Jeremiah 43

Sotho 2000 (BIBELE Taba yea Botse)

← Chapter 42 Jump to: Chapter 44 →

1E rile ge Jeremia a fetša go botša setšhaba tšohle tšela Morena Modimo wa bona a bego a mo romile gore a ye go ba botša tšona,

2Asaria, morwa wa Hoshaya, le Johanane, morwa wa Kareage, gotee le banna bale ka moka ba mereba ba re go yena: “O bolela maaka! Morena Modimo wa rena ga se a go roma gore o tle o re botše gore re se ke ra falalela Egepeta.

3Baruke, morwa wa Neria, o go hlohleleditše gore o lwe le rena, gore o re gafele diatleng tša Bababilonia gore ba re bolaye, goba ba re thopele Babilonia.”

4Ka gona Johanane le balaodi bohle ba madira le batho ka moka ba ile ba se phethe taelo ya Morena ya gore ba dule nageng ya Juda.

5Johanane le balaodi ka moka ba madira ba napa ba tšea bohle ba ba šetšego Juda, e lego bohle ba ba bego ba tšo boa ditšhabeng tšeo ba bego ba šwalalanyeditšwe go tšona, gore ba tle ba dule nageng ya Juda:

6banna, le basadi, le bana, le barwedi ba kgoši, le bohle bao Nebusaradane, molaodi wa baleti ba kgoši, a bego a ba beetše Gedalia, morwa wa Ahikamo, setlogolo sa Shafane, gore e be mohlokomedi wa bona, go balwa le moprofeta Jeremia, le Baruke, morwa wa Neria.

7Ba ile ba nyatša taelo ya Morena, ba ya Egepeta, ba ba ba yo fihla Tagpanese.

8Moo Morena a re go Jeremia:

9“Tšea maswika a magolo o a epele ka leraga lebaleng la ditena le le lego pele ga lesoro la go tsena ka moagong wa mmušo mo Tagpanese, gomme o dire gore ba bangwe ba batho ba Juda ba go bone ge o a epela.

10O name o ba botše gore nna, Morena Ramaatlaohle, Modimo wa Israele, ke re ke tla bitša mohlanka wa ka, Nebukadnesare, kgoši ya Babilonia, a tla mo, gomme yena o tla bea setulo sa gagwe sa bogoši godimo ga maswika a ke go laetšego gore o a epele, a hloma mošaša wa gagwe ka godimo ga ona.

11Nebukadnesare o tla tla a fenya Baegepeta. Batho ba ba lebanwego ke go hwa ka leuba la bolwetši ba tla hwa ka lona, ba ba lebanwego ke go thopša ba tla thopša, le ba ba lebanwego ke go bolawa ka tšhoša ba tla bolawa ka yona.

12O tla tšhuma ditempele tša medimo ya Egepeta ka mollo, gomme kgoši ya Babilonia e tla tšhuma medimo ya bona goba ya e thopa. Bjalo ka ge modiša a rona dinta diaparong tša gagwe, kgoši ya Babilonia le yena o tla tloša tšohle nageng ya Egepeta, gomme a tloga gona e le mofenyi.

13O tla pšhatlaganya dikokwane tša borapedi tša maswika Heliopolise kua Egepeta, a ba a tšhuma ditempele tša medimo ya Baegepeta ka mollo.”

← Chapter 42 Jump to: Chapter 44 →