Galatians 6

Sotho 1951 (BIBELE)

← Chapter 5 Jump to:

1Bana bešo, ge motho a tšhoga a wetše molatong, lena ba le lego ba Moya, le mo tsoše ka moya o bonolo; gomme le lena le itote, gore le se wele molekong.

2Hlatlolanang merwalo; ke wona mokgwa wo le tlogo phetha molao wa Kriste ka wona.

3Ge motho a ka itshema a re: Ke selo, mola e se selo, o a iphora.

4Motho a a šetše modiro wa gagwe; ke mo a tlogo retwa ka tša gagwe, e sego ka tša e mongwe.

5Gobane motho ka o tee ka o tee o rwešwa morwalo e lego wa gagwe.

6E a rutwago lentšu, a a fele a ntšha go tše botse ka moka, a abela eo a mo rutago.

7Le se ke la timela; Modimo ga a kwerwe. Se motho a se bjalago, ke sona se a tlogo se buna.

8E a bjalago mo nameng ya gagwe, se a tlogo se buna nameng ke tshenyego. E a bjalago Moyeng, se a tlogo se buna Moyeng ke bophelo bjo bo sa felego.

9A re se ke ra lapa go dira botse; gobane ge re sa lesetše, re tlo buna ka lebaka la gona.

10Bjale ge re sa na le lebaka, a re direng botse; re bo direle batho bohle, gagolo re bo direle batho baborena ba tumelo.

11Bonang bogolo bja mangwalo a ke le ngwaletšego ona ka seatla sa ka.

12Batho bao ba ratago go kgahla batho ka tša nama, ke bona ba ba le gapeletšago ba re: Bollang, le gore ba se ke ba tlaišetšwa sefapano sa Kriste.

13Gobane le bona ba go bolla, Molao ga ba o lotole. Ba rata ge le ka bolla, gore ba kgantšhe mebele ya lena.

14Gomme nna, go ikgantšha a go be kgole le nna, ge e se go kgantšha sefapano sa Mong wa rena Jesu Kriste, yo lefase le mpapoletšwege ka yena, mme nna ka bapolelwa lefase.

15Gobane mo go Kriste go bolla le go se bolle ga se selo; se segolo ke go ba mmopša e mofsa.

16Gomme ka moka ba ba tšeago ka tsela ya thuto ye, a khutšo le kgaugelo di ba okamele, bona Baisiraele ba Modimo.

17Bjalo ge, go se ke gwa hlwa go eba e a ntapišago, gobane mmeleng wa ka ke na le mabadi a Morena Jesu.

18Kgaugelo ya Mong wa rena Jesu Kriste a e be le meoya ya lena, bana bešo. Amene.

← Chapter 5 Jump to: