Galatians 3

Sotho 1951 (BIBELE)

← Chapter 2 Jump to: Chapter 4 →

1Joo Bagalatia! Lena mašilo! Le loilwe ke mang ge le sa kwe therešo? Lena ba go swantšhetšwa mmapolwa Jesu Kriste la ka le mmona ka mahlo!

2Se ke ratago ge le ka mpotša sese: A Moya o mokgethwa le o bone ka mediro ya Molao, goba le o bone ka go kwa tša tumelo?

3A le mašilo a makaakaa? La re go thoma ka Moya, la yo feletša ka nama?

4Go tlaišwa gakaakaa ga lena e be e le ga lefela? A e be e le ga lefela ruri?

5E a le abetšego Moya, e a dirilego mehlolo mo go lena a o dirišitšwe mediro ya Molao, goba o dirišitšwe ka go kwa tša tumelo?

6Bjalo ka ge Aborahama a dumetše Modimo, mme Modimo a mmalela tumelo yeo a re ke toko,

7Tsebang ge! Ba e lego ba tumelo ke bona bana ba Aborahama.

8Ke gore Mangwalo a be a dutše a bone gore Modimo o tlo lokafatša bantle ka tumelo, a napa a holofediša Aborahama, a re: Meloko ka moka ya lefase e tlo šegofatšwa ka wena.

9Anthe go šegofatšwa ba e lego ba tumelo gotee le Aborahama e a dumetšego.

10Gobane ba e lego ba mediro ya Molao, ba rogilwe ka ge gwa thwe: Morogwa ke e a sa tiišego go dira tšohle tše di ngwadilwego pukung ya Molao.

11Gobane pele ga Modimo ga go e a lokafalago ka Molao. Moloki o tlo phela ka tumelo.

12Molao ga o na taba le tumelo; gobane tša Molao di boletšwe gwa thwe: Ge motho a dira tša wona, o tlo phela ka tšona.

13Kriste o re rekolotše thogong ye ya Molao ka go ba morogwa bakeng sa rena, ka gobane go ngwadilwe gwa thwe: E a fegilwego kwateng o rogilwe.

14Go bile bjalo gore tšhegofatšo ya Aborahama e fihlele ditšhaba tšohle ka Jesu Kriste, gore tše di holofedišitšwego ke Moya, re di amogele ka tumelo.

15Bana bešo! Ke bolela ka mokgwa wa batho, ke re: Ge kgwerano ya batho e tlemilwe, go ka se be le e a e fedišago le e a kago e ekeletša.

16Tše Aborahama a di boditšwego e le kholofedišo, di lebane peu ya gagwe. Ga go thwe: Dipeu, eke ke tše ntši. Go bolelwa peu e tee, ge go thwe: Ka peu ya gago. Mme yona peu yeo ke Kriste.

17Bjale nna ke re: Kgwerano ye Modimo a e tlemilego e šupa Kriste, e ka se re ge go fetile nywaga e makgolo a mane a nago le masome a mararo, ya tla ya fedišwa ke Molao, gwa senywa kholofedišo yela.

18Ge bojabohwa bo ka be bo etšwa Molaong, gona bo ka be bo sa tšwe kholofedišong yeo. Ge e le Aborahama, Modimo o mo seditše ka yona kholofedišo.

19Bjale Molao ke wa go reng? -- O beilwe wa hlatlama kholofedišo ka baka la dikarago, gore go be go fihle Peu ye e bolelwago ke kholofedišo. Gomme Molao wa laetšwa ka Barongwa ka seatla sa Khumedi.

20Khumedi ga se ya go humela o tee fela; yo e lego o tee ke Modimo.

21Bjale Molao, a o ganana le kholofedišo tša Modimo? Ga go bjalo! Gobane ge re ka be re neilwe Molao o nago le maatla a go phediša, gona go lokafala go ka be go etšwa go wona Molao.

22Fela, Mangwalo a tlemile tšohle ka sebe, gore se se holofedišitšwego se tle se newe ba ba dumelago, ba se bone ka tumelo ya go dumela Jesu Kriste.

23Mola tumelo e sešo ya tla, re be re sa etetšwa ka Molao, re sa tlemilwe ke wona, re letetše tumelo e bego e tlo utollwa.

24Molao ya ba moetetši wa go re iša go Kriste, gore re tle re lokafatšwe ka tumelo.

25Gomme bjale ge tumelo e tlile, ga re sa bušwa ke moetetši eo.

26Gobane ka moka le bana ba Modimo ka tumelo ya go dumela Jesu Kriste.

27Gobane ka moka ba le kolobeditšwego la ba ba Kriste, le apere yena Kriste.

28Moo ga go hlaolwe Mojuda goba Mogerika; ga go mohlanka goba mohunologi; ga go monna goba mosadi; le batee ka moka ka Jesu Kriste.

29Gomme ge le le ba Kriste, ke gona ge le le peu ya Aborahama le baji ba bohwa ka kholofedišo.

← Chapter 2 Jump to: Chapter 4 →