1 Kings 15

Sukuma 2019

← Chapter 14 Jump to: Chapter 16 →

1Mu ng'waka gw'ikūmi n'īnaane go būtemi bo ng'wa Yeloboamu ng'witūnja o ng'wa Nebati, Abiya ūbiza ntemi wa Yuda.

2Ūtema myaka idatū alī mu Yelusalemu; ū nina ī lina lyakwe walī Maaka, nshīke bo ng'wa Abishalomu.

3Ūshimīzīla ū mu būbi ū bose ūbo walī wawīta ū ise ūyo walī wantonga ū kūbiza ho; ī ng'holò yakwe yalī ītī na būtūngīlīja ū kūlī SEEBA Mulungu wakwe, gīt'ūmo yalī ng'holò ya ng'wa Daūdi ū ise nkūlū.

4Alīyo naheene kūlwa nguno ya ng'wa Daūdi, ū SEEBA Mulungu wakwe ūng'winha talà ū mu Yelusalemu; ūmūūkīja ng'wana wa kwingīla a ha ng'wanya gwakwe, nū nzengo gwa Yelusalemu ongeja kūgwinha nguzu.

5Nguno ū Daūdi walī wīta yawiza ū mu miso ga ng'wa SEEBA, atalekanile na shilagīlo sha ng'wa SEEBA shose shose ū mu shikū ja būlamu wakwe; ūlū ītī mu mhayo go ng'wa Ulia ū Ng'hītī dūhū.

6Ū mu shikū ja būlamu bo ng'wa Abiya ī jose, boolīho būlūgū a ha gatī ya ng'wa Lehoboamu nū Yeloboamu.

7Mihayo yīngī ī ya mu shikū ja būtemi bo ng'wa Abiya, nī yīyo wīta ī yose yandīkilwe mu shitabo sha ng'hūlū ja batemi ba Yuda. Boolīho būlūgū a ha gatī ya ng'wa Abiya nū Yeloboamu.

8Hūna ū Abiya wifuula na bakūlūgenji bakwe, ūjīīkwa mu nzengo go ng'wa Daūdi. Ng'witūnja wakwe Asa wingīla a ha ng'wanya gwakwe, ūbiza ntemi.

9Mu ng'waka gwa makūmi abīlī go būtemi bo ng'wa Yeloboamu ntemi wa Isilaeli, Asa wandya kūbiza ntemi wa Yuda.

10Ūtema myaka makūmi anè alī mu Yelusalemu; ū mamayī ī lina lyakwe walī Maaka, nshīke o ng'wa Abishalomu.

11Ū Asa wīta yawiza ū mu miso ga ng'wa SEEBA, gīt'ūmo walī wītīla ise Daūdi.

12A bamalahya a bagosha, abo biyītaga kūbiza gītī bakīma, ūbapeeja ū mu sī, ūshīnja nī shiikolile īsho walī washibeeja ū ise.

13Nū maamaaye ū Maaka ūng'wīngīja ī likūjo īlo lyang'winhaga lūgiili giili gīkī ntema nkīma ninaabo, nguno walī wabeeja ikīngī lyabūbi lya ng'wa Ashela. Ū Asa ūlībbutagūla ī likīngī lyenīlo ūūkalīponya kū longa lwa Kiduloni ūlīpemba na moto.

14Nūūlū īkī atagīngije a mapandī ga higūlya, ū Asa walī wīfunya gete ī ng'holò yakwe kūlī SEEBA ū mu būlamu wakwe pyī ū bose.

15Ī zahabu nī feza nī shikolo ī shingī īsho ū wei nū ise balī bashifunya sheejiwa, ūshenha mu hekalua ya ng'wa SEEBA.

16Walīho būlūgū a ha gatī ya ng'wa Asa nū Baasha ū ntemi wa Isilaeli, ū mu shikū jabo jose aho balī batemi.

17Na lūūlū ikanza ilebe ū Baasha ū ntemi wa Isilaeli ūja kwīdumīla ī Yuda; nzengo gwa Lama wandya kūgūzengeela ngītīli ya ndugu kūgūpīndīlīja, kūlwa kūbahangīja abo balī na ng'hūmbū ja kwīnga, nūūlū kūja kū sī ya ng'wa Asa ū ntemi wa Yuda.

18Ū mu shikū jenījo ū Asa ūjisola pyī ī feza nī zahabu ījo jalī jasaagīīla ū ng'wibīkīlo lya sabo lya mu hekalu ya ng'wa SEEBA, jingī ūsola kūfuma mu numba y'ikūlū. Ūbinha batūmami bakwe ūbatūma kū ng'wa Beni-hadadi ng'witūnja o ng'wa Tabulioni, ng'witūnja o ng'wa Hezioni ntemi wa Alamu, ūyo wikalaga mu nzengo gwa Damasiko.

