Jeremiah 39

Sotho 2000 (BIBELE Taba yea Botse)

← Chapter 38 Jump to: Chapter 40 →

1Ka kgwedi ya lesome ya ngwaga wa senyane wa ge Tsedekia e le kgoši ya Juda, Nebukadnesare, kgoši ya Babilonia, a tla motseng wa Jerusalema le madira a gagwe ka moka, gomme a o dikanetša.

2Ka tšatši la senyane la kgwedi ya bone ya ngwaga wa lesome le motšo o tee wa ge Tsedekia e le kgoši, morako wa motse wa phulwa.

3Ge motse wa Jerusalema o thopša, bahlankedi ba bagolo ka moka ba kgoši ya Babilonia ba ile ba tlo dula Lesorong la Gare. E be e le Nergale-Saretsere le Shamgare-Nebu le Sare-Sekime, molaodi yo mogolo, le Nergale-Saretsere yo mongwe, yo le yena e bego e le molaodi yo mogolo, le ba bangwe bahlankedi ba kgoši ya Babilonia.

4Ge Kgoši Tsedekia le bahlabani ba gagwe ka moka ba bona tše di diregago, ba tšhaba motseng bošego, ba tšwa ka tsela ya go leba serapeng sa mošate, ba tšwa ka lesoro le le lego mokgahlo ga merako yeo ye mebedi, gomme ba tšhabela thokong ya moedi wa Jordane.

5Eupša madira a Babilonia a ba hlomara mme a swara Tsedekia kua melaleng ya kgauswi le Jeriko, a mo thopa. Ba mo iša go Nebukadnesare, kgoši ya Babilonia, yo a bego a le motseng wa Ribla kua seleteng sa Hamate, gomme gona moo Nebukadnesare a mo ahlola.

6Moo Ribla a bolaya barwa ba Tsedekia, yena Tsedekia a lebeletše, a bolaya le bahlomphegi bohle ba naga ya Juda.

7Ka morago ga moo a laela gore Tsedekia a gonywe mahlo a be a kgokwe ka diketane mme a išwe Babilonia.

8Bababilonia ba tšhuma mošate le dintlo tša batho ka mollo, ba ba ba kgereša merako ya Jerusalema.

9Nebusaradane, molaodi wa baleti ba kgoši, a thopa mašaledi a motse a a iša Babilonia le bao ba bego ba ineetše go yena, gotee le mašaledi a setšhaba.

10Nageng ya Juda a šadiša badiidi ba bangwenyana, ba go hloka le pudi ya leleme le letala, ya ba o ba fa dirapa tša merara le mašemo.

11Nebukadnesare, kgoši ya Babilonia, a laela Nebusaradane, molaodi wa baleti ba kgoši, mabapi le Jeremia a re:

12“Mo tšee, o mo hlokomele gabotse. O se ke wa mo kweša bohloko, eupša o mo direle se a se nyakago.”

13Ka gona Nebusaradane gotee le balaodi ba bagolo, boNebushasbane, le Nergale-Seretsere, le balaodi ka moka ba kgoši ya Babilonia, ba roma batho

14ba yo tšea Jeremia kgorong ya mošate. Ba bea Gedalia, morwa wa Ahikamo, setlogolo sa Shafane, gore a mo hlokomele mme a šetše gore a fihle gae a lotegile. Ka gona Jeremia a yo dula le batho ba gabo.

15Ge Jeremia a sa golegilwe ka kgorong ya mošate Morena o ile a mmotša

16gore a botše Ebedmeleke yola wa Moetopia gore yena Morena Ramaatlaohle, Modimo wa Israele, o re: “Motse wo ke tlilo o tlišetša masetlapelo bjalo ka ge ke boletše, e sego katlego. Taba ye e tla phethagala o lebeletše.

17Mohlang woo wena ke tla go hlakodiša, nna, Morena, wa se gafelwe diatleng tša banna bao o ba tšhabago.

18Ke tla go phološa, wa se bolawe ka tšhoša. O tla phologa ka gobane o mpotile. Ke realo, nna, Morena.”

← Chapter 38 Jump to: Chapter 40 →