bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sotho
/
Sotho 1951 (BIBELE)
/
Hebrews 11
Hebrews 11
Sotho 1951 (BIBELE)
← Chapter 10
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 12 →
1
Ge e le tumelo ke kholofelo ye e tiilego ya go holofela tše di letetšwego; ke go bota tše di sa bonwego ka mahlo.
2
Ba bogologolo ba ithuetše bohlatse bja yona tumelo.
3
Tumelo re tseba ka yona ge legohle le hlodilwe ke lentšu la Modimo; tše di bonwago tša tšwelela di etšwa go tše di sa bonwego.
4
Tumelo ke ka yona Abele a ipegilego go Modimo ka sedimo se se phadilego sa Kaine; ke ka yona ge a hlatselwa dibego tša gagwe gwa thwe: o lokile. Modimo a hlatsela dibego tša gagwe; ke ka tšona ge a bolela le ge a hwile.
5
Tumelo ke ka yona ge Henoge a tlošwa a se bone lehu; gobane mola a sešo a tlošwa o hlatsetšwe gore o be a kgahla Modimo.
6
Gomme go kgahla Modimo ga go kgonege ge go se tumelo. E a batamelago Modimo o swanetše go dumela gore Modimo o gona, le gore ba ba mo nyakago o a ba putsa.
7
Ke ka tumelo ge Noa a dirile polokelo a laetšwe ke Modimo, a botšwa tše di bego di sešo tša bonwa, a phološa ba lapa la gagwe. Ke ka yona ge a sola lefase; gomme ya ba yena mojabohwa ka toko ye e tšwelego tumelong.
8
Ke ka tumelo ge Aborahama a ekwa go bitšwa, a khuduga a ya felo fao a tlogo go fiwa gore e be legae la gagwe; a tsoga a sepela a sa tsebe mo a yago.
9
Ke ka tumelo ge a diilela nageng yeo a e holofedišitšwego, gwa ba bjalo ka eke ga se naga ya gagwe, a dula merakeng; le Isaka, le Jakobo ba dira ka mokgwa woo, e le bona ba go tlo ja bohwa bjoo ba holofedišitšwego bjona.
10
Gobane o be a letetše motse wo o tlogo thewa wa tia, woo mothei le moagi wa wona e lego Modimo.
11
Ke ka tumelo ge Sara a fiwa maatla a ba mmago setšhaba, le ge a šetše a fetilwe ke lebaka; gobane o be a re: E a nkholofedišitšego o a botega.
12
Ke ka baka leo mothong o tee yo, e bego e le wa mmele wo o hwilego, go tšwelego bontši bjo bo kakago bja dinaledi tša legodimo le lešabašaba le le sa balwego la lešing la lewatle.
13
Bona bao ka moka ba hwile ba dumetše, ba sešo ba amogela tše ba di holofedišitšwego. Ba di bone di le kgole ba di thabela, ba ipolela ba re: Re baeng le ba ba diiletšego lefaseng.
14
Gobane ba realo go ba šupetša gore naga ya gabobona ba sa e nyaka.
15
Ba be ba sa bolele naga yela ba tšwelego go yona; gobane sebaka sa go boela go yona, ba be ba na naso.
16
Se ba bego ba se holofetše ke legae le le botse; gomme lona le kua legodimong. Ke gona Modimo a sa itšimeletšego go bitšwa Modimo wa bona; gobane o ba agetše motse.
17
Ke ka tumelo ge Aborahama mola a lekwa, a tliša Isaka gore e be sedimo, a ntšha motswalwaeši e a bego a filwe dikholofedišo,
18
e a bego a boletšwe mola go thwe: Peu ya gago e tlo bitšwa ka Isaka.
19
Mo pelong ya gagwe a re: Modimo le go tsoša mohu o a kgona, mme a mo fiwa gape. Taba yeo ke seswantšho.
20
Ke ka tumelo Isaka ge a šegofatša Jakobo le Esau ka tša go tlo tla.
21
Ke ka tumelo ge Jakobo mola a ehwa a šegofatša barwa ba Josefa ba babedi, mme a rapela a inametše nthla ya lehlotlo la gagwe.
22
Ke ka tumelo ge Josefa mola a felela a gopola go tlo khuduga ga Baisiraele, a laela tša go tlo dirwa mašapo a gagwe.
23
Ke ka tumelo ge Moshe mola a belegwe a utiwa ke batswadi ba gagwe kgwedi tše tharo, ka gobane ba bone e le ngwana o botse; mme ba se boife molao wa kgoši.
24
Ke ka tumelo ge Moshe mola a godile a gana go bitšwa morwa wa morwedi wa Farao;
25
a ikgethela go thatafalelwa le setšhaba sa Modimo, a nyatša maipshino a lebaka leno.
26
A bona go nyatšwa wa Kriste e le lehumo le le phalago matsaka a Egipita; a dira ka mokgwa woo a lebeletše moputso wo a tlogo o bona.
27
Ke ka tumelo ge a khuduga Egipita a sa boife bogale bja kgoši, a gomarela eo a sa bonwego bjalo ka eke o a mmona.
28
Ke ka tumelo ge a bea Paseka le go fokela madi, gore e a bolayago maitšibulo a se ke a ba gobatša.
29
Ke ka tumelo ge a sela Lewatle le Lehubedu le swana le naga ye e omilego; Baegipita ba leka ba betwa.
30
Ke ka tumelo ge merako ya Jeriko e ewa e dikologilwe matšatši a šupago.
31
Ke ka tumelo ge Rahaba mosadi wa seotswa a sa ka a timela le ba ba sa dumelego, a amogetše dihlodi lapeng ka khutšo.
32
Ke sa tlo iša pele ka dife? Nka hlaelelwa ke lebaka ge nka laodiša ka tša Gideoni, le ka tša Baraka, le ka tša Simisone le ka tša Jefeta, le ka tša Dafida, le ka tša Samuele, le ka tša baporofeta,
33
ba ba fentšego dikgoši ka tumelo ba dira tša go loka, ba amogela tše ba di holofedišitšwego, ba thiba melomo ya ditau.
34
Ba tima maatla a mollo, ba efoga magale a marumo, ba tia maatla ba lapile, ba ba bagale ntweng, ba raka dira tša manaba.
35
Basadi ba buša ba hwetša bahu ba bona ba tsogile; ba bangwe ba bapolwa ba se bone tokollo gore ba fihlele tsogo e lego kaone.
36
Ba bangwe ba kgotlelela kgobošo le dikotlo, le ditlemo, le kgolego.
37
Ba thumilwe ka maswika, ba hlokofatšwa, ba segakanywa, ba bolawa ka ditšhoša, ba nenera ba apere dikobo tša dinku le dipudi, e le badiidi le bahlaki le bahlokofatšwa,
38
bao lefase leno le sa kago la swanelwa ke batho ba ba bjalo, ba goloma le mašoka dithabeng le maribeng le mefomeng ya nageng.
39
Bona bao ka moka ba ba hlasetšwego ke tumelo, tše ba di holofedišitšwego ga ba ka ba di bona ka mahlo.
40
Ke ka gobane Modimo o na le tše a re beetšego tšona, tše di phadišago, gore mohla ba fihlelago tša botlalo le rena re be gona.
← Chapter 10
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 12 →
All chapters:
1
2
3
4
5
6
7
8
9
10
11
12
13
Recommended Reading
Commentary
Hebrews Commentaries
→
Devotional
Hebrews Devotional Guide
→
Get This Bible
BIBELE Study Bible
→