Galatians 4

Sotho 1951 (BIBELE)

← Chapter 3 Jump to: Chapter 5 →

1Gomme ke re: Moji wa bohwa ge e sa le ngwana, ga go se a fapanago le mohlanka ka sona, le ge e le yena mong wa dilo tšohle.

2O sa bušwa ke balebeledi le balaki, gwa tlo ba gwa fihla lebaka le le beilwego ke tatagwe.

3Le rena, mola re sa le bana, re be re sa le ba go bušwa ke dithutothutwana tša lefase.

4Ge go tlile phethego ya mabaka a na a roma morwa wa gagwe e a belegwego ke mosadi, a ba wa go bušwa ke Molao,

5gore a rekolle ba ba bušwago ke Molao, gore re tle re be bana.

6Gomme ka gobane le le bana, Modimo o rometše Moya wa morwa wa gagwe dipelong tša lena, wona o hlabošago lentšu wa re: Baba! Tata!

7Bjale, ga o sa le mohlanka, o morwa. Gomme ge o le morwa, ke gona ge o le moji wa bohwa ka Kriste.

8Ge e le kgale, ka go se tsebe Modimo, le be le direla medimo e sego Modimo.

9Bjale gomme ge le tsebile Modimo, kaone ke ge nka re: Ge le tsebilwe ke Modimo, le reng le boela dithutothutwaneng tšela tša mathomo tše di fokolago, tše e lego tšhego, la rata go boela la ba bahlanka ka tšona?

10A le rata go ilela matšatši le dikgwedi le mabaka le nywaga?

11Nna ke a boifa gore mo go lena ke itapišeditši lefela.

12Etšang nna, bana bešo, ke a le kgopela, gobane le nna ke tlile ka etša lena. Ga la ka la ntshenyetša selo.

13Le sa tseba gore mohla wola ke le anegela Ebangedi la mathomo, ke be ke fokola mmele.

14Gomme moleko woo le o bonego mmeleng wa ka, ga la ka la nnyatša la ntlhaswa ka baka la wona. Se le se dirilego ke go nkamogela bjalo ka Morongwa, bjalo ka eke le amogela yena Jesu Kriste.

15Tše le bego le re ke lehlogonolo mehleng yela, bjale di ile kae? Ge e le nna nka le hlatsela ka re, ge go ka be go kgonegile, le ka ba le ikgontše mahlo la nnea.

16A ke go re bjale ke le fetogetše lenaba ka ge ke le boditše therešo?

17Batho bao ba le fišegetše, fela e sego ka mokgwa o botse. Ba rata gore le tlogelane le rena, le fišegele bona.

18Se botse e ka ba go fišego ka mokgwa o botse ka mehla, e sego mohla ke na le lena fela.

19Lena bana ba ka, ba ke boelago ke le belega ka bohloko, gore Kriste a be a bopege mo go lena,

20ke rata ge nka ba moo le lena, ka bolela le lena ka lentšu le šele, ka gobane le ntlabile.

21Mpotšeng, lena ba le ratago go bušwa ke Molao, a Molao le a o kwa?

22Go ngwadilwe gwa thwe: Aborahama o be a na le barwa ba babedi; e mongwe o belegwe ke molata; e mongwe a belegwa ke mohumagadi.

23Wa molata o tswetšwe ka nama; wa mohumagadi o tswetšwe ka kholofedišo.

24Ditaba tšeo ke seswantšho. Basadi bao ke kgwerano tše pedi. E nngwe ke ya thaba ya Sinai e tswalelago bohlankeng; ke yena Hagara eo.

25Gobane Hagara ke Sinai thaba yela ya Arabia; gomme e swana le Jerusalema wa bjale, gobane motse woo o bohlankeng le bana ba wona.

26Ge e le Jerusalema wa magodimong wona ke mohumagadi, yena mmago rena bohle.

27Gobane go ngwadilwe gwa thwe: Hlalala wena moopa o sa belegego. Hlalala o hlakele wena o sa tsebego mašoko a pelego; gobane bana ba eo a dulago a nnoši ba atile go fetiša ba eo a nago le monna.

28Gomme lena bana bešo le bana ba kholofedišo, le etša Isaka.

29Gomme le bjale go sa etša mohla wola, ge eo a tswetšwego ka nama a tshwenya e a tswetšwego ka Moya.

30Fela, Lengwalo le reng? Le re: Raka molata eo le ngwana wa gagwe: gobane ngwana wa molata a ka se ke a ja bohwa le ngwana wa mohumagadi.

31Gomme rena ge, ga re bana ba molata; re bana ba mohumagadi.

← Chapter 3 Jump to: Chapter 5 →