Jeremiah 52

Sotho 2000 (BIBELE Taba yea Botse)

← Chapter 51 Jump to:

1Tsedekia o be a na le mengwaga ye masome a mabedi a motšo o tee ge e eba kgoši ya Juda, gomme a buša a le Jerusalema mengwaga ye lesome le motšo o tee. Mmagwe e be e le Hamutale, morwedi wa Jeremia yola wa motse wa Libna.

2Kgoši Tsedekia o be a dira dibe pele ga Morena, go no swana le Kgoši Joyakime.

3Morena a galefela batho ba Jerusalema le ba Juda moo e lego gore o ile a ba raka pele ga gagwe. Tsedekia a tsogela Kgoši Nebukadnesare wa Babilonia maatla,

4ka gona Nebukadnesare a tla ka madira a gagwe ka moka gomme a hlasela Jerusalema ka letšatši la lesome la kgwedi ya lesome la ngwaga wa senyane wa pušo ya Tsedekia. Ba hloma mešaša ka ntle ga motse, gomme ba kgobela ntotoma ya mobu go o dikologa,

5mme ba o dikanetša go fihlela ka ngwaga wa lesome le motšo o tee wa pušo ya Tsedekia.

6Ka letšatši la senyane la kgwedi ya bone ya wona ngwaga woo, ge tlala e befile moo e lego gore go be go se na sa go ja,

7morako wa motse o ile wa kgerešwa. Le ge Bababilonia ba be ba dikaneditše motse, bahlabani ka moka ba ile ba tšhaba bošego. Ba tšea ka tsela ye e putlago serapa sa mošate, ba tšwa ka lesoro le le kgomaganyago maboto a mabedi a serapa seo, gomme ba tšhabela thoko ya moedi wa Jordane.

8Eupša madira a Bababilonia a rakediša Kgoši Tsedekia, a mo swara melaleng ya kgauswi le Jeriko, gomme bahlabani ba gagwe ka moka ba šwalalana, ba mo tlogela.

9Tsedekia a išwa go Kgoši Nebukadnesare yo a bego a le motseng wa Ribla, nageng ya Hamate, gomme Nebukadnesare a mo ahlola moo.

10A bolaya barwa ba Tsedekia fao Ribla Tsedekia a lebeletše, gomme a laela gore le bakgomana ba Juda ba bolawe.

11Ka morago ga moo a laela le gore Tsedekia a gonywe mahlo, a tlengwe ka diketane, mme a mo iša Babilone. A mo lahlela kgolegong, mme Tsedekia a dula fao go fihlela a ehwa.

12Ka letšatši la lesome la kgwedi ya bohlano ya ngwaga wa lesome le metšo ye senyane wa pušo ya Kgoši Nebukadnesare wa Babilonia, Nebusaradane, mohlankedi wa gagwe yo e bego e le molaodi wa baleti ba kgoši, a tsena Jerusalema.

13A tšhuma Tempele le mošate le nywako le meago ka moka ye megolo Jerusalema,

14gomme bahlabani ba gagwe ba kgereša morako wa motse.

15Ke moka Nebusaradane a thotha batho ba ba bego ba šetše motseng, a ba iša Babilonia, le banna ba go tseba mediro ba ba bego ba sa šetše, le ba ba bego ba šetše ba ineetše go Bababilonia.

16Eupša a šadiša badiidi ba bangwenyana nageng ya Juda gore ba šome mašemong le ka dirapeng tša merara.

17Bababilonia ba pšhatlaganya dikokwane tša mphiri le dikoloyana tša ka Tempeleng, gotee le legopo le legolo la mphiri, gomme ba iša mphiri wa gona ka moka Babilone.

18Ba thotha le dibjana tša go olelela melora, digarafo, ditimamabone, meruswi le ditlabakelo ka moka tša mphiri tše di bego di šomišwa tirelong ya Tempeleng.

19Ba thotha dilo ka moka tše di bego di dirilwe ka gauta le silibera: meruswana, dibjana tša magala, meruswi ya go foka madi, dibjana tša go olelela melora, dihlomamabone, dipane tša go tšhumela diorelo, le dibjana tša dihlabelo.

20Mphiri wa dikokwane ka dipedi le wa dikoloyana le wa legopo le legolo, le wa dipoo tšela tše lesome le metšo ye mebedi tše di bego di le thekgile, e lego dilo tše Kgoši Solomone a bego a di diretše Tempele, e be e le wo boima kudu go ka o ela.

21Dikokwane tšeo tše pedi di be di swana: ye nngwe le ye nngwe e le ya dimetara tše 8,3 go ya godimo le tše 5,5 bokoto. E be e le mahoa gomme bokoto bja mphiri wa tšona e le bja dimilimetara tše 75.

22Godimo ga kokwane ye nngwe le ye nngwe go be go na le hlogwana ya mphiri ya bogodimo bja dimetara tše 2,3, gomme e kgabišitšwe ka diswantšho tša digarenate go e dikologa. Digarenate tšeo le tšona di be di bopilwe ka mphiri.

23Hlogwana ye nngwe le ye nngwe e be e kgabišitšwe ka digarenate tše lekgolo, gomme tše masome a senyane le metšo ye e selelago di bonagala.

24Nebusaradane, molaodi wa baleti ba kgoši, a thopa Seraya, Moprista yo Mogolo, Sofonia, moprista yo a mo latelago ka maemo, le baprista ba bararo ba ba bego ba leta mejako ya Tempele.

25Motseng a tšea molaodi wa madira, le baeletši ba ba šupago ba kgoši bao ba bego ba sa le motseng, le mongwaledi wa molaodi yo mogolo yo a bego a hlokometše go rapa dira, le banna ba bangwe ba maemo ba masome a a selelago.

26Nebusaradane a ba iša go kgoši ya Babilonia yo a bego a le motseng wa Ribla,

27nageng ya Hamate. Moo kgoši a laela gore ba itiwe ba bolawe. Ke ka moo batho ba Juda ba thothilwego nageng ya bona ba išwa bothopša.

28Batho bao Nebukadnesare a ba išitšego bothopša šeba: Ka ngwaga wa bošupa wa pušo ya gagwe o ile a thopa batho ba 3 023;

29ka ngwaga wa lesome le metšo ye seswai a thopa ba 832 Jerusalema,

30gomme ka ngwaga wa masome a mabedi le metšo ye meraro a thopa ba 745 – a ba thopelwa ke Nebusaradane. Batho ka moka bao ba ilego ba thopša e bile 4 600.

31Ka ngwaga wo Ebile-Merodaka e bilego kgoši ya Babilonia ka wona o ile a ntšha Kgoši Joyakine wa Juda kgolegong. Seo se diregile ka letšatši la masome a mabedi le metšo ye mehlano la kgwedi ya lesome le metšo e mebedi ya ngwaga wa masome a mararo a metšo ye e šupago ka morago ga ge Joyakine a thopilwe.

32Ebile-Merodaka a mo swara gabotse, gomme a mmea maemong a a hlomphegago go feta a dikgoši tše dingwe tše e bego e le mathopša le yena Babilonia.

33A ba a mo apola diaparo tša gagwe tša kgolego gomme a ja dijo le kgoši bophelo bja gagwe ka moka.

34Ka mehla o be a fiwa tše di nyakegago tša letšatši ka letšatši.

← Chapter 51 Jump to: