Nehemiah 6

Sukuma 2019

← Chapter 5 Jump to: Chapter 7 →

1Ū Sanibalati nū Tobia, nū Geshemu, na a Balabu, hamò na banishi bise a bangī aho bawīlwa gīkī nīzengile būpya ī ndugu, na gīkī twīchibile pye ūmo yalī īhomagūkile, nūūlū īkī kūshika ikanza lyenīlo naalī nataalī ū kwītūūla ī milyango a ha mibita,

2ū Sanibalati nū Geshemu būnitūmīla nhūng'wa balīhaya gīk, “Nzūgū tūmanhīje kwigūngūli līmò lyaho lya mu mbūga ya Ono.” Alīyo baalī n'iganiko lya kūnīītīla yabūbi.

3Nūbatūmīla nhūng'wa nalībawīla, “Ū nene nalī na nīmo ntaale no ū kūūnū, natūdūla ū kwiza ū kwenūko; nibūlī nize kūhooya ning'we kwenūko, nagūleke ū nīmo gwīmīīle?”

4Bakashisha ng'hangala inè bakūmanagūnitūmīla nhūng'wa ja mbika yenīyo, nane nabashokeja gīko dūhū.

5Nose ū Sanibalati ūtūma ntūmami wakwe, wiza abūkije nyalūba mu nkono, alīyo yalī itakundīkīgije;

6yandīkilwe gīkī, “Gwakumūkile ū mu banhū ba mahanga gwa gīkī, ū bebe na a Bayudaya mutogilwe kūgoma; nīyo nū Geshemu alīhaya gīkī ū mhayo gwenūyo gūlī chene ng'hana. H'ī nguno yene mulīyīzenga ī ndugu, hama ū bebe ūlī na ng'hūmbū ja kūbiza ntemi wabo.

7Hūna lūūlū witūūlīlile bahangi ū mu Yelusalemu, bakūhangaga kūlwa nguno yako; bakūhayaga gīkī, ‘Alīho ntemi ū mu sī ya Būyudaya!’ Alilūūlū, ū mhayo gwenūyū gūkūshika ū kūlī ntemi, na lūūlū nzūgū tūgūhooyele.”

8Nane nūntwalīla ishosho nūng'wīla, “Īyo ūlīyīhaya yenīyo ītīho, mamihayo ga kūfuma mu ntwe gwako dūhū a genayo.”

9Ī ng'hūmbū jabo a banhū benabo pye a bose jalī kūtūkanga; nguno biganikaga, “Tūbolohye a makono gabo gagayī ī nguzu, balemeelwe ū kūgūshikanya ū nīmo.” Ee SEEBA Mulungu, gaguzuhyage a makono gane.

10Lwise lūmò nakaja kū ng'wa Shemaya ng'witūnja o ng'wa Delaya, ng'wana Mehetabeli; walī wilugalīla mu kaya yakwe. Ūniwīla, “Bebe tūjage mu numba ya ng'wa Mulungu, tūkikale mu hekalu twīlugale nī milyango ya hekalu, nguno balīho banhū balīhaya kwiza kūkūbūlaga; bakwiza ī būjikū bakūbūlage!”

11Alīyo nūhaya, “Ū nene ng'wenūyū napeele gete? Nūūlū ū munhū wa kūbiza gītī nene ūpeelela mu hekalu kūlwa kūhaya kūpīja būpanga bokwe? Natingīlaga mo ū nene ū ng'wenūmo!”

12Nakadeeba gīkī ū munhū ng'wenūyo walī atatūmilwe na Mulungu, alīyo wanihangīlaga ū būhangi wenūbo kūlwa nguno ya ng'wa Tobia na Sanibalati abo baalī bangodisha.

13Walī wahongwa gīkī anikange nilalīle, nīīte shibi mu nzīla yenīyo; bapandīke nzīla ya kūnibila isū lyabūbi badūle kūnisondagūla.

14Mulungu wane, ng'wizūkagwe ū Tobia nū Sanibalati, kūlwa mihayo īyo bīyītile yenīyo; pyī nū ng'hangi nkīma ū Noadia, na a bahangi a bangī abo balī na ng'hūmbū ja kūnogohya.

15Hūna lūūlū ū nīmo gwa kwīzenga ī ndugu gūshila mu lūshikū lwa makūmi abīlī n'itanò ng'weji gwa Elūli; gūbiza gwasola ikanza lya shikū makūmi atanò n'ibīlī.

16A banishi bise aho bagwigwa ū mhayo gwenūyū, na a banhū ba mahanga ayo gaalī gatūpīndije būbona, a banishi bise būgwa ng'holò. Nguno bakabona hape gīkī ū nīmo gwenūyū gwatūmamilwe mu būgunanhi bo ng'wa Mulungu wise.

17Ū mu shikū jenījo a banhū a bataale bataale a ba mu sī ya Būyudaya bikalaga bakūntwalīlaga nyalūba ū Tobia, nū wei ū Tobia wabenhelaga ī nyalūba jakwe.

18Nguno bingī ū mu sī ya Būyudaya walī wabilahīja, īkī ū wei walī nkwīlīma o ng'wa Shekania, ng'witūnja o ng'wa Ala. Hama ū ng'witūnja wakwe ū Yehohanani walī wantoola nshīke o ng'wa Meshulamu ng'witūnja o ng'wa Belekia.

19Hama a higūlya ya yenīyo, bikalaga bakūniwīlaga ī ya wiza bokwe; hūna nū wei baja kūng'wīla īyo nīhayaga, hūna ū Tobia wanitūmīla nyalūba ja kūnikanga.

← Chapter 5 Jump to: Chapter 7 →