1 Kings 5

Sukuma 2019

← Chapter 4 Jump to: Chapter 6 →

1Ū ntemi wa Tulo ū Hilamu aho wigwa gīkī ū Solomoni witīīlilwe maguta kūbiza ntemi a ha ng'wanya go ng'wa ise ū Daūdi, ūtūma batūmami bakwe ū kūlī Solomoni; nguno ū Hilamu nū Daūdi baalī biyegelile.

2Nang'hwe ū Solomoni ūtūma nhūngwa ū kūlī Hilamu alīhaya:

3“Ū baba walī na ng'hūmbū ja kūzenga numba kūlwa nguno ya lina lya ng'wa SEEBA Mulungu wakwe, alīyo walī atadūgije nguno walī apīndiwe būlūgū pye hose hose gīt'ūmo ūmanīlile nū bebe, kūshisha ū Mulungu ūbatūūla a banishi bakwe ha sīlīlī ya mhambala jakwe.

4Alīyo ī haha ū SEEBA Mulungu wane waninhile mhola būlī kwene, natī na ng'wanishi, nūūlū mhayo gwa kūnīngīja mhola gūtīho.

5Na lūūlū nalī na ng'hūmbū ja kūzenga numba kūlwa nguno ya lina lya ng'wa SEEBA Mulungu wane, gīt'ūmo ū SEEBA walī wang'wīlīla ū baba ū Daūdi gīkī, ‘Ū ng'wana wako ūyo nakūntūūla h'isumbī lya būtemi, ūlū wabīta ū bebe; hū ng'wene akūzenga ī hekalu, kūlwa nguno ya lina lyane.’

6Alilūūlū, lagījaga nabbutīlwe mitī ya mibanga ū ng'wipoolu lya Lebanoni. A banhū bane bakūyūtūmama na a banhū bako, nakūfunya shose shose īsho ūnihelela kūbiza mheela, kūlwa banhū bako. Ūdeebile gīkī a bise tūtī nabo a banhū abo bagūmanīīlile ū nīmo gwa kūgwisha mitī gīt'ūmo bakīītīlaga bana Sidoni.”

7Ū Hilamu aho wajiigwa ī mhola ja kūfuma ū kūlī Solomoni ūyega no; ūhaya, “Akūmīlījiwe ū SEEBA ī lelo, nguno wang'winhile ū Daūdi ng'witūnja wa masala abize nsugi walyo ī lihanga ī litaale lyenīlī.”

8Na lūūlū ū Hilamu ūtūma nhūng'wa ū kūlī Solomoni alīhaya: “Naajipandīkile ī mhola jako ījo wanitūmīlile, ū nene nakwīta ūmo wanilombelile, ‘Nakūkūbbutīla a magogo ga mibanga nī mizule.

9A banhū bane bakūgaduta kūfuma ī Lebanoni, bagatwale ū kū nyanza, hūna nakūgatunga miligo miligo, geeleejiwe mu nyanza genhwe koi, gize gatūūlwe aho ūtogelilwe. Hūna ūlū gūshika ho a henaho nakūgalekanya, nang'ho ūgasombe ūgashikīlīje ūko gajile. Ī mheela yane ū mu milīmo yenīyī ūkūninha shilīwa sha kūlisha kaya yane.’”

10Hūna lūūlū ū Hilamu ūng'winha ū Solomoni pyī ī mitī ya mibanga nī ya mizule īyo walī atogilwe kūpandīka.

11Ū Solomoni nang'hwe ūng'winha ī shilīwa ū Hilamu, madebbe ga ngano shihūmbī igana na makūmi abīlī na shitanò kūlwa shilīwa sha banhū ba mu kaya yakwe, na maguta ga zeituni galani shihūmbī igana na'ikūmi n'itanò. Nīyo ū Solomoni ūzunya kūyūfunya gīko būlī ng'waka.

12Ū SEEBA akang'winha ū Solomoni masala gīt'ūmo walī wang'wisagīīgīja, na lūūlū yūbiza ho mhola a ha gatī ya ng'wa Hilamu nū Solomoni, nīyo bitūūlīla ilagane ū mu būbīlī wabo.

13Ū ntemi Solomoni ūlagīla bigela banhū shihūmbī makūmi adatū kūfuma hose pyī ū mu Isilaeli, kūlwa kūtūmama milīmo y'hadīke.

14A banhū benabo ūyūbatwaala Lebanoni mu ndīīma ja banhū shihūmbī ikūmi ikūmi būlī ng'weji; būyūmala ng'weji gūmò ī Lebanoni bakūtūmamaga, hama bashoka kaya biza bamala myeji ībīlī. Ū ntaale wa milīmo y'hadīke yenīyo walī Adonilamu.

15Na hangī ū Solomoni walī na banhū bikalaga mu ngūlū, baalīko shihūmbī makūmi mpungatī ba kūyūbūūcha miligo, na shihūmbī makūmi anaane batūji ba mawe mu ngūlū.

16Hama walī na banhū shihūmbī shidatū na magana adatū ba kūgwīmīīla ū nīmo na kūyūbatonga a batūmami gūje chiza ū nīmo.

17Ū ntemi walī walagīja gīkī gayūsolanhyiwa mawe mataale kūfuma ū kū ngūlū, gabeegelejiwa chiza chiza na nundo kūlwa kūzengela nsingi; ū nsingi gwa hekalu gūbize gwa mawe gabeegelejiwe ng'hana ng'hana.

18Na lūūlū a bazengi ba ng'wa Solomoni būtūmama na a ba ng'wa Hilamu, hamò na banhū ba Gebali; būyūbbuta ī mitī na kūgabeegeleja ng'hana ng'hana a mawe ga kwīzengela ī hekalu.

← Chapter 4 Jump to: Chapter 6 →