Hebrews 2

Sotho 1951 (BIBELE)

← Chapter 1 Jump to: Chapter 3 →

1Bjale go rata gore re tiiše go hlokomela tše re di kwelego, gore di se tlo re timelela;

2gobane mola go tlile Lentšu lela la go bolelwa ke barongwa, go le sela le go se kwe gohle ge go eba go oba kotlo ya gona.

3Re tlo phonyokga bjang ge re ka nyatša phološo e kgolo ye, ye e thomilego ka go bolelwa ke Morena, ya tla ya tia mo go rena ka ba ba e kwelego,

4mme Modimo a e hlatsela ka mehlolo, le ka matete, le ka ditiro tše maatla tša mehutahuta, le ka go abela batho Moya ka mo a ithatetšego ka gona?

5Ge e le lefase le lefsa le re le bolelago, ga a ka a re le tlo bušwa ke Barongwa.

6Hleng go na le bohlatse bja e a itšego: Motho ke eng ge o bile o sa mo lebale? Ngwana wa motho ke eng, ge o bile o mo ela hloko?

7O mo hlaeditše ka gonyane a se be morongwa, wa mo hlama ka borena le letago, wa mmušiša mediro ya atla tša gago; tšohle wa di bea ka tlase ga nao tša gagwe.

8Ge go thwe: o beile tšohle ka tlase ga nao tša gagwe, ke go re: ga a ka a šadiša se a sa kago a se bea gona; gomme ga re ešo ra bona motho ge a bušišwa tšohle.

9E a feditšego lebakanyana a hlaeditšwe a se lekane le Morongwa, ke Jesu yo re mmonago a hlamilwe ke borena le letago ka tsela ya go tlaišwa le ya go hwa; gore ka kgaugelo ya Modimo a kwe lehu ka baka la bohle.

10Gobane Modimo o bone ge go swanetše, ge yena eo legohle le lego gona ka baka la gagwe, mme la ba gona ka yena, ge yena wa go iša bana ba bantši letagong, a eba thwadi ya phološo, a tšea bolokatlalo ka go tlaišega.

11Gomme ka ge yena Mokgethabatho, le bao a ba kgethago, ba na le Tatabo o tee, ga a itšimeletše go re batho ke bana babo,

12a tla a re: A nke ke begele bana bešo ina la gago, ke go rete phuthegong.

13A buša a re: Ke tlo dula ke mo lebeletše; a iša pele a re: Ke nna e, le bana ba Modimo a mphilego bona.

14Bjale ka go itira selo se tee le bana bao, ka go ba nama e tee le madi a tee le bona, o fentše Diabolo e a bego a na le maatla a lehu; o mo fentše ka go hwa ga gagwe,

15a golola bao e bego e le batlengwa ka go boifa lehu mehla yohle ge ba sa phela.

16Tšeo ga se tše a di diretšego Barongwa; o di diretše bana ba Aborahama.

17Gomme go be go swanetše ge a eba e a swanago le bana babo ka tšohle, gore a be wa go ba kwela bohloko, a be Moperisita e Mogolo e a botegetšego Modimo, a kgone go hlatswa setšhaba dibe.

18Gobane ba ba lekwago o kgona go ba lwela, ka ge le yena a tlaišegile a lekwa.

← Chapter 1 Jump to: Chapter 3 →