Nehemiah 8

Sukuma 2019

← Chapter 7 Jump to: Chapter 9 →

1Pye a banhū bibilinga gītī munhū ūmò, ha gwalugwa ya kū būtongi bo mita gwa minzī. Hūna būng'wīla ū Ezila, ū nangi wa shilagīlo; kūshenha ī shitabo sha shilagīlo sha ng'wa Musa, īsho SEEBA wabinha a Baisilaeli.

2Hūna ū mu lūshikū lwa kwandya lwa ng'weji gwa mpungatī, ū ngabīji Ezila ūshenha ī shilagīlo ū kū banhū abo baalī bibilinga; baalīho bagosha na bakīma, pye na a baana, bose abo baalī badūgije kwitegeleja.

3Ūshisoma n'ilaka lya kwigwa pye a banhū, kwandīja dilū līīmi līlīfuma, kūshisha līīmi ntwe gatī. Wasomaga alolelile ū kū mita gwa minzī, ū kū būtongi wa bagosha na bakīma na a baana, hamò na a bangī abo baalī badūgije kwitegeleja; pye a banhū baalī badegeleka chiza no, aho shilīsong'wa ī shitabo sha shilagīlo.

4Ū nangi Ezila aho alīsoma walī wīmīīla ha lūtala lwa mantī; na banhū balebe baalī bīmīīla hamò nang'hwe, ū kū nkono gwakwe gwa būlyo baalīho ba Matisia, Shema, Anaia, Ulia, Hilikia na Maaseya. Ū kū nkono gwa lūmoso baalīko ba Pedaya, Mishaeli, Malikīya, Hashumu, Hashibadana, Zakalia, na Meshulamu.

5Hūna ū Ezila ūshikundūla ī shitabo, pye a banhū balībona, nguno walī higūlya; aho washikundūla pye a banhū bīmīīla.

6Ū Ezila ūnkumīlīja SEEBA, ū Mulungu ntaale; pye a banhū būbūūcha ng'wigūlya a makono gabo, hanuma būhelelekeja balīhaya, “Alichene! Alichene!” Hūna binama hasī, būnamya ū SEEBA, kūnū bachimīgije hasī ū būshū wabo.

7A Balawī abo baalīho baalī ba Yeshua, Bani, Shelebia, Yamini, Akubu, Shabesai, Hodia, Maaseya, Kelita, Azalia, Yozabadi, Hanaani, Pelaya. A beneba hū babatongaga a banhū ī mihayo ya mu shilagīlo ū ng'wikanza aho bīmīīlile henaho.

8Basomaga kūfuma ū mu shitabo sha shilagīlo sha ng'wa Mulungu, mu kūbagunanha a banhū bīyitegeleje īyo īlīmo, mu koolecha a makūlū gaho; a banhū badeebe īyo yasomagwa.

9Pye a banhū būyūlīla aho bīyigwa ī mihayo ya shilagīlo; hūna ū Nehemia ū nsugi, nū Ezila ū ngabīji na nangi wa shilagīlo, hamò na a Balawī abo balangaga būbawīla a banhū, “Lekagi ū kūlīla, nguno ū lūshikū lwenūlū lūlī lwela kūlī SEEBA, Mulungu wing'we.”

10Ū Nehemia ūbawīla, “Alilūūlū ī haha muje mukalye shizeeze, mung'we na sha kūng'wa shawiza; nū yūyo atī na wa kūmeegeja shose shose muntwalīle. Ū lūshikū lwenūlū lūlī lwela kūlī SEEBA, mutapīnīhalage. Nguno ū būyegi bo ng'wa SEEBA h'ī nguzu jing'we.”

11A Balawī būyūbahuumūja pye a banhū balībawīla, “Huumūlagi nguno ū lūshikū lwenūlū lūlī lwela; lekagi ū kūpīnīhala.”

12Hūna pye a banhū būja kaya ng'hana, būkalya na kūng'wa mu būyegi, na kūbatwalīla shilīwa abo baalī batī nasho; shūbiza shigukulu sha būyegi no, nguno bakīyitegeleja īyo bakatongwa.

13A ha lūshikū lwa kabīlī lwaho, pye a batongeeji ba kaya ja bakūlūgenji, na a bagabīji na a Balawī, biza ū kūlī Ezila ū nangi wa shilagīlo, kwiza kūlangwa chiza ī ya mu shilagīlo.

14Būbona ū mu shilagīlo īsho SEEBA wabalagīla mu nzīla ya ng'wa Musa, handīkilwe gīkī a Baisilaeli ībigeleelilwe kwikala mu maduku ū mu shikū ja shigukulu sha mu ng'weji gwa mpungatī.

15Nīyo shiigelile bakomelejiwe a banhū hose pyī ū mu mizengo yabo nī Yelusalemu, “Linhagi kū ngūlū mukabute matambī ga mizeituni, mizeituni ya mu mapoolu, na ga mitī mido mido ya būlabo bo ng'waso nsoga, na ga nhende, na matambī ga mitī yīngī ī ya madūūtū mingī,” gīt'ūmo gwandīkilwe.

16Na ng'hana a banhū būja būūkenha a matambī ga mitī, biza būzenga maduku, bangī higūlya ya numba jabo, bangī ha gwalugwa jabo, bangī ha gwalugwa ja numba ya ng'wa Mulungu, na ha gwalugwa ya kū būtongi wa mita gwa minzī, nū kū būtongi wa mita gwa ng'wa Efulaimu.

17Pye a banhū abo baalī bashoka kūfuma kū būsaamiwa būzenga maduku, bikala ng'wenūmo. Kwīngīīla mu shikū ja ng'wa Yoshwa ng'witūnja o ng'wa Nuni, a banhū baalī bataalī ū kūshiyegela ī shigukulu shenīsho mu nzīla yenīyo; nīyo bakayega na kayegele kataale no.

18Kūfuma lūshikū lwa kwandya kūshisha lwa kūmalīja, būlī lūshikū ū Ezila wasomaga kūfuma ū mu shitabo sha shilagīlo sha ng'wa Mulungu. Ī shigukulu shenīsho bakashiyegela ikanza lya shikū mpungatī, ū mu lūshikū lwa kanaane bīīta libilinga, gīt'ūmo gwaalī gūhelelilwe.

← Chapter 7 Jump to: Chapter 9 →