1 Kings 10

Sukuma 2019

← Chapter 9 Jump to: Chapter 11 →

1Walīho ntemi nkīma wa Sheba, aho walwigwa ū lūkumo lwa ng'wa Solomoni, nī yīyo wīyītaga kūlwa lina lya ng'wa SEEBA, wiza na mabūūjo gakwe madiimu, kūngema ū Solomoni.

2Ūshika ī Yelusalemu alī n'ibità itaale lya batūmami bakwe; walī na ngamīla ningī jibūūkije shikolo shingī sha kūsanja mu shilīwa na zahabu ningī, hamò na mawe ga mpango ntaale. Aho washika ū kūlī Solomoni, ūng'wīla pyī īyo walī nayo ū mu maganiko gakwe.

3Ū Solomoni ūng'winha ishosho lya kwigela ū mu mabūūjo gakwe a gose ayo akagabūūja, lītigelile ibūūjo nūūlū līmò lya kūnemeela ū ntemi kūnshokeja ū ntemi nkīma ng'wenūyo.

4Ū ntemi nkīma wa Sheba aho wabūbona pyī ū witegeleja bo ng'wa Solomoni ū mu milīmo yakwe, nī likūlū īlo walī wazenga;

5ūshibona nī sha kūlya īsho shatengagwa a ha meeza yakwe, na a kigasīje ka batūmami ba ha ng'wakwe, nī shizwalo īsho baalī bazwalīlile a binhīlīja ba ha ng'wakwe, na a binhīlīja ba sha kūng'wa shakwe; ūshibona nī shitambò sha kūpemvwa īsho wafunyaga mu hekalu ya ng'wa SEEBA, ū nkīma ng'wenūyo ūjinjimala.

6Ūng'wīla ū ntemi, “Ī mihayo ya katūmamīle kako nū witegeleja wako īyo nayiigwa nalī mu sī yane bakwīhayaga, gashi pye ya ng'hana.

7Alīyo natīzunije īyo bīhayaga, kūshisha nene ng'wenekīlī nizile kwībona na miso gane; nīyo naabonile gīkī īyo nawīlwa ītashikile nūūlū a ha nusu yaho. Ū būsabi nū witegeleja wako būkīlile kūle no a ha mihayo īyo nīyigwa.

8A banhū ba ha ng'wako balī na no! Na a batūmami ba mu būsugi wako, abo bakikalaga kū būtongi wako būlī makanza bakūdegelekaga mihayo ya masala gako, nabo balī na no!

9Akumīlījiwe ū SEEBA Mulungu wako, ūyo akūyegelile kūshisha ūkūtūūla h'isumbī lya būtemi lya sī ya Isilaeli. Ū SEEBA īkī a Baisilaeli abatogilwe na būtogwa wa welelo, h'ī nguno yene wakwītile kūbiza ntemi wabo ū bebe, ūbize wa kūlang'hana būtūngīlīja na kūtūūla būlamuji ūbo būtī wa kūsolanhya.”

10Hūna ū ntemi nkīma ng'wenūyo ūng'winha ū ntemi Solomoni tani inè na nusu ja zahabu, na shisanjo sha mu shilīwa shingī no, na mawe ga mpango ntaale. Shiteenhilwe hangī ikanza lyose lyose shisanjo sha mu shilīwa shingī gīko, gīt'īsho akenha ū ntemi nkīma wa Sheba; īsho akiza kūng'winha ū ntemi Solomoni.

11(Nī meli ja ng'wa Hilamu jikenha zahabu kūfuma Ofili, nīyo ū kūfuma ū kwenūko jikenha na miligo mitaale no ya mitī midiimu ya kūtūmamīla, na mawe ga mpango ntaale.

12Ū ntemi wītūmamīla ī mitī yenīyo kūbeeja ng'hīngī ja mu hekalu na mu numba y'ikūlū, na kūbeegeja ng'oma na malimba kūlwa nguno ya bīmbi. Ī mitī īyo īkiza yenīyo yalī mingī no, kūfuma ikanza lyenīlo ītaalī kwenhwa hangī mitī midiimu mingī gīko, nūūlū kūbonwa dūhū yaya.)

13Ū ntemi Solomoni ūng'winha ū ntemi nkīma wa Sheba būlī shikolo īsho walī atogilwe kūpandīka; būlī shene īsho akalomba ūng'winha. Kūleka kūshiisaaba īsho walī wang'winha kūfuma mu shikolo sha mu nīmo gwakwe gwa nyatemi. Hūna ū ntemi nkīma ng'wenūyo ūshoka na a banhū bakwe abo walī wiza nabo, ūja kū sī yakwe.

