Galatians 2

Sotho 1951 (BIBELE)

← Chapter 1 Jump to: Chapter 3 →

1Ka morago, ge go fetile nywaga e lesome le metšo e mene, ka boela ka rotogela Jerusalema ke na le Baranaba; ra tloga le Tito.

2Ka ya gona ka pono, ka boledišana le bona ka Ebangedi ye ke e tsebatšago ditšhabeng; gagolo ka boledišana le ba go sengwa bagolo, gore ke se tlo phegelela lefela, ke bone ge mohlomong ke phegeletše lona lefela.

3Gomme le Tito yo ke bego ke na nae, ga a ka a gapeletšwa go bolla, mola e le Mogerika.

4Ge e le badumedi ba maaka, ba ba bego ba re tsene ba sa lemogiwe, e le dihlodi tša go bona bolokologi bja rena, bjo re nago le bjona ka Jesu Kriste, mme ba rata go re bušetša bohlankeng,

5bonabao ga ra ba loba ra ba šuthela sebaka le gatee; ra ba gana gore therešo ya Ebangedi e dule e le mo go lena.

6Ge e le bao ba bego ba sengwa bagolo, -- le ge ke sa re selo ka se ba lego sona, gobane Modimo ga a bebe motho, -- bona ba go godišwa bao, nna ga ba ka ba nthuta se ke bego ke sa se tsebe.

7Ba bone ge nna ke beetšwe go iša Ebangedi go ba ba se nago lebollo, bjalo ka ge Petro a beetšwe go e iša go ba lebollo.

8Gobane e a dirilego ka maatla ka Petro, yena a ba Moapostola wa ba lebollo, ke yena a dirilego ka maatla ka nna ke le gare ga bantle.

9Ba bagolo bao, ge ba lemogile neo ye nna ke e filwego, Jakobo le Petro le Johane, bona basengwadikokwane, ba fana diatl le nna le Baranaba, ra kwana ra re: Rena re ya go bantle; bona ba ye go ba lebollo.

10Ba fetša ka go re: Ke se lebale bahloki. Gomme modiro woo ke o dirile ka mafolofolo.

11Ya re mola Petro a tlile Antiokia, nna ka mo gana mahlong ge a itshodiša.

12Gobane mola go sešo gwa fihla bao ba go rongwa ke Jakobo, o be a eja le bantle; ge banna bao ba fihlile, a thiša a ila bantle ka go boifa ba lebollo.

13Le Bajuda ba bangwe ba ikaketša ba na le yena; le Baranaba a ba a gogolwa ke boikaketši bja bona.

14Gomme nna ge ke bona ba sa sware ka tsela ya toko le therešo ya Ebangedi, ka bolela le Petro ba le mmogo ka moka ka re: Ge wena o lego Mojuda o phela ka mokgwa wa bantle o lahlile Sejuda, o reng o gapeletša bantle wa re ba ye ka Sejuda?

15Rena ka go tswalwa re Bajuda; ga re badiratšempe ba go tšwa go bantle.

16Fela, ka ge re tseba gore motho ga a lokafale ka mediro ya Molao, re tseba gore o lokafala ka go dumela Jesu Kriste, le rena re dumela yena Kriste Jesu, gore re lokafale ka yona tumelo ya go dumela Yena Jesu Kriste, e sego ka mediro ya Molao; ka gobane ga go motho e a kago lokafatšwa ka go dira se Molao o se bolelago.

17Bjale ge re nyaka go lokafala ka Kriste, mme ra hwetšwa re sa le badiradibe, a e ka se be gore Kriste ke modiriši wa sebe? -- Ga go bjalo.

18Gobane ge nka tsoša se ke se phušotšego, e ka ba go re: Ke be ke timetše.

19Ge e le nna Molao ke o hwetše, gore ke phelele Modimo.

20Ke bapotšwe sefapanong le Kriste; ge ke phela ga e sa hlwe e le nna; ke Kriste e a phelago mo go nna. Go phela gaka, ke phela tumelong ya go dumela Morwa wa Modimo e a nthatilego, a ikgafa ka baka la ka.

21Kgaugelo ya Modimo nna ke e bona e se selo se senyane. Fela, ge toko e ka be e etla ka Molao, gona Kriste a ka be a hwetše lefela.

← Chapter 1 Jump to: Chapter 3 →