Hebrews 12

Sotho 1951 (BIBELE)

← Chapter 11 Jump to: Chapter 13 →

1Bjale le rena ge re na le leru le lekaakao la dihlatse tše di re ukametšego, a re apoleng tše di re imelago tšohle, le sebe se se re rarelago, mme re kgotlelele tlhabanong ye re lego mo go yona,

2re iše mahlo go Moetapele le Mophethi wa tumelo, yena Jesu, e a kgotleletšego sefapano, le ge se se bego se mo loketše e le lethabo, a dumela go gobošwa, a kgona go yo dula ka letsogong le letona la sedulo sa bogoši bja Modimo.

3Le fele le tseba yena e a sa kago a fela pelo ge badiradibe ba mo ganetša gakaakaa, gore le se lape dipelo la lesetša.

4Gobane ge le katana le sebe, ga le ešo la lwa ntwa ya madi.

5Le lebetše kgothatšo ye e le fepeletšago boka bana ya re: Ngwanaka! Se nyatše tsholo ya Morena; o se tsote kotlo ya gagwe.

6Gobane Morena o sola moratwa wa gagwe; o otla ngwana ofe le ofe yo a mo amogelago.

7Tšona tšeo le di kgotlelelago ke gona go laiwa; Modimo o le dira tše bana ba di dirwago; mme ngwana ke ofe e a sa laiwego ke tatagwe?

8Ge le ka be le sa laiwe la dirwa se bana bohle ba se dirwago, le ka be le se bana ba makgonthe.

9Ge ba e lego botatawešo ka nama, ba re laile mme ra ba boifa, a re ka se ikokobetše gagolo ra bušwa ke Tatagomeoya, mme ra phela?

10Botatawešo ba re laile lebakanyana ka mo ba bonego ge go laiwa go swanetše; ge e le yena o re laela go re hola gore re be ba go fiwa bokgethwa bja gagwe.

11Gomme go laiwa gohle, ga go thabiše ge motho a sa laiwa, go bjalo ka eke ke go hlokofatšwa; fela, ka morago go tšweletša seenywa sa toko le leago go bao ba tlwaetšwago go laiwa.

12Ke gona otlollang matsogo a a lapilego le matolo a a rephilego.

13Maoto a lena le a wetše tsela ya go loka, gore wa sehlotša a se ke a aroga; go kaone ge a ka fodišwa.

14Phegelelang go agišana le bohle le go kgethega. E a se nago kgethego, a ka se ke a bona Modimo.

15Le lebelele gore go se ke gwa ba le e a šiwago a se fihlele kgaugelo ya Modimo; go se be le modu wo o galakago, wo e rego ge o hloga wa tsoša pherekano wa tšhilafatša ba bantši.

16Go se be le wa seotswa, le ge e le monyatši boka Esau e a rekišitšego bogolo bja gagwe ka sejo se tee fela.

17Gobane le a tseba, ka morago ge a re a je bohwa bja tšhegofatšo, o lahlilwe, gobane o hlokile tsela ya go sokologa, le ge a e nyakile ka megokgo.

18Lena ga la ka la batamela thaba ye e kago swarwa ka diatla, ye e tukago mollo, ya leruleso le leswiswi le ledimo,

19Ya mollo wa phalafala, le go gala ga tše di bego di bolelwa, tšeo ba ba di kwelego ba kgopetšego ba re, go se hlwe go bolelwa le bona.

20Gobane ba šitilwe go kgotlelela ge molao o re: Le kgomo ge e ka fihla thabeng, e tlo thungwa ka maswika.

21Gomme tše ba di bonego di be di šiiša, Moshe a ba a re: Ke tšhogile gagolo; ke a roromela.

22Ge e le lena le tlile thabeng ya Sione, motseng wa Modimo e a phelago, Jerusalema wa legodimong, le monyanyeng wa diketekete tša barongwa.

23Le tlile phuthegong ya maitšibulo a go ngwalwa kua magodimong, le go Moahlodi e lego Modimo wa bohle, le go meoya ya bakgethwa ba bolo ka tlalo.

24Le tlile go Jesu yena Khumedi ya kgwerano e mpsha; Le tlile go fokelwa madi a a bolelago a fetiša a Abele.

25Lebelelang gore le se gane eo a bolelago. Ge bala ba go gana ge a ba laya a le lefaseng ba šitilwe go tšhaba, rena re tlo tšhabela kae ge re hlanogela e a bolelago le rena a le legodimong?

26Mohla wola lentšu la gagwe le šišintše lefase; bjale o re boditše a re: Go sa šetše lebakanyana, ke mo ke tlogo šišinya lefase, e se lona fela; le magodimo ke tlo a šišinya.

27Ge go itšwe: Ke tlo šišinya, ke go re: Tše di dirilwego di tlo phekgolwa, gore go šale tše di sa šišinyegego.

28Ke gore re fiwa mmušo wo o sa šišinyegego; gomme a re lebogeng ka go direla Modimo ka mo go mo kgahlago, ka go mo godiša le go mmoifa.

29Gobane Modimo wa rena ke mollo o jago.

← Chapter 11 Jump to: Chapter 13 →