Hebrews 7

Sotho 1951 (BIBELE)

← Chapter 6 Jump to: Chapter 8 →

1Yena Melekitsedeke yo e be e le kgoši ya Salema; e be e le Moperisita wa Modimo e mogologolo; ke yena a kilego a gahlanetša Aborahama ge a boa ntweng ya dikgoši, a mo šegofatša.

2Ke yena yo Aborahama a mo lobilego ka sa lesome sa dilo tšohle. Sa pele: Leina la gagwe ge le fetolwa ke go re: Kgoši ya khutšo.

3Ga go tsebje tat agwe le mmagwe le ge e le moloko wa gagwe, le ge e le mathomo a mehla ya gagwe le bofelo bja bophelo bja gagwe. Sa gagwe ke go bapetšwa le Morwa wa Modimo ge go thwe: Ke Moperisita wa neng le neng.

4Gomme le bona e le e mokaakang eo Aborahama rakgolo wa rena a mo lobilego ka sa lesome sa thoto yeo a bego a e thopile?

5Bjale bao ba hlaotšwego go barwa ba Lefi ba fiwa boperisita, ba laetšwe go tšhediša setšhaba ke gore bana ba bobona ba be ba ntšha sa lesome ka Molao, le ge le bona e le bana ba Aborahama.

6Bjale Melekitsedeke, yo lešika la gagwe le bego le sa tšwe go bona, o tšhedišitše Aborahama ka sa lesome, a šegofatša yena mong wa dikholofedišo.

7Gomme go ka se ganetše motho ge re re: E monyane o šegofatšwa ke e mogolo.

8Bjale fa, ba ba tšhedišago ke batho ba ba hwago; ge e le mola ke e a itšwego o a phela.

9Le gona re ka re, mola go tšhedišwa Aborahama, go tšhedišitšwe le Lefi,

10gobane, le ge a sešo a tswalwa, o be a le gona ka motswadi wa gagwe mola a gahlanetšwe ke Melekitsedeke.

11Bjale ge boperisita bja Balefi e ka be e le bja go tlo tliša phethego ya ba moka, ka ge boperisita e le wona motheo wa Molao, go sa nyakelwang Moperisita e mongwe wa mokgwa wa Melekitsedeke e a sa bewego ka mokgwa wa Arone?

12Gobane ge boperisita bo ka šatolwa, gona go swanetše ge go šatolwa le wona Molao.

13Gobane Moperisita eo a bolelwago ka mokgwa wo ke wa moloko o šele, wo go sego motho go wona e a kilego a hlankela aletare.

14Gomme mong wa rena go tsebja gore ke wa moloko wa Juda, ke wa moloko wo Moshe a sa kago a re o ka ba le boperisita.

15Le gona go tsebja ka botlalo gore go tlo tsoga Moperisita e mongwe wa mokgwa wa Melekitšedeke,

16e a sa bewago ka taelo ya Molao wa nama, e le e a beilwego ka maatla a bophelo bjo bo sa senyegego.

17Ke tše a hlatselwago tšona ge go thwe: Moperisita wa neng le neng ke wena ka mokgwa wa Melekitsedeke.

18Ge Molao e be e le wa go tlo fedišwa, ke ka gobane o fokola o sa hole selo.

19Gobane Molao e be e se wa go tlo tliša phethego; sa wona e be e le go re fihliša kholofelong e botse ya gore re tlo batamela Modimo.

20Gomme se segolo ke ge taba ye e na le keno ya Modimo. Ba bangwe baperisita ba beilwe go se na keno.

21Ge e le wa rena o beilwe ka keno; ke mo go itšwego: Morena o enne, a ka se šegame: Moperisita wa neng le neng ke wena ka mokgwa wa Melekitsedeke.

22Ke ka tšona tše ge Jesu e le Khumedi ya kgwerano ye e fetago yela ka bogolo.

23Gomme bala ke ba bantši ba ba hlatlamanego e le baperisita, ka ge lehu le ba šitišitše go dula.

24Ge e le Jesu o na le boperisita bjo bo sa šielwego e mongwe, ka gobane a dula a le gona neng le neng.

25Ke tšona di mo kgonišago go phološamoka, go phološa bao ba batamelago ka yena, ka ge e le wa go phela neng le neng le go ba rapelela.

26Gobane re be re kgonwa ke Moperisita e mogolo yo bjalo, e lego e mokgethwa, e a se nago sebe e a se nago bosodi, e a sa etšego badiradibe, e a godišitšwego godimodimo ga magodimo.

27E a sa etšego baperisita ba bagolo ba bangwe, bao go bego go ba swanetše ge ka mehla ba thoma go tliša didimo tša go hlatswa dibe tša bona, ba tsebo tliša sa go hlatswa dibe tša setšhaba. Tšeo o di dirile gatee ya ba moka mola a itira sehlabelo.

28Molao wona o be o bea batho ba ba fokolago ya ba baperisita ba bagolo. Ge e le Lentšu lela la keno, la go tla Molao o šetše o beilwe, lona le beile Morwa e lego yo bolo ka tlalo, ya ba Yena Moperisita wa neng le neng.

← Chapter 6 Jump to: Chapter 8 →