Jeremiah 1

Sotho 2000 (BIBELE Taba yea Botse)

Jump to: Chapter 2 →

1Puku ye e laodiša tše di boletšwego ke Jeremia, morwa wa Hilkia. Hilkia yena e be e le yo mongwe wa baprista ba motse wa Anathote, nageng ya Benjamene.

2Morena o boletše le Jeremia ka ngwaga wa lesome le metšo ye meraro wa ge Josia, morwa wa Amone, e le kgoši ya Juda,

3a tla a bolela le yena gape mola Joyakime, morwa wa Josia, e le kgoši. O be a fela a bolela le yena go fihlela mafelelong a ngwaga wa lesome le motšo o tee wa pušo ya Tsedekia, morwa wa Josia. Ka kgwedi ya bohlano ya ngwaga woo batho ba Jerusalema ba ile ba thopša.

4Morena o ile a re go nna:

5“Ke tsebile pele ke go bopa gore o tla ba eng, ka go kgethwafatša pele o tswalwa ke mmago, ka go dira moprofeta wa ditšhaba.”

6Nna ka mo fetola ka re: “Aowii, Morena, Mong wa bohle, nna ga ke kgone polelo ka gobane ke sa le yo mofsa.”

7Eupša Morena a re go nna: “O se ke wa re o sa le yo mofsa, gobane o tla ya go batho ka moka bao ke go romago go bona, wa ba botša tšohle tše ke go laelago tšona.

8O se ke wa ba tšhaba, ka gobane ke tla ba le wena gore ke go šireletše. Ke realo, nna, Morena!”

9Ke moka Morena a obeletša letsogo, a nkgoma molomo, a re go nna: “Bona, mantšu a o swanetšego go a bolela ke a tsenya ka molomong wa gago.

10Lehono ke go fa maatla a go hlahlamolla le go uša, a go fediša le go menola, a go aga le go hloma ditšhaba le mebušo.”

11Morena a mpotšiša a re: “Na o bonang?” Nna ka mo fetola ka re: “Ke bona lekala la mooka, mophafogapele.”

12Morena a re: “O bone gabotse. Ke dula ke phafogetše go phetha tše ke di boletšego.”

13Ke mo Morena a boletšego le nna la bobedi a re: “Na o bonang gape?” Ka mo fetola ka re: “Ke bona pitša ye e belago e le ka leboa e sekametše ka thoko yeno.”

14Yena a re go nna: “Masetlapelo a tla tšhologela godimo ga bohle ba ba dulago mo nageng ye a etšwa ka thoko ya leboa,

15ka gobane ke bitša ditšhaba tša mebušo ka moka leboa gore di tle. Magoši a tšona a tla hloma ditulo tša ona tša bogoši masorong a dikgoro tša Jerusalema le go dikologa merako ya yona, le metseng ye mengwe ya Juda.

16Ke tla otla setšhaba sa ka ka baka la dibe tša sona; se ntlogetše sa direla medimo ye mengwe dihlabelo, sa itirela medimo ya diswantšho gomme sa e obamela.

17Wena itokiše, o yo ba botša tšohle tše ke go laelago gore o ba botše tšona. O se ke wa ba boifa; ge o ka ba boifa, gona ge o na le bona ke tla go boifiša go fetiša.

18“Bjale bona, mang le mang mo nageng ye o tla lwa nago – magoši a Juda, bakgomana, baprista le setšhaba. Eupša lehono ke go fa maatla a go ba kgotlelela: O tla ba bjalo ka motse wo o ageleditšwego ka morako, goba kokwane ya tshipi, goba ka leboto la mphiri. Ba ka se go fenye ka gobane ke tla ba nago gore ke go šireletše. Ke realo, nna, Morena.”

Jump to: Chapter 2 →