14Ū būdito wa zahabu ījo wapandīkaga ū Solomoni būlī ng'waka walī tani makūmi abīlī n'itanò,

15kūleka kūjisanja ī zahabu ījo wapandīkaga kūfuma kū basūlūja na bachooji ba sabo bangī bangī, hamò na batemi ba mu sī ja Baalabu na a basugi ba mu sī yakwe.

16Ū ntemi Solomoni ūbeeja mūda nhaale magana abīlī ja zahabu; būlī lūmūda lūsola zahabu ya būdito wa kilo gītī idatū na nusu.

17Ūbeeja na mūda jingī ndo do do magana adatū, najo ja zahabu; būlī lūmūda lūsola zahabu ya būdito wa kūkīla hado a ha kilo īmò na nusu. Ū ntemi ūjitūūla ī mūda jenījo ng'wikūlū, ū mu numba y'ipoolu lya Lebanoni.

18Hanuma ya henaho, ū ntemi ūbeeja isumbī itaale lya būtemi; ūlībeeja lya mapembe ga mhūlī, hūna ūlīnaagīla zahabu niiza.

19Ī lisumbī lyenīlo lyalī na malinhīlo atandatū, hūna ū kū numa ū kwigūlya ūlyīta likuubile gītī būta. Ū kū mhandī būbīlī wajo lyalī na makīgījo ga kūtūūla ho makono galembeela; būl'ikīgījo lyalī na shiikolile sha shimba yīmīīlile a ha mhelo yalyo.

20Jalīho shimba ikūmi na'ibīlī a ha malinhīlo gose atandatū, būlī lyene na shiikolile sha shimba yīmīīlile a ha būgelelo walyo. Lyalī lītaalī kūbeejiwa isumbī lya būtemi lya mbika yenīyo pye a hose ū mu sī.

21Pyī ī shiseme sha kūng'wela ū ng'wikūlū lya ng'wa ntemi Solomoni shalī sha zahabu; nī shiseme sha milīmo yīngī ū mu numba y'ipoolu lya Lebanoni pye shalī sha zahabu yawiza. Shalī shitīho shikolo nūūlū shimò īsho shalī shibeejiwe kūfuma mu feza, nguno ū mu shikū ja ng'wa Solomoni ī feza jalī jitabalilwe gīkī nasho shalī shikolo.

22Nū kū nyanza ū ntemi walī na meli ningī, jatūmamaga hamò na meli ja ng'wa Hilamu. Būl'ikanza lya myaka idatū jashokaga kamò jibūūkije zahabu, feza, mapembe ga mhūlī, nhūmbīlī na ngūkū.

23Ū ntemi Solomoni walī nsabi no, hangī walī na masala mingī kūbatinda pye a batemi ba mu sī.

24Banhū ba mahanga na mahanga ū mu sī baalī na ng'hūmbū ja kūmona ū Solomoni badegeleke mihayo ya masala gīt'ūmo Mulungu walī wang'winhīla.

25Būlī ng'waka bizaga bingī, alīyo pye abo bizaga benhaga shakwinha; shikolo sha kūbeejiwa kūfuma mu feza, zahabu; bangī shizwalo, shilanga, shisanjo sha mu shilīwa; na bangī falasa nūūlū ndamhī jingī ī jawiza.

26Ū Solomoni walī wakumingīja magogoteni mingī ga falasa, hamò na badamhīji ba falasa bingī no; walī na magogoteni shihūmbī shimò na magana anè, na falasa shihūmbī ikūmi na shibīlī; ī shose shenīshi walī ashibīīkile mu mizengo īyo walī wazenga kūlwa magogoteni ga būlūgū; na shingī wikalaga nasho ū mu nzengo gwa Yelusalemu.

27Nīyo ū ntemi walī wajikwīja no ī feza ū mu Yelusalemu, jaali gītī mawe dūhū, nī mbawa ja mitī ya mibanga jalī ningī no gītī mitī ya migumo mu matūmbī.

28Ī falasa ja ng'wa Solomoni jagūlagwa kūfuma Misili na Kū; a bachooji ba sabo ba ng'wikūlū bajaga Kū bakajigūla.

29A magogoteni ayo gagūlagwa būlī lyene balīgūlaga na kūlyenha lyabasoja shekeeli ja feza ja būdito wa kilo mpungatī, ī falasa būlī yene yabasojaga shekeeli ja feza ja būdito wa kūkīla a ha kilo īmò na nusu. Nabo babaajingījaga ī shikolo shenīsho pye a batemi ba Bahītī na a Baalamu.

← Chapter 9 Jump to: Chapter 11 →