase le e tee.

10Badiradibe bohle ba setšhaba sa ka ba tlo hwa ka lerumo; ke bona bao ba ba rego: Rena re ka se tlelwe ke dikotsi; di ka se lebane le rena.

11Mehleng yeo ke tlo tsoša mokutwana wa Dafida o wilego; dithubu tša wona ke tlo di thiba; mo go rutlologilego ke tlo buša ka o tsošološa, ka o aga bjalo ka mohlamonene.

12Gore mašalela a batho a tle a nnyake, le bantle bohle bao leina la ka le tlogo goelelwa mo go bona. -- O realo Morena. O tlo di dira.

13Le tsebe gore go tlo tla matšatši, -- o realo Morena, -- ao molemi a tlogo gahlana le mmuni, e a fotlago morara o tlo gahlana le mogašapeu; gomme dithaba di tlo tloroma mananose a morara, meboto yohle ya ba le monola.

14Mathopša a setšhaba sa ka sa Isiraele ke tlo a goroša; ba tlo tla ba tsoša marope ba dula; ba tlo tla ba šema merara, ba nwa mananose a yona; ba tlo tla ba lema mašemo, ba ja dienywa tša ona.

15Mme bona, mo nageng ya gabo ke tlo napa ke ba hloma, ba se sa tlo tomolwa gona fa nageng ya gabo ye ba e neilwego ke nna. -- O realo Morena Modimo wa gago.

← Chapter 8 Jump to: