Galatians 1

Sotho 1951 (BIBELE)

Jump to: Chapter 2 →

1Paulo Moapostola wa go se bewe ke batho, wa go se be gona ka batho, e lego Moapostola ka Jesu Kriste le ka Modimo Tatagwe e a mo tsošitšego bahung.

2Nna le bana bešo ka moka ba ke nago le bona, re ngwalela diphuthego tša Galatia.

3Kgaugelo a e le tlele le khutšo e tšwago go Modimo Tata wešo le go Mong wa rena Jesu Kriste,

4e a ikgafilego ka baka la dibe tša rena gore a re phološe lebakeng le lebe le la bjale, ka go rata ga Modimo Tata wešo.

5Yenayo a a retwe mehleng ya neng le neng. Amene.

6Ke kgotsa ge le akgofiša go hlanogela e a le biditšego ka kgaugelo ya Kriste, mme la ya le Ebangedi e šele.

7Etšwe go se e nngwe; se e lego gona e le ba go le ferekanya ba rata go hlanola Ebangedi ya Kriste.

8Fela, e a kago le anegela Ebangedi e šele, e sego yeo le e boditšwego yona, le ge e ka ba rena, le ge e ka ba morongwa wa legodimong, yena eo a e be molahlwa.

9Bjalo ka ge re šetše re boletše, le bjale re realo: E a kago le botša Ebangedi e šele, e sego yeo le e amogetšego, yena eo a e be molahlwa.

10Ge ke realo, a ke go re ke rerela batho, goba ke rerela Modimo? Goba ke go re ke nyaka go kgahla batho? Ge nka be ke sa le wa gore ke kgahle batho, gona nka be ke se mohlanka wa Modimo.

11Bana bešo! Ke le eletša gore Ebangedi ye e boletšwego ke nna, ga e ye ka mokgwa wa batho.

12Le gona ga nka ka e fiwa ke motho, ga nka ka e rutwa ke motho; ke e utolletšwe ke Jesu Kriste.

13Gobane tša bophelo bja ka ke sa ya le Sejuda le di kwele, tša mola ke sa hlomarela phuthego ya Modimo ke galefile, ke e šuhla.

14Ke phala dithaka tša ka tša setšhaba sa gešo ka tša Sejuda, ke le mogale wa go phegelela mekgwa ye re e neilwego ke botatawešo.

15Gomme Modimo e a nkgethilego mola ke sa tšo belegwa, a ikgahlelwa ke go mpitša ka kgaugelo ya gagwe,

16A nkutollela Morwa wa gagwe, gore ke mo tsebatše ditšhabeng. Gomme nna ga nka ka eletšana le nama le madi;

17Ga nka ka ya Jerusalema go bao ba nthakilego pele go ba Baapostola; ka ya Arabia, ka buša ka boela Damaseko.

18Ka morago, ge go fetile nywaga e meraro, ka na ka rotogela Jerusalema, ka yo bonana le Petro, ka fetša matšatši a lesome le metšo e mehlano ke dutše le yena.

19E mongwe wa Baapostola ga nka ka mmona, ge e se Jakobo ngwanabo-Morena.

20Tše ke le ngwalelago tšona šidi, di tsebja ke Modimo ge ke sa aketše.

21Ka morago ka ya dinageng tša Siria le Tsilitsia.

22Ge e le diphuthego tša naga ya Juda di be di sa ntsebe ka sefahlogo.

23Ba gona ba kwele fela gore motho yola wa go re hlomarela mehleng yela ke segoeledi sa tumelo diphuthegong tše kgale a bego a di šuhla.

24Gomme ba reta Modimo ka baka la ka.

Jump to: Chapter 2 →