Galatians 5

Sotho 1951 (BIBELE)

← Chapter 4 Jump to: Chapter 6 →

1Kriste o re lokololetše tokologo. Emang ge le tie, gore le se boele ditlemong tša bohlanka.

2Sedio! Nna Paulo ke le botša ke re: Ge le bolla, Kriste a ka se ke a le hola selo.

3Ke buša ke hlatsela motho mang le mang e a bollago, ke re o swanetše go dira tšohle tše Molao o di bolelago.

4Gomme ba le rego le lokafala ka Molao, le kgaogana le Kriste, le tlogile kgaugelo.

5Ge e le rena, seholofelwa seo sa go re re lokafale, re se lebeletše ka Moya le ka tumelo.

6Gobane mo go Kriste Jesu go bolla le go se bolle ga di kgone selo; go kgona tumelo e dirago ka lerato.

7Le be le wetše tsela e botse. Le šiteletšwa ke mang ge le sa hlwe le ekwa therešo?

8Wa go le thišiša ga se eo a le biditšego.

9Komelwana e nyane e bediša bogobe ka moka.

10Ge e le nna ke le botile Moreneng gore le ka se hlanoge; gomme e a le ferekanyago o tlo rwala molato, le ge e ka ba mang le mang.

11Gomme nna, bana bešo, ge ba re ke sa ruta lebollo, ke tlaišetšwang? Ge go ka be go le bjalo, hleng kgopišo ya sefapano e ka be e fedišitšwe.

12Bona bao ba go le ferekanya, ba leseng ba itshegake.

13Gobane lena bana bešo, le bile ditšwe tokologo. Fela, a e se be tokologo ya go fa nama sebaka. Sa lena a e be go direlana ka lerato.

14Gobane Molao ka moka o akaretšwa ka Lentšu le tee le le rego: Wa geno o mo rate ka mokgwa wo o ithatago ka wona.

15Fela ge le lomana, le jana, le bone gore le se tlo fedišana.

16Swarang tsela le išwa ke Moya, ke mo le tlogo lesa go phetha ditumo tša nama.

17Tše nama e di dumago, di loša Moya; gomme tše Moya o di dumago, di loša nama. Dilo tšeo di a ganana; di le šitiša go dira se le se ratago.

18Gomme ge le dumela go hlahliwa ke Moya, ga le sa bušwa ke Molao.

19Mediro ya nama yona e pepeneneng; ke tlhalo, le bootswa, le ditšhila, le bohlotlolo.

20Ke go hlankela medimo, le boloi, le tlhoyano, le dintwa, le pefelo, le bogale, le ditshele, le bogarigari.

21Ke mona, le polao, le botagwa, le bohori, le tše di swanago le tšeo, tše ke felago ke le botša bjalo ka ge ke le boditše kgale ka re: Ba ba dirago tše bjalo ba ka se je bohwa mmušong wa Modimo.

22Dienywa tša Moya, tšona ke lerato, le lethabo, le molao; ke go se fele pelo, le botho le bonolo, le potego le boleta, le boitshwaro.

23Tše bjalo ga di ganwe ke Molao.

24Gomme ba e lego ba Jesu Kriste ba kokotetše nama sefapanong gotee le ditumo le dikganyogo.

25Ge re phela ka Moya, gona a re swareng tsela re išwa ke wona Moya.

26Re se ke ra ba ba go kgantšha lefela, le ba go rumolana, le ba go tsebafelana.

← Chapter 4 Jump to: Chapter 6 →