19Ūhaya, “Twitūūlīlage būlagane a ha gatī yane nū bebe, gītī ūbo walīho ha gatī ya ng'wa baba na so; angū ūlībona gīkī naakwenhelaga feza na zahabu sha kūkwinha. Alilūūlū, īngaga ū mu būlagane ūbo būlīho a ha gatī yako nū Baasha ū ntemi wa Isilaeli; anīngīle ū mu sī yane.”

20Ū Beni-hadadi ūzunya ī ya ng'wa Asa, ūtūma bashilikale bakwe kwīdumīla ī sī ya Isilaeli; wīdima mizengo ya Iyoni, Dani, Abeli-beti-maka, nī Gineleji ī yose; wīsangīja nī Nafutali ī yose.

21Ū Baasha aho wigwa gīko oya ū kwīzenga ī Lama; wīnga ūshoka Tiliza.

22Hūna ū ntemi Asa ūbalagīla pye a banhū ba Yuda, ndūhū wa kūlekeelwa; būgabūūcha kwīnga ī Lama a mawe nī mitī īyo wazengelaga ū Baasha. Ū ntemi Asa ūshitūmīla ī shikolo shenīsho kwīguzuhya mizengo ya Geba ya mu sī ya Benjamini, nī Misipa.

23Ī mihayo ī yīngī ī yose ī ya mu shikū ja būtemi bo ng'wa Asa, gītī ya būtindi wakwe pyī ū bose, nī yīyo wabeeja pyī ī yose, nī mizengo īyo akazenga, yose yenīyo yandīkilwe mu shitabo sha ng'hūlū ja batemi ba Yuda. Gwike aho wanahaala no no no, ūsaata a magūlū.

24Hūna ū Asa wifuula na bakūlūgenji bakwe, ūjīkwa hamò nabo mu nzengo go ng'wa Daūdi. Ng'witūnja wakwe Yehoshafati wingīla a ha ng'wanya gwakwe, ūbiza ntemi.

25Nadabu ng'witūnja o ng'wa Yeloboamu ūbiza ntemi wa Isilaeli mu ng'waka gwa kabīlī go ng'wa Asa ntemi wa Yuda. Ī Isiliaeli wītema ikanza lya myaka ībīlī.

26Wīta yabūbi ū mu miso ga ng'wa SEEBA, ūshimīzīla ū mu nzīla ī jose ī ja ng'wa ise, nū mu būhūbi bokwe, ūbo walī wabenheleja a Baisilaeli kūhūba.

27Baasha ng'witūnja o ng'wa Ahiya munhū wa numba ya ng'wa Asheli ūng'wijomboka ūntūla balī Gibesoni, nzengo gūmò gwaho gwa Bafilisiti. Ī likanza lyenīlo ū Nadabu walī na bashilikale bakwe baalī bagūpīndije ū nzengo gwenūyo kūgūdumīla.

28Ū Baasha ūmūlaga ū Nadabu mu ng'waka gwa kadatū go būtemi bo ng'wa Asa ū ntemi wa Yuda; wingīla a ha ng'wanya gwakwe, ūbiza ntemi wei.

29Aho wandya dūhū ū kūtema ūbabūlaga pye a banhū ba numba ya ng'wa Yeloboamu. Ū Yeloboamu atanekelile munhū mpanga ose ose; ūbayagaja pye gete, kūlenganīla nū mhayo go ng'wa SEEBA ūyo walī wagūfunya mu nzīla ya ntūmami wakwe Ahiya muna Shilo;

30nguno ya būhūbi ūbo walī wawīta ū Yeloboamu ūbenheleja a Baisilaeli kūhūba, na kūlwa nguno akampelanya no ū SEEBA Mulungu wa Isilaeli.

31Mihayo yīngī ī ya mu shikū ja būtemi bo ng'wa Nadabu, nī yīyo wīta ī yose yandīkilwe mu shitabo sha ng'hūlū ja batemi ba Isilaeli.

32Boolīho būlūgū a ha gatī ya ng'wa Asa nū Baasha ū ntemi wa Isilaeli, ū mu shikū jabo jose aho balī batemi.

33Mu ng'waka gwa kadatū go būtemi bo ng'wa Asa ū ntemi wa Yuda, Baasha ng'witūnja o ng'wa Ahiya ūbiza ntemi wa Isilaeli ī yose; ūtema ikanza lya myaka makūmi abīlī n'īnè alī mu Tiliza.

34Wīta yabūbi ū mu miso ga ng'wa SEEBA, kūlwa kūshimīzīla mu nzīla ja ng'wa Yeloboamu, nū mu būhūbi wakwe, ūbo walī wabenheleja a Baisilaeli kūhūba.

← Chapter 14 Jump to: Chapter 16 →