Jeremiah 38

Sotho 2000 (BIBELE Taba yea Botse)

← Chapter 37 Jump to: Chapter 39 →

1Shefatia, morwa wa Mathane, le Gedalia, morwa wa Pashure, le Jukale, morwa wa Shelemia, le Pashure, morwa wa Malkia, ba ile ba kwa gore Jeremia o be a botša setšhaba a re

2Morena o re: “Yo a ka šalago mo motseng o tla bolawa ka tšhoša, goba ka tlala, goba ka leuba la bolwetši. Eupša yo a ka tšwago motseng a yo ineela go Bababilonia a ka se bolawe; o tla iphološa gomme a phela.”

3A ba a ba botša le gore Morena o re: “Ruri, motse wo o tla gafelwa diatleng tša madira a kgoši ya Babilonia, gomme bona ba tla o thopa.”

4Ke mo mantona a setšhaba a ilego go kgoši, a fihla a re: “Monna yo o swanetše go bolawa, gobane ka go bolela ka mokgwa wo o nola bahlabani ba ba šetšego mo motseng moko, setšhaba sohle le sona o se nola moko. Ga a lakaletše setšhaba sa gaborena boiketlo, o se lakaletša madimabe.”

5Kgoši Tsedekia a ba fetola a re: “Šoowege, dirang ka yena se le se ratago; nna nka se kgone go le thibela.”

6Ka gona ba tšea Jeremia ba yo mo tsenya ka dithapo ka sedibeng sa Malkia, morwa wa kgoši, se se bego se le ka kgorong ya kgolego. Ka moo sedibeng go be go se na meetse, ge e se leraga, gomme Jeremia a sobelela ka gare ga lona.

7Ebedmeleke wa Etopia, moamogwabonna yo a bego a šoma ka mošate, a kwa gore ba tsentše Jeremia ka moo sedibeng. Ka nako yeo ke ge kgoši a swere lekgotla kua lesorong la Benjamene.

8Ka fao Ebedmeleke a tšwa ka mošate, a yo bolela le kgoši a re:

9“Kgoši, mong wa ka, banna ba ba dirile Jeremia taba ye mpe ka go mo lahlela ka sedibeng. O tla hwela gona ka tlala, ka ge go se sa na le dijo ka mo motseng.”

10Ke mo kgoši a laetšego Ebedmeleke gore a ye le banna ba bararo go ntšha Jeremia ka moo sedibeng pele a ehwa.

11Ka gona Ebedmeleke a ya le banna bao ka phapošing ya bobolokelo ya mošate, a yo tšea diaparo tša maratha, a di tsenyetša Jeremia ka moo sedibeng ka dithapo.

12A mmotša gore a beeletše dithapo ka diaparo tšeo tša maratha ka mahwafeng. Jeremia a dira bjalo,

13gomme ba mo goga ka dithapo ba mo ntšha ka moo sedibeng. A bewa gape ka kgorong ya kgolego.

14Ka le lengwe la matšatši Kgoši Tsedekia a laela gore Jeremia a tlišwe go yena kua lesorong la boraro la go tsena ka Tempeleng ya Morena, gomme a re go yena: “Go na le taba ye ke nyakago go go botšiša yona, gomme o se ke wa mphihlela selo.”

15Jeremia a mo fetola a re: “A ke re ge nka go botša o tla mpolaya? Ge nka go eletša le gona o ka se ntheeletše.”

16Ke ge Kgoši Tsedekia a enela Jeremia ka sephiring a re: “Ka Morena yo a phelago, yena Morephediši, nka se go bolaye goba ka go gafela diatleng tša banna ba ba nyakago go go bolaya.”

17Ke moka Jeremia a botša Tsedekia gore Morena Modimo Ramaatlaohle, Modimo wa Israele, o re: “Ge o ka ineela go balaodi ba madira a kgoši ya Babilonia o tla phologa, le motse wo o ka se tšhungwe ka mollo. Wena le lapa la gago le tla phologa.

18Eupša ge o ka se ineele go bona, gona motse wo o tla gafelwa diatleng tša Bababilonia, ba o tšhuma ka mollo, le wena o ka se ba tšwe ka diatleng.”

19Kgoši a mo fetola a re: “Ke tšhaba batho ba Juda ba ba ineetšego go Bababilonia. Nka no gafelwa diatleng tša bona mme ka tlaišwa.”

20Jeremia a re: “O ka se gafelwe diatleng tša bona. Ke go kgopela gore o phethe tše ke go botšago gore Morena o go laela tšona, gomme o ka se hlagelwe ke selo, o tla phela.

21Eupša Morena o mpontšhitše mo ponong se se tlago go hlagela ge o ka gana go ineela.

22Mo ponong yeo ke bone basadi ka moka ba ba šetšego mošate, ga kgoši ya Juda, ba išwa go balaodi ba kgoši ya Babilonia. Ge ba eya ba be ba re: ‘Bagwera ba gago ba o ba botilego ba go arošitše, ba go paletše. Gomme bjale ge o tantšwe ka lerageng ka maoto, ba go tlogetše.’ ”

23Jeremia a iša pele a re: “Basadi ba gago le bana ba tla ntšhwa ba išwa go Bababilonia, gomme le wena ka noši o ka se phonyokge Bababilonia bao. O tla thopša ke kgoši ya Babilonia, gomme motse wo o tla tšhungwa ka mollo.”

24Tsedekia a re go yena: “O se ke wa botša motho tše re di boletšego, gore o se tlo bolawa.

25Ge mantona a setšhaba a ka kwa gore ke be ke bolela le wena, mme a tla go wena a go botšiša gore na re be re bolela eng, a tla go holofetša gore ba ka se go bolaye ge o ka se ba fihlele selo.

26Wena o no ba botša gore o be o nkgopela gore ke se ke ka go bušetša ga Jonathane gore o hwele gona.”

27Ka kgonthe mantona ale ka moka a ile a tla a botšiša Jeremia, gomme yena a ba fetola ka ona mantšu ale kgoši a mmoditšego ona. Ba napa ba lesa go mmotšiša, ka gobane tše ba bego ba di bolela go be go se yo a bego a di tšere ka tsebe.

28Gomme Jeremia a bewa ka kgorong ya mošate go fihlela letšatši le Jerusalema e thopilwego ka lona.

← Chapter 37 Jump to: Chapter 39 →