Amos 8

Sotho 1951 (BIBELE)

← Chapter 7 Jump to: Chapter 9 →

1Morena Mong a bohle o mpontšhitše tše dingwe; ka bona seroto se se nago le dienywa tše di futšwego.

2A re: Amosi, o bonang? Nna ka re: Ke bona seroto se se nago le dienywa tše di futšwego! Morena a re: Setšhaba sa ka sa Isiraele se fihletšwe ke lebaka la go fulwa; nka sa hlwe ke se feta.

3Mohlang woo dikoša tša mo ngwakong wa mošate di tlo fetoga dillo. -- O realo Morena Mong a bohle. -- Ditoto di tlo tlala di lahletšwe gohle go itše “tuu”.

4Kwang Lentšu leo, lena bametšabadiidi, le fedišago babotlana mo nageng.

5Ke lena ba go re: Tšatši la monyanya le tlo fela neng, re kgone go yo bapatša mabele? Sabatha e tlo fela neng, re kgone go bula dišego, re kotobetše kelo, re godiše theko, re fore batho ka seelo sa maano,

6Mosenyegi re mo reke ka tšhelete; re reke mohloki ka dieta; re rekiše diphefe tša mabele?

7Morena o enne ka Moretwa wa Jakobo, a re: Mediro ya bona nka se e lebale neng le neng.

8A ga se tšona tše, di šišinyago naga, di hlokofatšago bohle ba ba agilego mo go yona? E tlala boka noka thoko tšohle, ye e rego e gogotše e boele e kgwehle, boka noka ya Egipita.

9Morena Mong a bohle o re: Mohla woo ke tlo dikediša letšatši e sa le mosegare, ke fifatša naga go sa le seetša sa mosegare.

10Menyanya ya lena ke tlo e dira mehla ya dihlokofalo, dikoša tšohle tša lena ya ba dillo, ka moka ka le tšwariša mankgeretla, dihlogo tšohle ka di dira mafatla; ke tlo le lediša mahlobogo a morwa motswalwaeši; mme tše di tlogo latela e tlo ba tša mohlamobe.

11Tsebang gee! O realo Morena Mong a bohle. Go tla matšatši a ke tlogo romela tlala mo faseng, e sego tlala ya bogobe, e sego lenyora la meetse; e tlo ba go llela go kwa Lentšu la Morena.

12Ba tlo goloma ba etšwa lewatleng leno, ba yo goma ka lewatle lela, ba etšwa leboa ba ya bohlabela, ba putlaputla ba nyaka Lentšu la Morena, mme ba ka se le hwetše.

13Mehleng yeo basetsana ba lebopo le lebotse, le masogana, ba tlo felela ka lenyora.

14Bona bao ba enago ka sebe sa Samaria ba re: Ka bophelo bja modimo wa gaDani; ba ena le ka tsela ye e yago Bereseba, ba tlo wa ba se hlwe ba tsoga.

← Chapter 7 Jump to: Chapter 9 →