Nehemiah 10

Sukuma 2019

← Chapter 9 Jump to: Chapter 11 →

1Abo bakatūūla ī meng'ho jabo baalī aba, Nehemia, ūyo walī nsugi; ng'witūnja o ng'wa Hakalia, na Zedekia,

2Selaya, Azalia, Yelemia,

3Pashuli, Amalia, Malikīya,

4Hatushi, Shebania, Maluki,

5Halimu, Meledosi, Obadia,

6Danyeli, Ginesoni, Baluki,

7Meshulamu, Abiya, Mijamini,

8Maazia, Biligai, na Shemaya. A benaba baalī bagabīji.

9A Balawī baalī, Yeshua, ng'witūnja o ng'wa Azania, Binui ūmò wa bitūnja ba ng'wa Henadadi, Kadimieli

10na bichabo, ba Shebania, Hodia, Kelita, Pelaya, Hanaani,

11Mika, Lehobu, Hashabia,

12Zakuli, Shelebia, Shebania,

13Hosia, Bani, na Beninu.

14Batongeeji ba banhū baalī, Paloshi, Pahashi-moabu, Elamu, Zatu, Bani

15Buni, Zigadi, Bebai,

16Adoniya, Bigivai, Adini,

17Ateeli, Hezekia, Azuli,

18Hodia, Hashumu, Bezai,

19Halifu, Asosi, Nebai,

20Magipiashi, Meshulamu, Hezili,

21Meshezabeli, Zadoki, Yadua,

22Pelatia, Hanaani, Anania,

23Hoshea, Hanania, Hashubu,

24Haloheshi, Piliha, Shobeki,

25Lehumu, Hashabuna, Maaseya,

26Ahiya, Hanaani, Anani,

27Maluki, Halimu, na Baana.

28“A banhū a bangī, a bagabīji, Balawī, na a balang'hani ba ha mibita, bīmbi, batūmami ba mu hekalu, na a bose abo bikomanya ū kū banhū ba sī jenīji kūlwa kūlondeela shilagīlo sha ng'wa Mulungu, pye na a bake babo, na bitūnja babo a bose, na a bashīke babo abo badūgije kwitegeleja mihayo,

29a bose ī haha balī hamò na a baana ba ng'wabo, a batongeeji. Pye balitūūla ha sīlīlī y'izumo na kwiyilahīja gīkī bakūshilondeela ī shilagīlo sha ng'wa Mulungu, īsho binhwa mu nzīla ya ng'wa Musa ū ntūmami o ng'wa Mulungu. Na gīkī bakūgalondeela mu welwa ng'holò pye a malange ga ng'wa SEEBA Mulungu wise, na a kaīle, na a kahelele kakwe.

30Tūliyilahīja bise benekīlī, yaya ū kūbinha a bashīke bise ū kū banhū ba mu sī yenīyī gīkī babatoole, yaya nūūlū ū kūbasola a bashīke babo gīkī tūbatooje a bitūnja bise.

31Nīyo hangī a banhū ba mu sī yenīyī ūlū benha ha lūshiku lwa sabato shikolo shabo nūūlū shilīwa kwiza kūjinja, yaya ū kūbagūlīla a ha sabato nūūlū mu lūshikū lwa shigukulu shingī shose shose. Hama būlī ng'waka gwa mpungatī tūkūyūgaleka a malaale gise ū kūgalīma, na a banhū tūkūyūbalekeja a magasa.

32Twihelelaga bise benekīlī mhayo gwa kūyūfunya gulamu itanò ja feza būlī ng'waka, kūlwa kūgunanha milīmo ya numba ya ng'wa Mulungu wise,

33kūpandīka migatī ya kūtūūlwa kū būtongi bo ng'wa Mulungu, shitambò sha būlī lūshikū sha būsu na sha kūpemvwa; shakwinha sha kūfunyiwa mu shikū ja sabato, shigukulu sha ng'weji mpya, na mu shikū ja shigukulu īsho shihelilwe; kūlwa shakwinha sheela, kūlwa shakwinha sha shibi nguno ya kūtūūla isangī kūlwa Baisilaeli; na kūlwa milīmo yose ī ya mu numba ya ng'wa Mulungu wise.

34Nīyo hangī a bise bagabīji, na a Balawī, na a banhū a bangī, twihelelaga ndīīma, twitūlīgīja mbale kūlondeela kaya ja bakūlūgenji bise; tūbone ūmo jikūyenhela ī ng'hwi ū kū numba ya ng'wa Mulungu wise, kūlenganīla na a kahelele ka būlī ng'waka ako katūūlilwe, kūlwa kūpemba ha ng'walīlo go ng'wa SEEBA Mulungu wise, gīt'ūmo gwandīkilwe mu shilagīlo.

35Na hangī twihelelaga bise benekīlī mhayo gwa kūyenha ū kū numba ya ng'wa SEEBA būlī ng'waka a matwajo ga kwandya ga shikolo īsho tūkalīmaga, na a ga mitī ya shisuumo ī yose.

36Ūmo handīkīlilwe mu shilagīlo, a bitūnja bise a babyalwa ba kwandya tūkūyūbenha kū numba ya ng'wa Mulungu wise, ū kū bagabīji abo bakatūmamaga koi; pyī nī mbyalwa ja kwandya ja ng'ombe, nī ja madaale ga mbūli na a ga ng'holo.

37Hama ū būsu wise ūbo būkabizaga bo kwandya kūshiwa, tūkūyūwenha ū mu chumba sha kūbīkīla shikolo īsho shilī mu numba ya ng'wa Mulungu wise, twabūtūūla ng'wenūmo kūlwa nguno ya bagabīji; shabiza shitambò shise sha būsu. Tūkūyenha na a matwajo ga mitī yise ī yose, nī divai yise ī mhya, na a maguta. Nīyo tūkūyenha ī zaka yise kūlwa nguno ya Balawī, nguno a Balawī hū bene abo bigeleelilwe kūsola zaka kūfuma ū kū mizengo yise yose ī ya banhū ba milīmo ya mu malaale.

38Ngabīji wa shibyalīlwe sha ng'wa Alooni akūbiza hamò nabo a Balawī ū ng'wikanza lya kūjanukūla ī zaka; nabo a Balawī shibigelile kwenha īmò ya ng'wikūmi ya kūfuma ū mu zaka jenījo, kū numba ya ng'wa Mulungu ū mu chumba sha kūbīkīla shikolo.

39A Baisilaeli hamò na a Balawī shibigelile kwenha ū būsoogi wabo ū mu chumba sha kūbīkīla shikolo, ūko shikabīkagwa ī shikolo, ūko bakikalaga a bagabīji ūlū balī na lūdīīma, na a balang'hani ba ha mibita, na a bīmbi; bayenha būsīga nī shilīwa ī shingī, nī divai mhya, na maguta. Tūtīlekanīja ī numba ya ng'wa Mulungu wise.”

← Chapter 9 Jump to: Chapter 11 →