Nehemiah 1

Sukuma 2019

Jump to: Chapter 2 →

1Īyī yene mihayo ya ng'wa Nehemia ng'witūnja o ng'wa Hakalia: Mu ng'weji gwa Kisileu, ng'waka gwa makūmi abīlī, naalī mu nzengo gwa Susa,

2Ūmò wa baana bang'wise, lina lyakwe Hanaani, wiza na banhū balebe kūfuma kū sī ya Būyudaya. Hūna nūbabūūja ūmo balīīla a Bayudaya abo baalī bapūlūgūka ū kūsaamiwa, nī mihayo ya nzengo gwa Yelusalemu.

3Būniwīla, “Abo bapūlūgūkile ū kūsaamiwa bikala ū mu sī yenīyo, balī mu makoye mataale, hangī nīyo mhayo gwa soni no; nī ndugu ya nzengo gwa Yelusalemu yakambagūlilwe, nī mibita yaho yūpemvwa moto!”

4Aho nīyigwa ī mihayo yenīyī nifudīka hasī, nūtandūka kūlīla; nūfunga shikū ningī nakūlījiagwa būpīna, kūnū nakūnombaga ū Mulungu wa ng'wigūlū.

5Nūhaya gīkī, “Ee SEEBA, Mulungu wa ng'wigūlū, ūyo ūlī Mulungu ntaale na wa kogohwa. Bebe ūyo ūtalyībaga ī lilagane lyako lya būtogwa īlo walagana na banhū abo bakūtogilwe na bagadimile a malange gako,

6nalīlomba ūtege ū gūtū gwako, na a miso gako ūgaloleche; wigwe ū kūlomba kwa ntūmami wako, ūmo akūkūlombelaga līīmi na būjikū, kūlwa nguno ya batūmami bako, a Baisilaeli. Nalītambūūla ī shibi shise a bise Baisilaeli, īsho twīta tūkūhūba bebe. Ū nene hamò nī kaya ya ng'wa baba tūlī bahūbi ū kūlī bebe.

7Īyo twīta ū kū būtongi wako īlī ya malofu no; tūtagadimile a malange gako na a kahelele, pyī nī shilagīlo īsho wang'winha ntūmami wako Musa.

8Gwizūkagwe ū mhayo ūyo ūkang'wīla ntūmami wako Musa ūlīhaya gīkī, ‘Ūlū ng'wīnga ū mu wishigwa, nakūmubbalaasanya mu mahanga,

9alīyo ūlū ng'ūnishokela, hūna ng'ūbiza bigwi ū kū malange gane, ū mu gīko a banhū bing'we abo basaamījiwa kū mahanga, nūūlū bakabiza balī kūle na kinehe, nakūbakuminga nabīnje koi, nabenhe ū kwipandī īlo naalīsola kūbiza wikalo wa lina lyane.’

10Alilūūlū, a benaba balī batūmami bako, na banhū bako gete; abo ūkabakomoola mu nguzu jako na būdūla wako būtaale, na nkono gwako gwa būdūla.

11Ee SEEBA, nalīlomba ūtege ū gūtū gwako ū kūlī ntūmami wako ūyū, nū kūlomba kwa batūmami bako abo bayejiwe na mhayo gwa kūlīkūja ī lina lyako. Ī lelo yenīyī ng'winhage būpyeni ū ntūmami wako, ūng'wīlūkīle ja kwanukūlwa ū kū būtongi wa munhū ng'wenūyū.” Naalī na nīmo gwa kūntengela ntemi sha kūng'wa shakwe.

Jump to: Chapter 2 →