Amos 4

Sotho 1951 (BIBELE)

← Chapter 3 Jump to: Chapter 5 →

1Kwang Lentšu le, lena dithole tša Basani, lena bapatababotla, barobabadiidi, la botša beng ba lena la re: Tlišang re nweng!

2Morena Mong a bohle o enne ka bokgethwa bjagwe, a re: Tsebang! Le tlo tlelwa ke matšatši a ba tlogo le goga ka dikgana, bana ba lena ba ba goga ka dikgwega.

3Le tlo ntšhwa ka dithubu le itše “huru”, le lahlile tša meago ya mošate. -- O realo Morena.

4Le ka no fela le ikela kua Bethele, le hlanoga le befiša dikarogo kua Giligala; le iša didimo e sa le bosasa; ge go tla tšatši la boraro la ntšha sa lesome.

5Le ka no ya le ipega ka dileboga tša dikomelo; gobane ke se le se ratago, lena Baisiraele. -- O realo Morena Mong a bohle.

6Le ge nna ke le neile meno a mašwana mo metseng ya lena yohle, le ge ke le rometše tlala malapeng a lena ohle, ga a mpoela! -- O realo Morena.

7Le gona, ka le gana le pula kgwedi tše tharo pele ga puno; o mongwe motse ka o nea pula, o mongwe ka o hlokiša; ya yo mongwe tšhemo ya koloba; ya yo mongwe ya hloka monola ya oma.

8Ba metse e mebedi e meraro ba ikgoga ba tla go motse o mongwe go nwa meetse, ba se kgodišwe. Le ge go le bjalo, ga la mpoela! -- O realo Morena.

9Ka napa ka le otla ka phori le ka megwelema; mogokong wa hlohlora mašemo a lena a mantši, le dirapa tša merara, le mego ya lena, le mehlware ya lena. Le ge go le bjalo, ga la mpoela! -- O realo Morena.

10Ka le romela dinkhu boka mola Egipita, ka fediša masogana a lena ka tšhoša, ka lesa dinko tša lena di nkgelwa ke seuta sa mešaša ya manaba. Le ge go le bjalo, ga la mpoela! -- O realo Morena.

11Ba bangwe ba lena ka ba ribegetša boka mola go phekgolwa motše wa Sodoma le Gomora ka Modimo, la etša legong le le bešotšwego sebešong. Le ge go le bjalo, ga la mpoela! -- O realo Morena.

12Molato ke wona woo, ge ke tlo dira tšeo. Bjale, ka ge ke tlo go dira tšeo, itokiše gore o lebane le nna Modimo wa gago, wena Isiraele.

13Tsebang ge, ke yena Mmopi wa dithaba, ke yena Mohlodi wa diphefo; o tsebiša motho tša pelong ya gagwe, Modiraleswiswimahuba, yo tsela ya gagwe e lego godimo ga dithaba tša lefase. Leina la gagwe ke Morena Modimo wa mašaba.

← Chapter 3 Jump to: Chapter 5 →