Nehemiah 2

Sukuma 2019

← Chapter 1 Jump to: Chapter 3 →

1Ū mu ng'weji gwa Nisani, ng'waka gwa makūmi abīlī gwa būsugi wa ntemi Atashasta, aho yenhwa divai nīsola nūkantengela ū ntemi. Naalī nataalī kūbi nalī na būpīna ū kū būtongi bokwe nūūlū kamò.

2Hūna lūūlū ū ntemi ūnibūūja, “Bebe ni kinehe ilelo ūzoobaalile gīko alīyo ūtī nsaatu? Ū gwenūyū gūtūdūla kūbiza mhayo gūngī, ūlū ītī būpīna bo mu ng'holò!” Nakogoha no.

3Hūna nūng'wīla ū ntemi, “Kūlaga ūhangame ntemi! Nakūlekela kī ū kūpīnīhala alīyo ū nzengo go ng'wise ūko balaalile bataale bane gūlī mamisaka gike, nī mibita yago yapemvwa moto!”

4Ū ntemi ūnibūūja, “Ī gīsī lūūlū ūlū kwīta mhayo kī?” Nane nūnomba ū Mulungu wa ng'wigūlū,

5hūna nūnshokeja ū ntemi, “Ūlū gūlībeelela ū mu miso ga ntemi, hama ū ntūmami wako ūlū wīlūkīlagwa wiza ū kū būtongi wako, nitūmage naje ī Būyudaya, ū kū nzengo gwa mashigo ga bakūlūgenji bane; nakagūzenge.”

6Ī likanza lyenīlo ū ngole nang'hwe walī igashije hamò nū ntemi; hūna ū ntemi ūnibūūja, “Ū lūgendo lwako lūkūbiza lwa shikū jinga, ūkūshoka nanalī?” Ū ntemi walī atogilwe ū kūnizunīlīja ū kūja, na lūūlū nūng'winha ī likanza.

7Nūng'wīla na, “Ūlū alīzunya ū ntemi, nalīlomba ninhwe nyalūba ja kūjana ū kū basugi ba sī ījo jilī kū nkīlo gwa mongo, natizūpandīka makoye ūlū nalībīta, kūshisha nashike ī Būyudaya.

8Napandīke na nyalūba ya kūntwalīla ū Asafu, ū nang'hani w'ipoolu lya ntemi, anizunīlīje kūpandīka mitī kūlwa migamba, ya kūtūūla ha mibita ī ya ha ndugu īyo īpīndīlīgije hekalu, na kūlwa ndugu ya nzengo, na kūbeeja numba īyo nalikale ū nene.” Ū ntemi ūnizunīlīja īyo nakīlomba, nguno ū nkono gwawiza ū go ng'wa Mulungu wane gwalī hamò nane.

9Hūna nūja, aho nashika ū kū basugi ba sī ja kū nkīlo gwa mongo nūbinha ī nyalūba ja kūfuma ū kūlī ntemi. Nīyo ū ntemi walī waninha na bashilikale, na badamhīji ba falasa.

10Alīyo ū Sanibalati, ū muna Holoni, nū Tobia ū muna Amoni ūyo walī ntūmami, aho bigwa gīko, bakasaaya no ū kūbona gīkī wizile munhū kūbeeja nīmo gwa kūbagunanha a Baisilaeli.

11Nanoga nūshikīīla ī Yelusalemu, aho nikala ikanza lya shikū idatū,

12nūbūka mu makanza ga būjikū, na banhū bagehu naalī nabo. Gwike naalī nataalī kūng'wīla munhū ose ose īsho walī washitūūla ū Mulungu wane ū mu ng'holò yane kūlwa kwīyītīla ī Yelusalemu. Nīyo naalī natī na ndamhī ja kwigela, ūlū ītī īyo naalī nadamhīlile dūhū ū nene.

13Aho nabūka ū mu būjikū wenūbo, nūfuma hanze kūbītīla ha mita gwa kū longa, gwa kūbīta ūjile kū lwinzī lwa nyamhawa, na kū mita gwa mapalala. Najilīngūlīlaga ī ndugu ja nzengo gwa Yelusalemu ūmo jalī jakambagūlīlwa, nī mibita yaho īyo yalī yapemvwa moto.

14Ū kūfuma a henaho nūjīlīīla kū mita gwa kū lūzwīlo, na kwilambo lya ntemi; gwike gūgaya ū ng'wanya gwa kūbīta ī ndamhī yane īyo naalī nadamhīlile.

15Na lūūlū nūsīngīja nalūlondeelile ū longa ītaalī būjikū gīko, kūnū nakwīlīngūlīlaga ī ndugu; nanoga nūshokanya niza ningīlīla kū mita gwa kū longa.

16A basugi baalī batamanile ūko naalī naja, nūūlū īyo nīyītaga, nguno kūshisha ikanza lyenīlo naalī nataalī ū kūbawīla a Bayudaya nūūlū a bagabīji na a batongeeji, nūūlū a basugi; pye a bose nūūlū abo yalī gīkī bakūgwīta ū nīmo.

17Hūna nūbawīla, “Bing'we angū mulībona gīkī tūlī mu makoye ahene; ī Yelusalemu īlī mamisaka gike, nī mibita yaho yapemvwa moto, twīzengagi ī ndugu ya Yelusalemu, twīnge ū mu būdalahwa.”

18Hūna nūbinha ī ng'hūlū ja nkono gwawiza ū go ng'wa Mulungu wane ūyo gwalī hamò nane, nī mihayo īyo walī waniwīla ū ntemi. Būhaya, “Twandyagi ū kūzenga.” Na ng'hana biyinha nguzu, bandya ū kūgwīta ū nīmo gwawiza gwenūyo.

19Alīyo ū Sanibalati, ū muna Holoni, nū Tobia, ū muna Amoni ūyo walī ntūmami, hamò na Geshemu, ū Ng'walabu, aho bigwa gīko bandya kwiyineenelegeja bakūtūsekaga mu būdalahi. Būyūhaya, “Mulīīta nīmo kī ū gwenūyū? Mulīngomela ū ntemi a bing'we?”

20Nane nūbashokeja nūbawīla, “Ū Mulungu wa ng'wigūlū akūtwinha būtindi, a bise batūmami bakwe tūkwandya ū kūzenga; alīyo a bing'we mutī na ngabo gete, nūūlū shikolo shing'we ndūhū, shitīho nūūlū shose shose sha kūng'wīta ng'wizūkīlwe ū mu Yelusalemu.”

← Chapter 1 Jump to: Chapter 3 →