Hebrews 9

Sotho 1951 (BIBELE)

← Chapter 8 Jump to: Chapter 10 →

1Ge e le kgwerano ya kgale le yona e be e na le melao ya yona ya go direla Modimo; le yona Ntlokgethwa ya mo faseng e be e na le melao ya yona.

2Go be go agilwe Ntlo ya ka mono pele, e bego e na le sehlomapone, le sethalana, le magobe a go bewa pele ga Modimo. Ntlo yeo e be e le Sekgethwa.

3Ka kua moseo go širilwego ke sešireletšo go be go na le Ntlo ya bobedi, ye e bego e le Sekgethwakgethwa.

4Moo go be go beilwe aletare ya gauta ya go thuntšha diorelo, le polokelo ya kgwerano ye e bego e manegilwe yohle ka gauta; mo go yona go be go bolokilwe sebjana sa gauta se se tšhetšwego Mana, le lehlotlo lela la Arone la go palega matšobana, le matlapa ala a kgwerano.

5Polokelo ye e be e ukametšwe ke Bakerubi ba letago, ba go apeša sekhurumelo sa poelano moriti. Fela, dilo tšeo re ka se di bolele ra iša kgole.

6Dilo tšeo ge di beilwe ka mokgwa woo, mono Ntlong ya pele baperisita ba be ba tsena ka mehla, ba dira tše ba bego ba direla Modimo ka tšona.

7Ge e le kua moseo go be go tsena Moperisita e mogolo fela gatee ka ngwaga; a tsena a swere madi a sedimo sa gagwe, le sa go hlatswa ditšhito tša setšhaba.

8Dilo tše ka moka ke tše Moya o šupetšago ka tšona gore tsela ya go ya Sekgethwakgethweng e be e sešo ya utollwa mehleng ya ge go sa eme Ntlo ya mono pele.

9Di swantšha tša mehla yeno ya ge go sa tlišwa dibego le didimo tše di sa kgonego go hlatswa matswalo a batliši ya ba ba bolo ka tlalo.

10Dilo tšeo, le dibego tša dilewa le dinwewa, le tlhapišo tša mehutahuta, le go loka wa nama, ke tše ba bego ba laetšwe go di dira, go be go tle lebaka la go tšwelela ga tša botlalo.

11Gomme Kriste o tšweletše, yena Moperisita e Mogolo wa tše botse tše di tlogo tla ka Ntlokgethwa e fetago yela ka bogolo le ka botlalo; ke yeo ya go se agiwe ka matsogo, e sego ya tlholo yeno.

12A ya a tsena Sekgethwakgethweng gatee ya ba moka. A se tsene ka madi a dipoo le a diphoko; a tsena ka madi a gagwe yena mong, a hwetša topollo ya neng le neng.

13Gobane ge madi a diphoko le a dipoo le molora wa sethole wa go fokela ba ba tšhilafetšego, ge dilo tšeo di be di ba dira bakgethwa, tša ba hlatswa mebele ya bona,

14gona madi a Kriste e a ikišitšego go Modimo ka Moya wa neng le neng a le sedimo se se se nago senyalo, a gagwe madi a a ka se fetiše kgole go hlatswa matswalo a rena ra tšwa tšhila tša mediro ye e hwilego, ra tla ra direla Modimo e a phelago?

15Ke tšona tše a lego Mmoelanyi wa kgwerano e mpsha ka tšona, gore ka lehu leo le tlilego ya ba la go lefa dikarogo tša mehla ya kgwerano ya kgale, ba ba bileditšwego bohwa bjo bo sa felego ba kgone go amogela se se holofedišitšwego.

16Gobane mo go nago le kwano ya bohwa, go rata gore mong wa kwano yeo a hwe;

17gobane kwano ya bohwa e na le maatla ge go hwilwe; ga e ne maatla ge mong wa yona a sa phela.

18Ke ka baka leo kgwerano ya kgale e kgakotšwego ka madi.

19Gobane mohla wola ge Moshe a feditše go anegela setšhaba tša Molao, o tšere madi a powana le a diphoko, a tšhela meetse, a fokela puku ya Molao le setšhaba ka moka ka sefokana sa lehlakanoka le sa boya bjo bohubedu,

20a tla a re: Ke ona madi a kgwerano ye Modimo a le laetšego yona.

21Le Ntlokgethwa, le dibjana ka moka tša modiro o mokgethwa, a di fokela ka madi.

22Tše di sa hlatswiwego ka madi ga se tše ntšhi ge go iwa ka Molao; le tebalelo e be e se gona, ge e se ka go tšholla madi.

23Diswantšho tša tše kgethwa tša magodimong di be di swanetše go hlatswiwa ka mokgwa woo; ge e le tše kgethwa tša kua magodimong, tšona di loketšwe ke didimo tše di fetago tšeo ka bogolo.

24Ge e le Kriste ga a ka a tsena Sekgethweng se se agilwego ka diatla ya ba seswantšho sa Sekgethwa sa makgonthe. Yena o tsene gona kua magodimong, mme bjale o bonala pele ga sefahlogo sa Modimo ka baka la rena.

25Ga se gore a fele a boeletša go itira sedimo gantši bjalo ka Moperisita e mogolo ge a tsena Sekgethwakgethweng ka ngwaga ka madi e sego a gagwe.

26Ge go ka be go le bjalo, a ka be a swanetše go tlaišwa gantši go tloga mathomong a lefase. Bjale gomme o ile a bonala pele ga Modimo gatee ya ba moka, a fediša dibe ka sedimo se a itirilego sona.

27Gomme ka ge batho ba beetšwe go hwa gatee, gwa kgona go tla kahlolo,

28le Kriste o dirilwe sedimo gatee a ba wa go rwala dibe tša ba bantši; gomme bao ba mo latetšego ba tlo buša ba mmona e le Mophološi, a se ne taba le sebe.

← Chapter 8 Jump to: Chapter 10 →